Ester 6

Hormo ge Murtukay ne, ne senna ge Haman ne

1 Ɗaal mbe no zi, ne jo̰ dam sya uzi ne gan ndwara zi ɗe, jan go a gene na maktub vot pala, maktub maana ma ya, a isi gan na. 2 A ɓol njaŋgeya ge maktub mbe zi go, Murtukay waage fare ge Bigtan ma ne Teres, ajibaŋ ge gan ne ma, naa ge koy viya̰ wak ma pal go, nama za̰ ta hun gan Zerses. 3 Gan jan go: «Ne kaŋ ge ne ke mbe no pe, a ma hormo ge ɓaŋlaŋ ge a ne ke Murtukay ne ɗaa?» Gan dore ma gwan ne na janna go: «A be ke na a̰me to.» 4 Gan ele swaga go: «A wuɗi ne yapul zum ne ɗaa?» Swaga mbe go, Haman ne watɗa ya gan yapul ge zum ge go. Ka mbo ya ndwara jan gan go, a pe Murtukay uwara ge na ne nṵsi ne na pe pala digi. 5 Gan dore ma jan na go: «A Haman ne yapul zum ne.» Gan jan go: «Na mbo ya.» 6 Haman mbo ya, gan ele na go: «A ke ne ndu ge gan ne ɓyare hon na hormo gyana ɗaa?» Haman jan na dulwak zi go: «A wuɗi ge gan ne ɓyare hon na hormo be ge mbi to ɗaa?» 7 Haman jan gan go: «Gan ɓyare hon ndu a̰me hormo’a? 8 Na ho̰ na ba̰r gan, na ho̰ na tisi ge gan ne ndwar ne na pal, na ho̰ na kadmul ge gan ne me. 9 A ho̰ ba̰r mbe ma ne tisi mbe ge ndu ga̰l a̰me ge gan ne tok go. A ka̰ ndu ge gan ne ɓyare hon na hormo mbe ba̰r mbe, a é ndu mbe ndwar tisi pal, a ka an ne na viya̰ ma go suwal diŋ ne oyya na ndwara zḛ go: ‹No a kaŋ ge a ne ke ne ndu ge gan ne ɓyare hon na hormo ne›.» 10 Gan jan Haman go: «Mbo avun cap abe ba̰r, ne wan tisi dimma ne mo ne jya̰ go. Ke ne Murtukay ge Yuda, na ge ne ka ne gan viya̰ wak pal mbe go no, kaage mo ya̰ fare ge mo ne jya̰ mbe no wak detɗa uzi go ŋgeɗo to bat.» 11 Haman abe ba̰r, wan tisi me, kan Murtukay ba̰r na ta, é na anna viya̰ ma go, suwal ɗiŋ ne oyya na ndwara zḛ go: «No a kaŋ ge a ne ke ne ndu ge gan ne ɓyare hon na hormo ne.»

12 Go̰r go, Murtukay gwan mbo kat gan zok wak pala ya, Haman har tene gwan di ne kḭḭmi ne pala cwageya se cugum me. 13 Haman ka wan na gwale Zeres ma ne na kondore ma fare ge ne ɓó na pe. Na naa ge yuwaleya ma ɓanna ne na gwale Zeres a jan na go: «Kadɗa Murtukay ge mo ne ɗage ya detɗa na ndwara zḛ mbe no a Yuda ne ɗe, mo mbo ke na a̰me to, ago mo gá det det na ndwara zḛ go no.» 14 A gale ne swaga jan na fare go ɗe, ajibaŋ ge gan ne ma mbo ya, a terse Haman na mbo swaga kaŋzam ge Ester ne ya.