Naa ge koyya ge sone ma ne bage koyya ge kwaɗa
23
1 Woo, naa ge koyya ma, nama ge ne ban mbi gii ma, ge ne dasare nama se sasar ma. Ka̰l ge Bage ɗiŋnedin ne. 2 Ne pe no ɗe, Bage ɗiŋnedin, Dok ge Israyela ne jan fare da ne naa ge ne koy mbi ɓase ma: Aŋ ɓarse mbi gii ma se, aŋ ba̰ mbi gii ma uzi, aŋ be koy nama to. Ndi mbi mbo ɗage ho̰l aŋ pal ne aŋ kaŋ kerra ge sone ma pe. Ka̰l ge Bage ɗiŋnedin ne.3 Mbi mbo kote mbi gii ge ne ga ne suwal ma ge mbi ne ɓarse nama ya, ma ya digi, mbi mbo gwan ne nama ya nama ɗyagarta zi, nama sḛ ma mbo tol ta se, a mbo zuli se ceɗed. 4 Mbi mbo hon nama naa ge koyya ma, nama sḛ ma mbo sya vo to bat, a mbo gwan ndat vo to bat, a̰me ɗu mbo woɗege uzi to. Ka̰l ge Bage ɗiŋnedin ne.
5 Ndi, dam ma mbo ya go,
Ka̰l ge Bage ɗiŋnedin ne.
Mbi mbo hon Dawda hir ge dosol.
Mbo ke muluk dimma ne gan ge zwama go.
Mbo ke fare wak yuwaleya ne dosol pal suwal diŋa.
6 Na dam ma zi, Yuda mbo ɓol zurra,
Israyela mbo ɓol swaga katɗa ge halas.
Ndi, a mbo hon na dḭl go:
«Bage ɗiŋnedin i dosol ne»
7 Ne da pe no ɗe, ndi dam ma mbo ya go, Ka̰l ge Bage ɗiŋnedin ne. Ndu mbo gwan guni tene janna go: «Ne dḭl ge Bage ɗiŋnedin, Bage ne ndwara, na ge ne zú Israyela vya ma ne suwal Masar diŋ ya» to, 8 amma naa mbo ga guni ta janna go: «Ne dḭl ge Bage ɗiŋnedin, Bage ne ndwara, na ge ne gwa̰ ne hir ge Israyela ne ne suwal ge kuu ge ya, ne suwal ma ge na ne ɓarse nama ya ma go pet, ne da pe, nama gwa̰ ya kat nama suwal go.»
Fare janna anabi ge hale ma pal
(23:9-40)
Mbi dulwak kun ya ɓat,
mbi duur abe ya ndatɗa,
mbi ga ya dimma ne ndu ge fereya go,
dimma ne ndu ge oyo̰r jiya̰l ne hṵ na hun go,
ne Bage ɗiŋnedin pe,
ne na fare ge mbegeya pe me.
10 Ago suwal wi da ne ne naa ge ke kaya ma,
suwal ya kḭḭmi zi ne wak vḛneya pe.
Swaga zam ge ne babur pul go ma pet, a fya̰ ya uzi,
a yan sone pe kerra,
a á ta tyatyat ke kaŋ ge ne mbya kerra to ma.
11 Ko anabi ma ne naa ge ke tuwaleya ma puy,
a naa ge seŋgre ma ne.
Mbi ɓol sone kerra ge nama ne ɗiŋ mbo zok ge mbi ne zi.
Ka̰l ge Bage ɗiŋnedin ne.
12 Ne da pe no, nama viya̰ ma mbo saŋge targal,
a mbo ɓyan nama tṵ zi ya,
a mbo ga detɗa na zi.
Dam ge mbi ne mbo mḛre nama ya go,
mbi mbo zwal yál ya nama pal,
ka̰l ge Bage ɗiŋnedin ne.
13 Mbi kwa kaŋ kerra ge sone kakatak
ge anabi ge suwal Samariya ne ma ta.
A waage fare da ne dḭl ge dok Baal ne,
a ka ya̰me mbi ɓase ma, Israyela vya ma.
14 Amma, ge anabi ge ne Ursalima diŋ ma buwal zi,
mbi kwa kaŋ ge seŋgre ma.
Nama sḛ ma naa ge ke kaya ma ne,
a mbo ya hale zi,
a vin naa ge ne ke sone ma pe.
Go mbe no, a tele nama be ge saŋge ya se
ne bama kaŋ kerra ge sone ma go.
Nama sḛ ma pet, a ne mbi ndwara zi
dimma ne naa ge Sodom ne ma go,
Naa ge Ursalima diŋ ma
dimma ne naa ge suwal Gomor ne ma go.
15 Ne da pe no ɗe, Bage ɗiŋnedin,
Bage naa ge mbal pore ma ne jan fare anabi ma pal go:
Ndi, mbi mbo hon nama kaŋ ge zwalla ma zamma,
mbi mbo é nama njot mam ge guniya.
Ago da ne anabi ge Ursalima ne ma ta,
sone dasare suwal pal no pet.
16 Bage ɗiŋnedin, Bage naa ge mbal pore ma ne jan go:
Zá̰ me fare janna ge anabi mbe ma ne jan aŋ to,
A lase aŋ lase.
A jan aŋ fare ge ne bama dulwak zi ma baŋ,
a be fare ge ne ndage ne Bage ɗiŋnedin wak zi ya ne to.
17 A jan naa ge ne sen mbi ma go:
Bage ɗiŋnedin jan go:
«Aŋ mbo ɓol swaga katɗa ge halas.»
A jan nama ge ne ke laar ɓyareya ge bama ne ma go:
«Yál a̰me mbo det aŋ pal to.»
18 A wuɗi ka swaga koteya ge
Bage ɗiŋnedin ne go ne ge ba kwa,
ko ba zá̰ na fare ma ɗaa?
A wuɗi só na togor ne ɗo, za̰ na no ɗaa?
19 Ndi me saam labreya ge Bage ɗiŋnedin ne,
na pore juliliya ɗage ya digi bilu,
kurum furmi ya digi, mbo det ge naa ge sone ma pal.
20 Pore juliliya ge Bage ɗiŋnedin ne mbo kale uzi baŋ to,
a ŋgat, ke laar ɓyareya ge na ne ma pet.
Dam ge hṵsi ma zi, a mbo kwar na pe.
21 Mbi be teme anabi mbe ma ne to,
a nama sḛ ma harge ta ne.
Mbi be jan nama fare ne to,
a nama sḛ ma waage fare ne bama pala ne.
22 Te go nama sḛ ma ka swaga koteya ge mbi ne go,
a te ya e ɓase ma za̰ mbi fare ma,
a te ya é nama saŋge ya se ne
bama viya̰ mborra ge sone ma go,
ne bama kaŋ kerra ge sone ma go me.
23 Mbi Dok ge ne aŋ ta zi gwa ne ɗeŋgo ɗaa?
Ka̰l ge Bage ɗiŋnedin ne.
To, mbi Dok ge ne kaal ya ne me.
24 Ndu da ne pool woy tene swaga
a̰me ge ɗimil zi be mbi kwar na to ɗaa?
Ka̰l ge Bage ɗiŋnedin ne.
A be mbi, mbi wi digi digi zi ya ma ne suwar ne to’a?
Ka̰l ge Bage ɗiŋnedin ne.
25 Mbi zá̰ anabi ma fare janna, nama ge a ne waage fare ge hale ma ne mbi dḭl janna go: «Kiya̰r jya̰ mbi, kiya̰r jya̰ mbi ne!» 26 Ɗiŋ ma del dḛ anabi ge ne waage fare ge hale mbe ma ba ya̰ bama hale mbe ma be waageya ɗaa? Fare waageya ge a ne waage na a syal fare ne bama pala zi baŋ. 27 Ne bama kiya̰r ge a ne wan ta nama pe ta buwal zi ma, a ɓyare é mbi ɓase ma vyale mbi dḭl dimma ne bama bá ma ne vyale mbi dḭl ne dok Baal pe go. 28 Kadɗa kiya̰r jya̰ anabi ne, na wa̰ na kiya̰r pe, amma ndu ge ne mbi fare, na waage mbi fare fareba pal. A ma kaŋ ba̰a̰n ne gyaɗa ma ne swara ndwara buwal zi ne ɗaa? Ka̰l ge Bage ɗiŋnedin ne.
29 Mbi fare te be dimma ne ol go to’a? Ka̰l ge Bage ɗiŋnedin ne. Ko dimma ne marto ge ne ɓá njal go to’a?
30 Da ne pe no, mbi ho̰l ne anabi ma ge a ne sel mbi fare ma janna ta ta. Ka̰l ge Bage ɗiŋnedin ne. 31 Mbi ho̰l ne anabi ge wak fogor ma, nama ge ne ɓole waage mbi fare ma. Ka̰l ge Bage ɗiŋnedin ne. 32 Mbi ho̰l ne anabi ma ge ne wan naa kiya̰r ge hale pe. Ka̰l ge Bage ɗiŋnedin ne. Ne bama fare kabeya ge hale mbe ma, a ka ya̰me mbi ɓase ma. A be mbi, mbi teme nama ne to, mbi be hon nama mbi wak ne to. Nama sḛ ma mbar ɓase mbe ma ne a̰me pe to. Ka̰l ge Bage ɗiŋnedin ne.
33 Kadɗa ɓase mbe ma, ko anabi, ko ndu ge ke tuwaleya a̰me ele mo ya go: «A ma kaŋ dṵṵl ge Bage ɗiŋnedin ne e ya i pal ne ɗaa?» Jya̰ nama go: «Aŋ sḛ ma kaŋ dṵṵl ma ne! Mbi mbo cigi aŋ uzi ya, ka̰l ge Bage ɗiŋnedin ne.» 34 Kadɗa go anabi a̰me, ko ndu ke tuwaleya, ko ndu a̰me ɗu ne ɓase ma buwal zi janna go: «Dṵṵl ge Bage ɗiŋnedin!» Mbi mbo mḛre na, ne na yàl pet. 35 Mbya aŋ ele ta go: «Bage ɗiŋnedin gwa̰ ne fare janna gyana ɗaa? Bage ɗiŋnedin jya̰ gyana ɗaa?» 36 Amma kadɗa ne mḛreya ge Bage ɗiŋnedin ne ɗe, aŋ mbo gwan jan na ne aŋ wak zi to bat. Ago a mbo mḛre ndu ge daage na fare janna pal. Aŋ ɗuuli Dok ge ndwara, Bage ɗiŋnedin, Bage naa ge mbal pore ma ne, Dok ge nee ne fare pala se. 37 Fare ge ne mbya mo ele anabi na no: «Bage ɗiŋnedin gwa̰ ne mo janna gyana ɗaa? Bage ɗiŋnedin jya̰ mo gyana ɗaa?» 38 Amma kadɗa aŋ jan go: «No a dṵṵl ge Bage ɗiŋnedin ne ne!» Ne jo̰ Bage ɗiŋnedin tele aŋ tele go aŋ gwan jan na to, aŋ dwage na janna no, ko ne jo̰ mbi teme ya jan aŋ go, aŋ gwan jan go: «Mḛreya ge Bage ɗiŋnedin ne» to puy ɗe, 39 ne no pe, mbi mbo vyale aŋ ne ndwara dedet, mbi mbo cigi aŋ ne suwal ge mbi ne ho̰ aŋ, ne aŋ bá ma na go uzi ne mbi ndwara se. 40 Mbi mbo hon aŋ saaso ge ɗiŋnedin, aŋ mbo wat saaso ge ɗiŋnedin ge be vyaleya to zi.