Kaŋ mballa ge gaaso oyo̰r ge Bage ɗiŋnedin ne
5
1 Ya̰ mbi mbá kaŋ ne mbi kondore pe, mbi mbá kaŋ ne mbi kondore ma ne na gaaso ge oyo̰r ne pe.Mbi kondore ka ne gaaso oyo̰r
ge njal kiya̰r swaga num go.
2 Nṵsi na gaaso pul,
abe njal ma ne na go uzi no,
ɗḭ oyo̰r ge siŋli ma na zi no,
ɗḭ acagɗa ge koy na no,
á tuul ge ɓerse oyo̰r jiya̰l na zi no me.
Ka saare go na oyo̰r mbo tol kwaɗa
amma na oyo̰r mbe tó sone.
3 Se no ɗe, naa ge Ursalima ne ma,
naa ge suwal Yuda ne ma,
kṵ me i ne mbi gaaso oyo̰r fare buwal.
4 A ma kaŋ ge mbi te ya ke ne mbi oyo̰r pe ɗo,
mbi ke na to no ɗaa?
Mbi ka saare go mbi oyo̰r tó kwaɗa,
kyaɗa ba tol oyo̰r ge sone ma ɗaa?
5 Se no, mbi ɓyare ŋgay aŋ
kaŋ ge mbi ma̰ mbo ke ya ne mbi oyo̰r:
mbi mbo ndage kaŋ ge mbi ne kole na se uzi,
kavaar ma mbo zam na.
Mbi mbo gul na gulum ge ne ve na se uzi,
naa mbo dol viya̰ na pul zi.
6 Mbi mbo ya̰ na se suli,
ndu mbo gwan ɗaɗe na,
ko ke na pyaso to,
kore ma ne sugur ge sone ma
mbo gá donna na pul zi.
Mbi mbo tele pḭr na swa mam ya na pal to.
7 Ago gaaso oyo̰r ge Bage ɗiŋnedin,
Bage naa ge mbal pore ma ne, a hir ge Israyela ne,
oyo̰r ge na laar ne wa̰ na, a naa ge Yuda ma,
ka jobre kaŋ kerra ge jwap ne nama ta,
amma a be ka mbo eya ma pal to.
Ka jobre go nama ke fare ge dosol,
amma a ka̰l yo̰re ta ma ne.
Wak vḛneya ma ga̰l ge suwal Yuda ne ma pal
8 Woo ge aŋ ne! Aŋ ge ne tat yàl ma ta wak go,
aŋ ka tat gaaso ma ta wak go me.
Aŋ ame swaga ya mwaɗak.
Aŋ ga ne suwal pal ne ɗeŋgo.
9 Bage ɗiŋnedin, Bage naa ge mbal pore ma ne jya̰ mbi go:
«A ŋgat, zok ge ɓase mbe ma no,
a mbo gá pṵṵl,
zok ge ɓaŋlaŋ ne siŋli mbe ma no,
ndu mbo gwan kat nama zi to.
10 Ago gaaso oyo̰r táál ataa,
mbo mbyat ge hon oyo̰r jiya̰l litre wara anuwa̰y to,
swara hir kaŋ pul wol,
mbo mbyat syat ya digi kaŋ pul ɗu to.»
11 Woo ge aŋ ne!
Aŋ ge ne kun cya̰wak vḛ mbo ɓyare jiya̰l pe njotɗa ma.
Aŋ ge ne kat ɗiŋ ɗaal zi, ndwara fere ta ne oyo̰r jiya̰l ma.
12 Aŋ fere ne oyo̰r jiya̰l,
aŋ ka ke vḛso ne biliŋ ma,
ne ŋgeleŋ ma, ne gaŋga ma, ne gal sunna ma,
aŋ vyale go Bage ɗiŋnedin ke kaŋ ma ya go,
aŋ kwar na kaŋ ge ne ke ma to.
13 Ne pe no, a mbo pál mbi ɓase ma mbo mo̰r zi,
ne a ne kuri kwarra pe.
Kyamal mbo hun nama ga̰l ge hormo ma,
mam njuwal mbo hun ɓase ma me.
14 Go no, tuul ge siya ma ne mbo hage na wak,
mbo a̰le na wak se tyatyat,
mbo uɗi ga̰l ma poseya ne ɓase ma na pul zi kucup
nama vḛso a̰yya zi.
15 Go no me, naa dasana ma pala mbo gwan’a zi,
naa ge jegreya ma pala mbo cwage se.
16 Bage ɗiŋnedin, Bage naa ge mbal pore ma ne
mbo ŋgay pool ge na ne sarya kunna ge na ne zi,
Dok ge mbegeya mbo ŋgay mbegeya ge na ne na dosol zi.
17 Ge joo ma pal,
tame ma mbo gá zam zám dimma ne bama swaga zàm go go,
ɓiya̰ ge so̰o̰l ma mbo gá zám zàm swaga mbe ma go me.
18 Woo ge aŋ ne! Aŋ ge ne zwal ya̰l aŋ pe go
ne táál ge hale ne ma,
aŋ ge ne zwal sone aŋ pe go dimma ne naa ne zwal pus go ma.
19 Aŋ jan go:
«Dok há tene ya digi avun cap ke kaŋ ge na ne ɓyare kerra
ne da pe i ba kwar na,
Bage mbegeya ge Israyela ne, na mbo ya avun cap wi kaŋ ge na ne dwa kerra ma wak
ne da pe i ba kwar na gale.»
20 Woo ge aŋ ne!
Aŋ ge ne tol kwaɗa sone, sone kwaɗa ma,
aŋ ge ne ndil kwaya̰l tṵ, tṵ kwaya̰l ma,
aŋ ge ne saŋge kaŋ ge zwala tuli, kaŋ ge tuli zwala ma.
21 Woo ge aŋ ne!
Aŋ ge ne ndil ta naa ge zwama ma,
ne naa ge kwar fare ma.
22 Woo ge aŋ ne!
Aŋ ge ne pate ta oyo̰r jiya̰l ta njotɗa ma,
aŋ ge ne hole ne jiya̰l ge pore ma kirgiya njotɗa ma.
23 Aŋ ge ne kan naa ge sone ma digi suli
swaga ge a ne lwaɗe aŋ wak go,
aŋ ka kuri naa ge dosol ma fare nama dosol pal.
Mḛreya ge Bage ɗiŋnedin ne
24 Ne pe no, aŋ mbo til uzi dimma ne ol ne ɗaabe dṵso go,
ko dimma ne ol ne til sugur go.
Ago aŋ too ma mbo hubi uzi,
aŋ wak ɓoyya mbo kan suwar zi uzi, ne da pe aŋ ndi eya
ge Bage ɗiŋnedin, Bage ge naa ge mbal pore ma ne kaŋ senna.
Aŋ sḛ́ fare janna ge Bage mbegeya ge Israyela ne sen.
25 Ne pe no, laar ol ge Bage ɗiŋnedin ne
ɗage ja digi bilu na ɓase ma pal.
He na tok ja nama ndwara zi mḛre nama.
Swaga mbe go njal ma ka saaseya,
siya ma ga ya kanna njinjik viya̰ ma go dimma ne gubupala go.
Go no puy ɗe,
Bage ɗiŋnedin laar gale be iyal to,
gale ya swaga mḛreya go ba.
26 Bage ɗiŋnedin e kaŋ sayda
ne pehir ge ɗogle ma ge ne swaga kaal ya ma pe.
Ka kuugi tol naa ge ne suwar pe ndegɗe ya ma.
Nama sḛ ma a har ta mborra ja digi avun cap.
27 Ne nama ge ne mbo ya ma buwal zi,
ndu a̰me ɗu be tyane to,
ndu a̰me ɗu koo be syal to me.
Ndu a̰me ɗu be mbwat dam to,
ndu a̰me ɗu be fí dam to me.
Ndu a̰me ɗu bit be sá ne na pul go to,
ndu a̰me ɗu tyarko taal be syat ne na koo zi to me.
28 Nama kajamle ma wak ma fyá fyar,
nama kajamle ma pul ma wa̰ wan,
nama tisi ma koo gwap ma dimma ne njal ɓaar go,
nama pus pore ma jare so dimma ne kurum ne he go.
29 Nama sḛ ma pyan da ne sonne ne pyan go,
a pyan da ne sonne bool ma ne pyan go,
a pyan, a wan kaŋ, a mbo ne na,
ndu a̰me ge harge na ne nama tok go to.
30 Dam mbe go, Dok mbo ba̰y dimma ne
maŋgaɗam ga̰l yuwam sḭḭl ne iigi potɗa go,
tṵ mbo sebe suwar pal, naa mbo kat kḭḭmi zi,
pḭr mbo sebe swaga se tṵ ɗiglim.