Ester 3

Ho̰l ge Murtukay ma ne Haman buwal zi

1 Go̰r kaŋ mbe ma go, gan Zerses her Haman ge Hammedata vya, ndu ge ne vuwal pe ge Agag ne zi digi, e na na naa ga̰l ma pala digi pet. 2 Gan naa ga̰l ge temel ma ge ne na zok wak go ma pet, a ka gur bama koo ne cwage Haman ndwara se, dimma ne gan ne ho̰ na wak ne na pe go. Amma Murtukay be ka gur na koo ne cwageya na ndwara se to. 3 Gan naa ga̰l ge temel ma ge ne na zok wak go ma jan Murtukay go: «Mo te yele wak honna ge gan ne pala gyana ɗaa?» 4 A ka jan na dam ne dam, amma Murtukay za̰ nama to bat. A waage Haman fare mbe, ndwara kwa go, Murtukay ma̰ mḛ na koo na fare mbe pal de. Ago Murtukay jya̰ nama go, na Yuda ne. 5 Swaga ge Haman ne kwa go, Murtukay gur na koo ne cwageya na ndwara se to ɗe, na laar vḛne ge be to. 6 Ne jo̰ a waage na hir ge Murtukay ne ɗe, ɓyare go na e na tok Murtukay pal hini to, amma na burmi Yuda ma, hir ge Murtukay ne ne muluk ge Zerses ne zi uzi mwaɗak. 7 Del wol para azi ge muluk ge Zerses ne pe eya go, Saba ge zḛ ge, ndwara go saba Nisan go, Haman uusi baare ne purim dam ge daage, ne saba ge daage pal, baare uusiya det saba ge wol para azi, na ge saba Adar pal.

Maktub ge Haman ne njaŋge ne burmiya ge Yuda ma ne pe

8 Haman jan gan Zerses go: «Pehir a̰me ya go na fare hini cat. A ka ya suwal ma go, pehir ge ne mo muluk zi ma pet buwal zi. Nama eya ma hini ne pehir ge may ma ne, a gwan ne bama pala eya ge gan ne ma pe se to. A kwaɗa ne gan pe ge ya̰ nama katɗa halas to. 9 Kadɗa fare mbe dé gan ta kwaɗa, na njaŋge maktub ndwara burmi nama pe uzi. Mbi ba hon gan naa ge temel ma bware fool kaal kilo dudubu kikis ataa nama ba mbo kan na gan zok koy bware zi.»

10 Gan ndage na logom ne na tok zi hon Haman ge Hammedata vya, ndu ge ne vuwal pe ge Agag ne zi, bage ho̰l ge Yuda ma ne. 11 Gan jan Haman go: «Koy bware mbe ne mo sḛ pe, mbi ho̰ naa mbe ma mo tok go, ke ne nama kaŋ ge mo laar ne ɓyare.»

12 Dam wol para ataa ge saba ge zḛ ge ne go, a tol gan naa ge njaŋgeya ma ya. Wak honna ge Haman ne pal, a njaŋge maktub hon gan paca ma, ne naa ge ne dó bama ndwara ne suwal pal ma, ne ga̰l ge pehir ma ne ma mwaɗak. A njaŋge maktub mbe da ne suwal ge daage wak, ne wak ge pehir ge daage ne. A njaŋge maktub mbe da ne dḭl ge gan ne, ne logom ge gan ne me. 13 A teme naa ge mbo ne maktub ma ne maktub mbo suwal ge gan ne ma go mwaɗak. A ho̰ wak go, a hṵ Yuda ma uzi, a burmi nama ne bool go mbo sabar, naa jabso ma ne naa zaab pet, a pá nama kaŋ ma me. A burmi nama pe dam ge ɗu go, dam wol para ataa ge saba wol para azi go, ndwara go saba Adar. 14 A ho̰ suwal ge daage maktub mbe na ka dimma ne eya go, na waage na naa pet, ne da pe nama ka jejew ne dam mbe pe. 15 Wak honna ge gan ne pal, naa ge mbo ne maktub ma har ta mborra, a oy eya mbe suwal ga̰l Susa go me. Gan ma ne Haman kat se, a ka njotɗa, amma suwal ga̰l Susa wat kḭḭmi ge ɓaŋlaŋ zi.