Asiriya ma mbo pál suwal Yuda
8
1 Bage ɗiŋnedin jan mbi go: «He gwal ge ga̰l a̰me ɗu, mo njaŋge kaŋ na go ne syala: Maher-Chalal-Has-Baza.» 2 Ne mbi sayda pe, mbi abe naa ge mbyatɗa tap ma azi: Bage tuwaleya Uriya ma ne Zakariya ge Yeberekiya vya. 3 Go̰r go, mbi ɓan ne mbi gwale, na ge anabi, her emel, tol vya son. Bage ɗiŋnedin jan mbi go: «Ho̰ na dḭl Maher-Chalal-Has-Baz. 4 Tek ge go vya jyale de ya tol na bá ‹Báá›, ne ná ‹náá›, a mbo pál suwal Damas ma ne suwal Samariya kaŋ ma mbo hon gan ge Asiriya ma ne.»Asiriya ma mbo ame suwal
5 Bage ɗiŋnedin gwan jan mbi go uwale:
6 Ne jo̰ ɓase mbe ma sḛ mam Silowe ge ne sor so̰o̰l jajyan sen,
nama sḛ ke tuli da ne gan Resin ma ne Remaliya vya pe,
7 ne pe no, Bageyal mbo e maŋgaɗam ge ga̰l,
ge so̰o̰l gḛ sululi ya nama pal,
ndwara go Asiriya ma gan ne na pool ma mwaɗak.
Mbo eme digi, mbo hal na swaga ma go pet.
8 Mbo hal mbo suwal Yuda ya,
mbo ame na, mbo ba̰le swaga,
mbo wan na na ka̰l zi syal.
Na halla mbo ame swaga mbo kaal,
mbo ame mo suwal pet, O Immanu-Elb!
Dok da ne nee
9 Ɓase ma, vwa me aŋ wak ya digi,
vo mbo wan aŋ!
Aŋ pet, so me aŋ togor,
aŋ ge ne suwal ge kaal ya ma.
Vwa me aŋ pul,
amma vo mbo wan aŋ.
Vwa me aŋ pul,
amma vo mbo wan aŋ.
10 Nṵsi me ta ne aŋ dwatɗa ma,
a mbo det uzi baŋ.
Só me aŋ wak ma se yayak,
a mbo ke fare a̰me to.
Ago Dok ya go poseya ne i.
Sya me Bage ɗiŋnedin vo ɗeŋgo
11 Swaga ge Bage ɗiŋnedin ne wa̰ mbi na tok zi,
jya̰ mbi go, na kaage mbi
bole naa mbe ma kaŋ kerra ma to.
Jya̰ mbi go uwale:
12 Kaŋ ge ɓase mbe ma ne tol na «vwal wak ndu pal»,
tó me na «vwal wak ndu pal» to.
Kaŋ ge a ne sya na vo, sya me na vo to,
ŋgwabe me ta to.
13 Aŋ mbo ndil Bage ɗiŋnedin,
Bage naa ge mbal pore ma ne mbegeya ɗeŋgo,
sya me na vo,
ŋgwabe me ta na ndwara se ɗeŋgo.
14 Ne suwal ge Israyela ne ma pe jwak,
na sḛ mbo kat swaga ge mbegeya ne nama pe,
ne njal syal koo, ne ŋgoy ge ne e naa detɗa.
Mbo kat boy, ko faɗe ne naa ge
ne suwal Ursalima diŋ ma pe.
15 Naa gḛ koo mbo syal, a det, a hal ta na pal.
A mbo wan ta ne faɗe, a wan nama.
Da̰reya, ne jobreya ge anabi ne
16 Vwa fare janna mbe no digi,
fé eya mbe no digi,
mbi mbo e na kwarra mbi naa ge hateya ma buwal zi.
17 Mbi é mbi jobreya Bage ɗiŋnedin pal,
na ge ne cigi na ndwara uzi ne pehir ge Yakub ne pal,
Mbi é mbi saareya ya na pal.
18 Ndi, i ne mbi vya ge Bage ɗiŋnedin ne ho̰ mbi ma,
i gá kaŋ ŋgayya ma ne kaŋ ajab ma suwal Israyela go,
ne Bage ɗiŋnedin, Bage naa ge mbal pore ma ne,
na ge ne ka ne njal Siyona pala digi ta.
19 Kadɗa a jan aŋ ya go: «Mbo me ɓyare fare
pe ge naa ge ne jan fare ne siya ma ta,
ne naa ge é waɗal ma ta,
nama ge a ne emse bama wak,
ne tun fare janna bama duwa̰r zi ma ta.
Te be ne na viya̰ go, ge naa ɓyare fare pe bama dok ma ta,
ko naa jan fare ne siya ma to’a?»
20 Gwa̰ me ne nama janna go:
«A golgo ndu gwan ne na pala eya ma ne hateya ma ge
Dok ne pe se!»
Kadɗa a jan fare mbe go to,
swaga mbo ko̰y nama pal to.
Yál njotɗa ge ɓase ma ne
21 A mbo wat zum ne bama suwal diŋ
ge yál njotɗa ma ne kyamal zi.
Kyamal leeɗeya ge nama ne zi,
a mbo ka vḛne bama wak bama gan ma ne bama Dok pal.
A mbo her bama ndwara fa̰ ma digi,
22 a ka ndil suwar ne se me.
A mbo kwa yál njotɗa ma ne tṵ,
ne haŋle ma, ne laar pisil ma,
naa mbo wat tṵ ge ɗeɗek zi.
Kwaya̰l mbo dyan ya zum
23 Go no puy ɗe, suwal ge ne ka yál zi ma
mbo gá tṵ mbe zi baba to.
Ago, kadɗa dam ma ge hṵsi ma zi ya,
Dok é suwal Zabulon ma ne suwal Neftali wat saaso zi puy ɗe,
dam ma mbo ya go, viya̰ ge ne maŋgaɗam ga̰l yuwam wak go ma,
ne maŋgaɗam Urdun le ge ham ge ma,
ne suwal ge pehir ge ɗogle ma ne ma,
mbo ŋgoy nama ne hormo.