Isaya waage gan Ahaz ka̰l ge Dok ne
7
1 Dam ma ge Ahaz ge Yotam vya, ge Ozias baŋ ne ka gan suwal Yuda ne go, Resin gan ge Siriya ma ne ɓanna ne Peka ge Remaliya vya, gan ge Israyela ne, a mbo ya ndwara det suwal Ursalima pore mballa, amma a day ge det na to. 2 A mbo ya waage gan na ge ne hir ge Dawda ne zi go: «Siriya ma ɗage pore ja, a ka ya suwal Efrayim go.» Swaga ge gan Ahaz ma ne na naa ma ne za̰ fare mbe ɗe, a abe ndatɗa rarag dimma ne saam ne mwase uwara ma ne murum zi go.3 Bage ɗiŋnedin jan Isaya go: «Aŋ ne mo vya Cheyar-Yachuba, aŋ mbo ɓol Ahaz, ndwala ge a̰a̰l wak ya, na ge ne viya̰ gaaso ge naa ge usi ba̰r ma ne ya. 4 Jya̰ na go: ‹E mo haŋgal se, kaage mo sya vo to. Iigi tene ge pore juliliya ge Resin ge Siriya, ma ne Remaliya vya ndwara zḛ to. Ago nama sḛ ma uwara pe ge ne gá ɗusiya ne baŋ. 5 Ne jo̰ Siriya ma poseya ne suwal Efrayim, ne Remaliya vya, a vḭ ta ke mo sone, ne janna go: 6 Mbo me nee mbo det Yuda pore, ho̰ me nee na vo, ame me nee na suwal, nee ba e na mbo ya nee pe go, nee ba e Tabeel vya gan na pal.› 7 Bageyal Bage ɗiŋnedin jan go:
Ho̰l mbe mbo fut digi to, mbo ke to.
8 Ago Damas a suwal ga̰l ge Siriya ne ne,
Resin me a gan ge suwal Damas ne ne.
Del ma ta wara myanaŋgal para anuwa̰y
suwal Efrayim mbo burmi uzi,
na naa ma mbo gwan kat to.
9 Samariya a suwal ga̰l ge Efrayim ne ne,
Remaliya vya me a gan ge suwal Samariya ne ne.
Kadɗa aŋ e aŋ saareya Dok pal to,
aŋ mbo mḛ to.»
Tolla ge Immanu-El ne
10 Uwale, Bage ɗiŋnedin gwan jan Ahaz go: 11 «Ele Bage ɗiŋnedin Dok ge mo ne kaŋ ŋgayya a̰me ɗu ne mo pe. Ele na kaŋ a̰me ge ne siya ma taal se ya, ko ge ne digi zi ya.» 12 Ahaz gwan ne janna go: «Mbi ele a̰me to, mbi he Bage ɗiŋnedin pe to.»
13 Isaya gwan ne na janna go: «Za̰ me, pehir ge Dawda ne ma! Lwage naa dasana ma ne aŋ ta ŋgeɗo ɗo, aŋ gwan ɓyare lwage Dok ge mbi ne no ɗaa? 14 Ne pe no ɗe, Bageyal sḛ ne na pala mbo hon aŋ kaŋ ŋgayya a̰me: Ndi vya gwale da ne emel, mbo tol vya son, mbo tol na dḭl Immanu-Elb. 15 Na sḛ mbo ka zam pam dwamma ma ne daaram ɗiŋ detɗa kuri sone, tal kwaɗa kerra go. 16 Amma zḛ ge go vya mbe na kuri sone, na tá kwaɗa kerra ɗe, gan ge azi ge mo ne sya nama vo mbe ma no, naa mbo gwan kat nama suwal ma go to. 17 Ago Bage ɗiŋnedin mbo her dam a̰me ɗu ya ne aŋ ne mo naa ma, ne mo pehir ma pe. Dam mbe mbo kat dam ge ndu a̰me ne kwa na ɗu to ne swaga ge suwal Israyela ma ne suwal Yuda ne varse ta se go day.» Gan ge Asiriya ne.
Detɗa ge suwal ne
18 Dam mbe go,
Bage ɗiŋnedin mbo fyage na wak tol,
susu ma ne mam pe ga̰a̰r ge suwal Masar ne ya,
poseya ne daaram ma ge suwal Asiriya ya.
19 A mbo mbo ya katɗa baal pul ma se,
ne njal pṵṵl ma zi,
uwara vya ge kḭso ge rurub ma,
ne babur ma pul go.
20 Dam mbe go,
Bageyal mbo sot aŋ pala susu ma,
ne aŋ swaga ge susu ma,
ne aŋ duwa̰r pe susu ma
ne soy ge na ne gobe na ne maŋgaɗam Efrata le may ya,
ndwara go ne gan ge Asiriya ma ne tok ya.
21 Dam mbe go,
ndu ge daage mbo wal nday kale ɗu, ne gii ma azi.
22 Nama pam ma mbo kat gḛ,
a mbo ka zam pam dwamma ma.
Ago nama ge ne mbo gá ya ne ndwara suwal diŋ ma,
a mbo gá zam pam dwamma ma ne daaram.
23 Dam mbe go dḛ uwale,
gaaso ge oyo̰r ne na zi pe dubu ɗu
na ge na yé bware sile dubu ɗu,
mbo gá kore ma ne gumi ma zi.
24 Naa mbo mbo ne kajamle ma ya na diŋ,
suwal mwaɗak mbo gá kore ma ne sugur ge sone ma kaŋ.
25 Njal pala ma ge a dḛ ne ka gar nama ne sa̰a̰l ma,
ndu mbo gwan mbo nama go to,
ne kore ma ne sugur ge sone ma pe.
Nday ma ne gii ma mbo gá zam zàm nama go ne.