4
1 Dam mbe go dḛ, naa zaab ma ɓyalar a mbo ɓan obe ge ɗu pe zi, a mbo jan na go:«Vḭ, i ka mo pe zi, ndage saaso ne i pal uzi.
Ago i sḛ ma wal ta ne, i ɓyare i kaŋ lar pe ma ne me.»
Bage ɗiŋnedin mbo ɓur naa mbut
2 Dam mbe go, Bage ɗiŋnedin mbo e kaŋ ge dore ne ge hormo pyarra digi, kaŋ ge suwar ne mbo don na ya mbo e Israyela vya ge ne gá ma ke laar saal ne ɓol hormo. 3 Naa ge ne gá Siyona go ma, nama ge ne gá ne ndwara Ursalima go ma, a mbo tol nama naa ge mbegeya ma. Pet a naa ge a ne njaŋge nama dḭl Ursalima go ne da pe nama ka ne ndwara ma ne. 4 Swaga ge Bageyal ne mbo usi ya̰l ge Siyona vya gwale ma ne ya, ne hat Ursalima harcal ne swama ge a ne ka̰ na na diŋ ya, ne na o̰yom ge kun sarya, ne o̰yom ge ne til swaga ya, 5 gyala, mbo kulbi njal Siyona ma ne naa ge ne kote ya ma pala se mwaɗak ne pḭr, ɗaal me, ol mbo ka ɗaabe zenna nama pal. Hormo ge Bage ɗiŋnedin ne mbo kulbi kaŋ ma pal pet. 6 Mbo kat dimma ne gur ge a ne lá na ne gaar ge ne hon naa soŋgoy swaga ge gyala ne det go go, ne swaga woy ta mam swarra ma, ne mam ge ne swar ne saam potɗa ndwara zḛ go me.