Kwaɗa ge Dok ne ɓaŋlaŋ
36
1 Ne naa ge mbal kaŋ ma ga̰l pe: Kaŋ mballa ge Dawda, dore ge Bage ɗiŋnedin ne.
2 Mbi saare fare janna ge sone ma ge ndu ge sone ne pal,
ne na ndwara zi, sya Dok vo a be a̰me pe ne to.
3 Jegreya ge na ne zi, kwa sone ge na ne to,
go no, ndil na kaŋ senna to me.
4 Fare ge ne ndage ne na wak zi,
a fare ge ya̰l ma ne fare ge hale ma,
dwatɗa ge jwap, ne fare ge kwaɗa ne na zi to.
5 Dwat ya̰l kerra na swaga fiya go,
her viya̰ pul ge dosol to,
abe tene uzi ne sone ta to.
6 O Bage ɗiŋnedin, kwar a̰se ge mo ne mbo ɗiŋ digi zi ya,
fareba ge mo ne mbo ɗiŋ pḭr zi ya.
7 Dosol ge mo ne a mḛya girmim ne njal ge ɓaŋlaŋ go,
wak yuwaleya ge mo ne a ɗugul helek.
O Bage ɗiŋnedin, mo má naa dasana ma ne kavaar ma.
8 O Dok, kwar a̰se ge mo ne a siŋli ge be to!
Naa dasana ma woy ta mo fápul zi.
9 Mo huri nama ne kaŋ kwaɗa ge ne mo diŋ ma,
mo ka hon nama maŋgaɗam ge mo ne ge tuli njotɗa.
10 Ago mam ge ndwara ya mo ta,
i kwar kwaya̰l da ne mo kwaya̰l ta.
11 Koy kwa a̰se ge mo ne ge naa ge ne kwa mo ma ta,
dosol ge mo ne ge naa ge dulwak peɗem ma ta.
12 Ya̰ naa ge jegreya ma koo tá ya mbi ta to,
ya̰ naa ge sone ma yan mbi pe to.
13 Ndi, naa ge ne ke ya̰l ma det go go,
a det se, nama pool ge gwan ɗage digi to.