Mḛreya ge suwal Babilon ne
21
1 Mḛreya ge babur pul ge ne maŋgaɗam ga̰l yuwam wak go ne.Dimma ne mandal ne labre mbo le Negev ya go,
naa ge ho̰l ma ɗage ja ne le babur ya,
ne suwal ge ne hon naa vo ge be to ya.
2 Mbi ɓo daalam ge iigi naa:
«Bage boge naa, boge naa,
bage burmiya, burmi swaga.
Elam ma, abe me pore!
Mede ma, ve me suwal se!
Sun ta ge naa ne, na mḛ go ga.»
3 Ne pe no, mbi goŋ pyaɗe mbi ya go,
yál ɓol mbi ya go,
dimma ne gwale ne ke twala go.
Yál njotɗa ban mbi ya be za̰ fare,
mbi ndole ya ge be gwan kwa swaga.
4 Mbi a̰re ya se harak,
vo watɗa mbi sḛ zi,
le swaga ndwara pisil ge mbi ne ka ɓyare na,
Saŋge ya kaŋ ge sya mbi sḛ vo.
5 A ke kaŋzam ma,
a dol daŋ ma se,
naa ka zamma ne njotɗa.
Tukcuk a zá̰ ka̰l oyya go:
«Ɗage me digi, ga̰l ma,
Nṵsi me aŋ ɓiyaar ma ne pore pe!»
6 Ago Bageyal jya̰ mbi go:
«Mbo é ndu ge njole viya̰ pala,
na waage kaŋ ge na sḛ ma̰ kwar na ya.
7 Kadɗa nà kwa tisi ma ya azi zwal pus pore,
ko naa ndwarra kwara ma pal,
ko naa ndwarra jambal ma pal,
na hṵ na haŋgal se, na ndi nama kwaɗa.»
8 Bage ne njole viya̰ pala ndage na ka̰l oyya go:
«Bageyal, ndi gyala ge ma̰ no, mbi ka swaga njole swaga go,
ɗaal ge ma̰ no mwaɗak me, mbi ka swaga ndil swaga go.
9 Ndi, kaŋ ge ne mbo ya no:
Ndu a̰me ka ya pus pore ge,
tisi ma azi a ne zwal na go.
Ndu mbe ndage na ka̰l oyya go:
‹Babilon detɗa go, Babilon detɗa go!
Kḭḭm ge na dok ne ma ɓá ya se rerege,
a kanna suwar zi.›»
10 Mbi ɓase ma, aŋ ge a ne pó aŋ
dimma ne naa ne pot swara ne tandal pot swara go go ma,
no a fare ge mbi ne zá̰ na ne Bage ɗiŋnedin
Bage naa ge mbal pore ma ne, Dok ge Israyela ne ta ne,
Mbi Waage aŋ na no.
Mḛreya ge suwal Duma ne
11 Mḛreya ge suwal Duma ne.
Ne njal Seyir pal ya, ka̰l oy mbi ya go:
«Bage koyya, ɗaal gyana ɗaa?
Bage koyya, ɗaal gyana ɗaa?»
12 Bage koyya gwan ne janna go:
«Swaga ko̰y ja, ɗaal gá gwan’a ne,
Kadɗa aŋ da ne fare ge eleya,
gwa̰ me ya dam ge ɗogle go.»
Mḛreya ge suwal Arab ne
13 Mḛreya ge suwal Arab ne.
Aŋ ge ne an mbo ke tujar ne jambal ge suwal Dedan ne ma!
Aŋ mbo mbo dwam ful pul ge suwal Arab ne zi.
14 Aŋ ge ne ka ne suwal tema go ma,
Sya me ne mam
ge naa ge ne su ne mam njuwal ma ndwara zi,
sya me ne kaŋzam
ge naa ge ne sya baale ma ndwara zi.
15 Ago a sya kasagar ndwara zḛ,
ge kasagar swala ndwara zḛ,
ge kajamle mwaɗeya ndwara zḛ
ge pore terseya ndwara zḛ.