Ester 5

Ester mbo ɓol gan

1 Swaga ge dam ge ataa ne mbya ɗe, Ester kan na ba̰r ge gan gwale ne na ta, mbo mḛ́ gan yapul ge zi ge go, ne gan zok wak ŋga. Gan ne katɗa na hool gan go, na zok gan zi, na ndwara ka zok wak go ŋga. 2 Swaga ge gan ndwara ne ka̰ ne na gwale Ester ne mḛya yapul go ɗe, kwa na gwale a̰se, tyare na na calaŋ plando ge dinar ge ne na tok go. Ester ndar tene ya na ta zi, tat calaŋ plando wak. 3 Gan jan na go: «Gan gwale Ester, a ma fare ne ɗaa? Mo ɓyare da ɗaa? Ko mo ɓyare mbi muluk le ɗu puy, mbi ma̰ hon mo na.» 4 Ester gwan ne na janna go: «Kadɗa gan vin vin, gan ma ne Haman mbo ya ma̰ no zam kaŋzam ge mbi ne ke ne na pe.» 5 Gan dol ndu mbo ɓyare Haman ya avun cap ndwara ke Ester fare janna pal. Gan ma ne Haman mbo zam kaŋzam ge Ester ne ke. 6 Swaga zam kaŋzam ne njot oyo̰r jiya̰l go, gan jan Ester go: «Mo ɓyare ma kaŋ ɗaa? Mbi má̰ hon mo na! Mo ɓyare da ɗaa? Ko mo ɓyare mbi muluk le ɗu puy, mbi má̰ hon mo na.» 7 Ester gwan ne na janna go: «Mbi eleya, mbi ɓyareya! 8 Kadɗa mbi dé gan ndwara zi kwaɗa, kadɗa gan vin vin hon mbi kaŋ ge mbi ne ele, ko ke mbi kaŋ ge mbi ne ɓyare ɗe, gan ma ne Haman mbo ya kwap zam kaŋzam ge mbi ne ke ne nama pe. Go no mbi ba jan mo kaŋ ge mbi ne ɓyare.»

Haman nṵsi uwara ne Murtukay pe pella

9 Dam mbe go, Haman wat ya zum ne laar saal, ne sḛ tuli ge be to. Swaga ge Haman ne kwa Murtukay ne gan zok wak go, be ɗage digi, ko be ge ndatɗa na ndwara se ɗe, Haman laar vḛne Murtukay pal. 10 Haman wan tene, mbo na diŋ ya. Dol temel mbo tol na kondore ma ne na gwale Zeres ya. 11 Haman wan nama na kaŋ gan ge hormo ma pe, ne ɓase ge na vya ma ne, ne ga̰l ge gan ne ho̰ na, ne eya ge gan ne é na ga̰l ma ne naa ga̰l ge temel ge gan ne ma pala digi pet me. 12 Haman gwan jan nama uwale go: «Gan gwale Ester tó mbi hini ɗu poseya ne gan mbo zam kaŋzam ge na ne ke. kwap uwale, gwan tol i ne gan ya go. 13 Kaŋ mbe ma no pet puy ɗe, a a̰me pe to ne mbi ta, kadɗa mbi kwa Murtukay, Yuda mbe no katɗa ya gan zok wak go.» 14 Na gwale Zeres ma ne na kondore ma pet a jan na go: «Nṵsi uwara haal tok pyaso ŋgayya wara anuwa̰y, kwap cya̰wak, jya̰ gan a pé Murtukay na ta digi. Go̰r go, aŋ ne gan ba gá mbo zam kaŋzam ne laar saal.» Fare mbe ke Haman sḛ tuli, nṵsi uwara mbe.