Galatiya Ma 3

Dale ge Galatiya ma ne

1 O Galatiya ma, naa ge be ndaco ma! A wuɗi vuuɗi aŋ ndwara ne ɗaa? Aŋ ge a ne e aŋ kwa Jeso Kris ne aŋ ndwara pella uwara kaŋgre pal. 2 Mbi ɓyare za̰ fare a̰me ɗu ne aŋ wak zi: Aŋ ke mborra eya pal ɗo aŋ ɓo o̰yom no, ko aŋ za̰ fare ge kwaɗa hon fareba zi ɗaa? 3 Aŋ naa ge be ndaco ma ne ɗaa? Aŋ é pe da ne O̰yom ta, aŋ mbo á sḛ duur go ɗaa? 4 Aŋ njó yál baŋ go yak ɗaa? A fareba go a baŋ yak go’a! 5 Na ge ne ho̰ aŋ O̰yom, ge ne ke kaŋ ŋgayya ma aŋ buwal zi, ke na da ne aŋ ne ke mborra eya pal pe, ko ne aŋ ne za̰ fare ge kwaɗa hon fareba zi pe ɗaa?

Ke mborra eya pal hat ndu dosol ne to

6 Ne jo̰ Abraham ho̰ fareba, Dok ndi no go, na ndu ge dosol ne. 7 Kwa me go, a naa ge hon fareba ma Abraham vya ma ne. 8 Maktub waage zḛ tek go, pehir ge ɗogle ma mbo hat dosol Dok ndwara se da ne hon fareba ta. Da ne pe no, a waage Abraham fare ge kwaɗa mbe zḛ tek no go: «Pehir ma pet a mbo ɓol wak busu da ne mo ta.» 9 Go no ɗe, naa ge hon fareba ma ɓo wak busu poseya ne Abraham, bage hon fareba. 10 Ago naa ge ne ke mborra ne eya pal ma pet, wak vḛneya ya nama pal. Ago a njaŋge go: «Wak vḛneya ka ndu ge daage pet ge ne ke mborra fare ge daage pet ge ne njaŋge ne maktub eya mbe no zi pal to pal.» 11 A kwaya̰l go, Eya ne pool ge hat ndu dosol Dok ndwara se to, ne jo̰ a go: «Ndu ge dosol mbo kat ne ndwara da ne hon fareba ta.» 12 Ago Eya mbo da ne hon fareba ta ya to. Amma: «Bage ne ke mborra nama pal mbo kat ne ndwara da ne nama ta.»

13 Kris zu nee da ne wak vḛneya ge Eya ne go, ne da pe saŋge wak vḛneya ne nee pe, ago a njaŋge go: «Wak vḛneya ya ndu ge a ne pel na kaŋgre pala digi pal.» 14 Ne da pe, wak busu ge a ne ke Abraham na wak tuli dé pehir ge ɗogle ma ta ge Jeso Kris zi, nee ame O̰yom ge a ne ke nee na wak tuli da ne hon fareba ta.

Eya ma ne wak tuli

15 Ná vya ma, mbi jan fare kwarra ge naa dasana ma ne pal, kadɗa ndu njaŋge wak tuli ya, ndu ge ɗogle ne pool ge gul na ko kan fare ge ɗogle na pal to. 16 A ke wak tuli mbe ma da ne Abraham ma ne na hir pe. A be njaŋge go: «Ne mo pehir ma pe» to, dimma ne a ne jan fare da ne naa ɓase gḛ pe to, amma jan fare da ne ndu ɗu kikit pe, jya̰ go: «Ne mo pehir pe» ndwara go Kris. 17 Fare ge mbi ne jan no: Dok ke wak tuli da ne zḛ ya day. Ne jo̰ Eya mbo ya del kikis anda ne para tapolɗu go̰r go, na sḛ ne pool ge gul wak tuli mbe to. 18 Ago kadɗa joo ɓol da ne Eya ta ɗe, gwan ɓol ne wak tuli ta to. Amma da ne wak tuli ta, Dok ho̰ Abraham na bobo no. 19 A ho̰ Eya da ne da pe ɗaa? A ka̰ na ya pal da ne wak kuriya pe, ɗiŋ pehir ge a ne ke na wak tuli mbo ya. A maleka ma ho̰ Eya mbe ya ne ne bage ne wan naa gool ta. 20 Kadɗa ndu ɗu ne fare ne ɗe, bage wan naa gool mbe wan ma̰ ma gool pe ɗaa? Dok ɗu kikit.

21 Ago Eya ho̰l ne wak tuli ge Dok ne ɗaa? A go to bat. Kadɗa a ho̰ Eya a̰me ge ne mbya hon naa ndwara ɗe, ndu te ya mbyat kat dosol Dok ndwara se ne Eya ta. 22 Amma a njaŋge ne maktub zi go, kaŋ ma pet ya sone zi, ne da pe bobo ge Dok ne ke wak tuli hon naa ge hon fareba ma nama ɓo na ne fareba honna Jeso Kris ta.

23 Amma hon fareba gale ne be mbo ya, nee ka mo̰r ge Eya ne zi, koyya zi, ne da̰re dyanna ge hon fareba ne ya pe. 24 Go no, Eya ka bage hate nee, ndwara ɗame nee ya Kris ta, ne da pe nee há dosol Dok ndwara se ne hon fareba ta. 25 Amma swaga ge hon fareba ne mbo ya, nee ne bage hateya koo se to. 26 Ago aŋ pet, aŋ Dok vya ma ne, ne hon fareba ta Kris Jeso zi. 27 Ago aŋ pet ge a ne ke aŋ baptisma Kris zi ma, aŋ ka̰ Kris aŋ ta go. 28 Yahud to Grek to me, mo̰r to vya twala to me, ndu son to, ndu gwale to me, ago aŋ pet, aŋ ɗu Kris Jeso zi 29 Kadɗa aŋ ge Kris ne ɗe, aŋ pehir ge Abraham ne ne, naa ge zam joo ma dimma ne Dok ne ke wak tuli go.