Hó mo laar ne zam zḛ ge naa ge sone ma ne pe to
37
1 Ge Dawda ne.
Hó mo laar naa ge sone ma pal to,
ke yil ne naa ge ya̰l ma pe to.
2 Ago, a mbo looɗe avun cap dimma ne sugur go,
a mbo ho̰me dimma ne sugur twagal go.
3 É mo jobreya Bage ɗiŋnedin pal,
ke fare ge jwap,
go no, mo mbo kat halas suwal diŋ.
4 Ke mo sḛ tuli Bage ɗiŋnedin zi,
na sḛ mbo hon mo kaŋ ge mo laar ne ɓyare.
5 E mo dwatɗa ma Bage ɗiŋnedin pal,
é mo jobreya ma na pal,
na sḛ mbo kwar kaŋ ge ke ne mo.
6 Mbo dyan dosol ge mo ne zum dimma ne kwaya̰l go,
fareba ge mo ne dimma ne gyala ne mḛ pala tat go.
7 Ka wak ɗamal Bage ɗiŋnedin ndwara se, jobre na.
Hó mo laar ge naa ge ne zam zḛ ma pal to,
ko naa ge ne ke fare ne son ma pal to.
8 Ya̰ pore, ka̰ laar ol uzi,
hó mo laar to, e mo ke sone.
9 Ago naa ge ke sone ma pe mbo pur uzi,
amma nama ge ne kan bama saareya Bage ɗiŋnedin pal ma,
a mbo ame suwal joo.
10 Ta ɓorom, ndu ge sone mbo ban uzi,
mo mbo ɓyare na pe na swaga go, mbo kat to bat.
11 Naa ge woɗegeya ma mbo ame suwal joo,
a mbo kat swaga halas.
12 Ndu ge sone kun fare ndu ge dosol pal,
ka non na wak na pal.
13 Bageyal ka cot tene ne na
ne da pe, kwa kwa go, na dam burmiya mbo ya go.
14 Naa ge sone ma pwat bama kasagar,
a ka nṵsi bama kajamle ma,
ndwara ban ndu ge woɗegeya ma ne ndu ge a̰se uzi,
ndwara hun naa ge ɗeŋger ma uzi.
15 Amma nama kasagar ma mbo saŋge gor nama,
nama kajamle ma mbo hal ta uzi.
16 Kaŋ ŋgeɗo ge ndu ge dosol ne golgo
waɗe kaŋ njwanjway ma ge naa ge sone ma ne.
17 Ago naa ge sone ma pool mbo á,
amma Bage ɗiŋnedin mbyale naa ge dosol ma mbyale.
18 Bage ɗiŋnedin kwa dam ge naa ge ɗeŋger ma ne kwa,
nama joo mbo kat ɗiŋnedin.
19 Swaga yál ma zi, saaso mbo ke nama to,
dam kyamal ma zi, a mbo kat huriya.
20 Amma naa ge sone ma mbo ban uzi,
naa ge ho̰l ge Bage ɗiŋnedin ne ma mbo ho̰me uzi dimma ne zám go,
a mbo ɗaabe uzi.
21 Ndu ge sone ame wul, gwan ne na potɗa digi to,
Ndu ge dosol kwa naa a̰se, kat wí me.
22 Naa ge Dok ne é nama na wak busu ma, a mbo ame suwal joo,
amma naa ge Dok ne vḛne na wak nama pal ma, a mbo burmi uzi.
23 Bage ɗiŋnedin sirsi ndu dasana koo mborra ne,
kadɗa na viya̰ mborra kwaɗa na ndwara zi.
24 Ko na dé se, gá suwar se to,
ago Bage ɗiŋnedin wan na tok digi wan.
25 Mbi ka bool, ndi, mbi ne sabe ya no,
mbi be kwa a dol ndu ge dosol uzi to,
ko na vya ma gá kaɗe kaŋ zam buwal go to.
26 Dam ma mwaɗak na sḛ ke naa kwaɗa, ka hon naa wul,
na vya ma ɓol wak busu.
27 Abe tene uzi ne sone ta, ke kwaɗa,
go no, mo mbo ke kaal tata.
28 Ago Bage ɗiŋnedin laar wa̰ fare ge jwap,
dol na naa ge dosol ma uzi to.
Koy nama koy ɗaɗak,
amma naa ge sone ma vya ma mbo ban uzi.
29 Naa ge dosol ma mbo ame suwal joo,
a mbo gá kat na go ɗiŋnedin.
30 Ndu ge dosol wak jan fare ge zwama,
na ɗel far fare ge jwap.
31 Eya ge na Dok ne ya ge na dulwak zi,
na koo syal to bat.
32 Ndu ge sone huli ndu ge dosol,
ndwara ɓyare viya̰ ge hun na uzi.
33 Amma Bage ɗiŋnedin ya̰ ndu ge dosol na tok go to,
yá̰ a kṵ fare na pal swaga sarya go to.
34 Jobre Bage ɗiŋnedin, koy mborra na koo pul go,
na sḛ mbo her mo pala digi ndwara mo ame suwal joo,
mo mbo kwa naa ge sone ma ban uzi.
35 Mbi kwa ndu ge sone saŋge pool,
garge tene se dimma ne uwara ne rubi go.
36 Mbi gwa̰ ya kaleya swaga mbe go, ne go to.
Mbi ɓyare na pe, amma mbi be ɓol na to bat.
37 Dó mo ndwara ndu ge ɗeŋger ta,
ndi ndu ge dosol,
mo mbo kwa go ndu hir ge go mbe no ɓol swaga katɗa ge tuli.
38 Amma naa ge ya̰l ma pe burmi uzi kucup,
naa ge sone ma pe mbo ban uzi.
39 Naa ge dosol ma ɓol máya da ne Bage ɗiŋnedin ta,
na sḛ nama swaga woy ta dam ge yál ma zi ne.
40 Bage ɗiŋnedin sya nama ko̰r ne,
ka pwat nama ya uzi,
ka pwat nama ya uzi ne naa ge sone ma tok go.
Má nama ne, ne da pe, a woy ta ya na zi.