Ester 4

Murtukay é Ester mbo jan gan fare

1 Swaga ge Murtukay ne kwa kaŋ mbe ma kerra pet ɗe, taabe na ba̰r ne na ta uzi, kan kasigir na ta, kan sḭḭm na pala digi, ka an suwal diŋ, ka oy fyaso fyalla ge zwala. 2 Det ya ɗiŋ gan viya̰ wak pal, mḛ go. Ago ndu ne pool wat gan diŋ ne kasigir na ta to. 3 Ge suwal ge daage go pet, swaga ge eya ge gan ne mbe ne det ya go ɗe, Yuda ma ka wan kḭḭmi ge ɓaŋlaŋ, a ka wan asiyam, a ka fyalla, a ka sun ta, naa gḛ ne nama buwal zi a kan kasigir ma bama ta, a ka fí sḭḭm zi.

4 Ester kale ma ne na ajibaŋ ma mbo ya waage na fare mbe, gan gwale iigi ge be to. Teme ba̰r ma ya hon Murtukay na ka̰ na ta, na fage kasigir ne na ta uzi. Amma kuri. 5 Ester tol Hatak, ɗu ne ajibaŋ ge gan ne ma ge ne ho̰ nama ke na temel ma buwal zi, dol na mbo hale fare pe Murtukay ta, na ma fare de, na ke go da ne da pe de. 6 Hatak mbo ɓol Murtukay ge tandal ge suwal ne go, na ge ne gan viya̰ wak pal go. 7 Murtukay wan na fare ge ne ɓó na ma pe pet, ŋgay na bware ge Haman ne e go na ba kan na zok koy bware ge gan ne zi, kadɗa a burmi Yuda ma pe ya uzi. 8 Hon na maktub eya ge a ne njaŋge na ne burmiya ge Yuda ma ne pe ge Susa go, na mbo ŋgay Ester na me. Murtukay gwan jan Hatak go, na jya̰ Ester na mbo ɓol gan, na kaɗe na na kwa na pehir Yuda ma a̰se. 9 Hatak mbo ya wan Ester fare ge Murtukay ne ma pe. 10 Ester jan Hatak na mbo jan Murtukay go: 11 «Gan naa ga̰l ge temel ma pet, ne naa ge ne gan suwal go ma pet, a kwa kwa go, ndu son ko ndu gwale ge mbo gan ta diŋ ya, be ge gan tol na ne to, na eya pal, a ŋgat a hun na uzi. Amma a ndu ge gan ne tyare na calaŋ plando ge dinar ɗeŋgo kat ne ndwara ne. Ndi dam ma̰ no tapolɗu, gan be tol mbi mbo na ta ya to.» 12 A mbo ya wan Murtukay fare ge Ester ne jya̰ pe.

13 Murtukay gwan ne Ester janna go: «Ne mo ne ka ne gan diŋ pe, dwa go mo mbo má ne hini ɗu ne Yuda ma buwal zi to. 14 Swaga mbe no zi, kadɗa mo kuri ya be jan fare, kwa go fogeya ne zurra ge Yuda ma mbo mbo ne swaga ge ɗogle ya, amma aŋ ne aŋ vuwal pe go, aŋ pe mbo burmi uzi. A wuɗi kwa ne go, na da ne fare mbe no pe, mo dé ya muluk zi no ɗaa?» 15 Ester gwan ne Murtukay janna go: 16 «Mbo, kote Yuda ge ne suwal Susa go ma se pet, wa̰ me asiyam ne mbi pe. Zá me kaŋzam to, njó me mam to me, ɗaal ne gyala ɗiŋ dam ataa. I ne mbi kale ma i mbo ke go no me. Ko ne jo̰ eya mbe go no puy ɗe, mbi mbo mbo ɓol gan, kadɗa na gene mbi siya zi puy, mbi su.» 17 Murtukay mbo ke kaŋ ma pet ge Ester ne ho̰ na wak ma pal.