Mḛreya ge suwal Masar ne
19
1 Mḛreya ge suwal Masar ne.Ndi Bage ɗiŋnedin ndé ja ge pḭr ge ne kwal so avun cap pal,
dok ge suwal Masar ne ma abe ya ndatɗa rarag na ndwara zḛ,
Masar ma dulwak kunna ɓat.
2 Bage ɗiŋnedin jan ne:
«Mbi mbo par fare masar ma ta buwal zi,
ná vya ma mbo mbal ta pore ta buwal zi,
kondore ma ta buwal zi,
suwal ma ta buwal zi,
muluk ma ta buwal zi.
3 Masar ma pala mbo ban,
mbi mbo kucigi nama pala digi,
a mbo mbo ele fare pe bama kaŋ sḭḭm ma ta,
ne naa ge ne jan fare ne sya ma ta,
ne naa ge ne e waɗal ma ta.
4 Mbi mbo sot suwal Masar ge gan ge pala ndaar tok go,
gan ge dulwak sone mbo ke muluk nama pal.»
Ka̰l ge Bage ɗiŋnedin, Bage naa ge mbal pore ma ne.
5 Maŋgaɗam ga̰l yuwam mbo fya̰,
Maŋgaɗam mbo fya̰ ne ná pul se.
6 Maŋgaɗam ge suwal Masar ne tok ma mbo hat huri,
a mbo fya̰ ya se, nama pul ma mbo fya̰ digi.
Kereŋ ma ne teer mbo looɗe.
7 Sugur ge ne don ne maŋgaɗam wak go ma,
ko ge ne mam pe ga̰a̰r go ma,
ko kaŋ ge a ne gar nama ne maŋgaɗam daŋgay go ma,
a mbo fya̰, saam mbo abe nama,
a̰me mbo gá to.
8 Naa ge swat soso ma mbo gá sun ta,
Naa ge hul kwa ma mbo wan kḭḭmi,
Naa ge hul kool ma mbo gá a̰seya.
9 Naa ge ne ke ba̰r ɓoso lin temel ma saaso mbo wan nama,
naa zaab ge ne nṵsi ɓoso ma,
ne naa sonmo ge ne ol na ma nama sḛ ma iyalla tiliŋ.
10 Naa ga̰l ge ne suwal diŋ ma sḛ su ya se leɗet,
Naa ge ke temel ma sḛ iyalla tiliŋ.
11 Ga̰l ge ne suwal Sowan go ma gá ya be kwar fare,
Faraon naa ga̰l ge yuwaleya ma saŋge ya dale.
Te gyana aŋ ba ka jan Faraon go:
«I naa ge zwama ma vya ma ne,
i gan ge zaŋgal ma vya ma ne!»
12 Mo naa ge zwama mbe ma ya da ɗaa?
Nama waage mo kaŋ ge Bage ɗiŋnedin,
Bage naa ge mbal pore ma ne, ne vḭ tene ke suwal Masar,
mo ba kat ne na kwarra.
13 Ga̰l ge suwal Sahon ne ma saŋge ya daal,
ga̰l ge suwal Memfis ne ma pala kucigi ya digi,
nama ge ne ka ɗame suwal Masar ma a gá ya ya̰me na.
14 Bage ɗiŋnedin teme o̰yom ge muliya nama zi,
A gá ya muli masar ma nama kaŋ kerra ma zi pet,
dimma ne ndu ge fereya ne muli na kuur pal go.
15 Ndu a̰me ge ke temel ne suwal Masar pe to,
ko pala ma ne pesa̰l ma,
ko uwara tok ma ne teer ge ne koo se ma.
Gwanna ge masar ma ne ya Dok ta
16 Dam mbe go, masar ma mbo kat dimma ne naa zaab ma go baŋ, a mbo ka ndatɗa vo rarag, swaga ge Bage ɗiŋnedin Bage naa ge mbal pore ma ne, ne mbo ɗage ja ke nama ho̰l go. 17 Suwal Masar mbo gá sya suwal Yuda vo, a mbo ka ndatɗa swaga ge a ne tol na dḭl ya gagak nama togor zi go, ne kaŋ ge Bage ɗiŋnedin Bage naa ge mbal pore ma ne ne vḭ tene ke nama pe.
18 Dam mbe go, suwal ma anuwa̰y ge suwal Masar ne ma mbo ga far wak ibriniya, a mbo gá guni ta ne dḭl ge Bage ɗiŋnedin, Bage naa ge mbal pore ma ne. A mbo tol suwal a̰me ɗu dḭl Ir-Haheresa.
19 Dam mbe go, a mbo ɗur twal tuwaleya ne Bage ɗiŋnedin pe ge suwal Masar tuŋsi go ŋga. Ge na suwal warbe go me, a mbo sin njal ma dusiya digi ne Bage ɗiŋnedin pe. 20 Kaŋ mbe ma no, a mbo kat kaŋ sayda ge ne ŋgay go, Bage ɗiŋnedin, Bage naa ge mbal pore ma ne, ya suwal Masar go. Swaga ge Masar ma naa ge ho̰l ma ne mbo ɗage ja ke nama yál, a tol Bage ɗiŋnedin, Bage ɗiŋnedin mbo teme nama bage máya ya ndwara ɗaŋge nama pe, ne zur nama. 21 Bage ɗiŋnedin mbo dyan tene masar ma ta, nama sḛ ma mbo kwar na tyatyat dam mbe go. A mbo ke na temel mo̰r, a mbo ka tyare na bama tuwaleya ma ne bama bobo ma. A mbo ka ke wak tuli Bage ɗiŋnedin ndwara se, a ka wi bama wak tuli ma wak me. 22 Swaga ge Bage ɗiŋnedin ne mbo mḛre masar ma ya, na sḛ mbo zon nama. Nama sḛ ma mbo gwanna na ta, mbo za̰ nama kaɗeya ma, mbo zon nama me.
23 Dam mbe go, viya̰ mbo dol ne suwal Masar go mbo suwal Asiriya. Asiriya ma mbo ka mbo suwal Masar ya, Masar ma ka mbo Asiriya ya me. Dagre, a mbo ke temel mo̰r hon Bage ɗiŋnedin.
24 Dam mbe go, suwal Israyela mbo kat suwal ge ataa, ɓanna dagre ne suwal Masar ma ne Asiriya, no mbo kat kaŋ ge ne ŋgay go Bage ɗiŋnedin é na wak busu ya suwar pal pet. 25 Bage ɗiŋnedin, Bage naa ge mbal pore ma ne mbo, mbo é na wak busu go: «Wak busu na ka suwal Masar, mbi ɓase ma pal, ne Asiriya, na ge mbi ne ke na ne mbi tok zi pal, ne suwal Israyela, ge mbi joo pal me.»