Kaɗeya ge ndu ge a ne ke na yál ne
35
1 Ge Dawda ne
O Bage ɗiŋnedin, ke ho̰l ne naa ge ne ke mbi ho̰l ma,
Mbá pore ne naa ge ne mbal pore ne mbi ma.
2 Abe mo ɓiyaar ge jyale ma ne ge ga̰l digi,
ɗage digi sya mbi ko̰r!
3 Pyaɗe naa ge ne yan mbi pe ma ne mo ra̰y ma ne mo deŋso!
Jya̰ mbi go: «Mbi mo bage máya ne!»
4 Nama ge ne ɓyare hun mbi ma,
saaso wa̰ nama, nama pala gwa̰ se!
Nama ge ne dwat ke mbi yál ma,
nama gwa̰ ne go̰r pala cwageya se cugum.
5 Maleka ge Bage ɗiŋnedin ne na ya̰ nama pe!
Nama ka dimma ne mboor ge saam ne kwal na go!
6 Swaga ge maleka ge Bage ɗiŋnedin ne ne ya̰ nama pe go,
nama viya̰ pul na há targal ne tṵ ɗeɗek!
7 A á tuul woyya mbi ndwara zḛ baŋ ɗar,
a hú faɗe ndwara ban mbi o̰yom uzi baŋ ɗar.
8 Wak nonna dé nama pal be ge a wan na pe to,
faɗe ge nama sḛ ne hu na woyya, na wa̰ nama,
nama dé wak nonna zi.
9 Ago mbi sḛ mbo ke tuli Bage ɗiŋnedin zi,
mbi mbo ke laar saal ne mbi ne ɓó máya pe.
10 Mbi sḛ mwaɗak mbo jan go:
«O Bage ɗiŋnedin, a wuɗi mbya ne mo go ne ɗaa?
Mo zur ndu ge woɗegeya ne ndu ge ne waɗe na ne pool tok go,
mo má a̰se ma ne ndu ge taŋgay ne naa ge ne ke nama yál ma tok go.»
11 Naa ge ne ke sayda ge hale ma ɗage digi,
a ka ele mbi fare ge mbi ne wan nama pe to ma.
12 A gwan ne mbi sone kwaɗa ge mbi ne pal,
mbi gá ya hini ɗu.
13 Swaga ge a ne ka moy,
mbi ká̰ kasigir mbi ta,
mbi wa̰ kḭḭmi, mbi ka wan asiyam,
mbi ka dwage kaɗeya.
14 Mbi ka iigi tene dimma ne nama ne mbi ná vya, ko mbi kondore go,
mbi ka ke kḭḭmi, mbi duur su leɗet,
dimma ne mbi ne bá̰ mbi ná ge tolla go.
15 Swaga ge mbi ne dé, a ka ke laar saal,
a ka kote ta ya.
Naa ge giɗi ma kote ta ya mbi pal, be ge mbi wan pe to,
a ka kicigi mbi be ge wan ta to.
16 Ɓanna ne naa ge be kwa Dok to ma,
ne naa ge cot swaga ma,
a non bama wak mbi pal.
17 Bageyal, mo te ndil fare mbe go gyana ɗaa?
Pwa mbi ya uzi ne naa ge burmi naa mbe ma tok zi ya,
ɓu mbi ya uzi ne sonne mbe ma tok zi ya.
18 Mbi mbo uware mo ɓase ma gḛ ndwara se,
mbi mbo siya̰le mo naa ge pool ma buwal zi.
19 Naa ge a ne hat ta ya mbi naa ge ho̰l baŋ ɗar ma có ta ne mbi to,
nama ge ne kwane mbi baŋ ɗar ma nama ka kun nama ndwara mbi pe to.
20 A jan fare ge tuli to,
a sol fare ge hale ma ge naa ge kwaɗa ge ne suwal diŋ ma pal.
21 A beŋge bama wak ma mbi ta janna go:
«Waw, waw! I kwa na ne i ndwara!»
22 O Bage ɗiŋnedin, mo kwa kaŋ ge ne ke, ke wak ɗamal to!
Bageyal, abe tene uzi ya kaal ne mbi ta to!
23 Kore digi, ɗage digi, ŋgay dosol ge mbi ne!
Bageyal, Dok ge mbi ne, kwa mbi fare pe!
24 Bage ɗiŋnedin, Dok ge mbi ne, kṵ mbi fare buwal dosol ge mbi ne pal!
Ya̰ nama man mbi to!
25 Ya̰ nama jan ta go: «Waw, waw, no a i ɓyareya ne!» To.
Nama jya̰ go: «I lo̰me na ya uzi ya!» To.
26 Nama ge nama sḛ ne ke tuli ne mbi yál njotɗa pe ma,
saaso wa̰ nama, nama gá cwageya cugum.
Nama ge ne uware ta mbi pal ma,
saaso ka̰ nama pal, nama pala cwage se.
27 Nama ge ne ɓyare dosol ge mbi ne pe ma,
nama suwa̰le digi ne laar saal!
Nama ge ne ɓyare halas ge na dore ne pe ma,
nama ka janna ɗaɗak go: «Bage ɗiŋnedin a ɓaŋlaŋ!»
28 Mbi wak mbo ka waage dosol ge mo ne,
mbo ka uware mo dam ne dam.