Ester 2

Ester saŋge gan gwale

1 Go̰r kaŋ mbe ma no go, gan Zerses laar iyal se, dwat ne fare ge Vasti ne ke, ne fare ge a ne vḭ ta ke na. 2 Gan naa ga̰l ge temel ma jan na go: «Ya̰ a ɓyare gan vya kale ge ne kwa ndu son to ge kale gḛ ma ya. 3 Gan é naa ga̰l ge temel ma ge suwal ge ne na muluk zi ma go mwaɗak, nama gene vya kale ge ne kwa ndu son to ge kale gḛ ma ya suwal ga̰l Susa go honna ge gan ajibaŋ Hege tok go koyya, ne da pe na ba ka hon nama kaŋ ke kale ma. 4 Vya kale ge ne mbo detɗa mo ndwara zi, mo ba e na gan gwale Vasti byalam go.» Fare mbe det gan ndwara zi kwaɗa, a ke mbe go no.

5 Yuda a̰me ka suwal ga̰l Susa go, na dḭl Murtukay. A Yayir vya ne, ne vuwal pe ge Chimey ma ne Kich ne zi, a Bayami hir ne. 6 Na sḛ ka naa ge Nebukadnezar gan ge Babilon ne ne pá nama ne Ursalima go mbo Babilon ma buwal zi, poseya ne Yekoniya gan ge Yuda ne. 7 A Murtukay wá na bá vya Hadasa, na ge na dḭl Ester me. Ago Ester na sá vya ne. A swaga ge na bá ma ne na ná ne su go, Murtukay wa̰ na walla no. Vya gwale mbe duur ka somndol, na ndwara kale gḛ ge be to.

8 Swaga ge a ne za̰ eya ge gan ne, a kote vya kale ma ya gḛ suwal ga̰l Susa go, a hon nama Hege tok go koyya. A mbo ne Ester ya gan yadiŋ me, honna Hege bage koy naa zaab ma tok go. 9 Ester det Hege ndwara zi, gá ke na kwaɗa. Har tene hon na kaŋ ge ke kale ma ne kaŋzam, abe kale ma ɓyalar ne gan yadiŋ hon na me, zwagre nama ne na kale ma zok ge naa zaab ne ge kwaɗa zi. 10 Ester be ben na hir pe zum to, ago Murtukay tele na tele go, na bḛ na pe zum to. 11 Dam ne dam, Murtukay ka mbo ya yàl ge naa zaab ne diŋ yapul go ndil Ester, na ne go gyana de, ko a ke na ne go gyana de.

12 Ago naa zaab vya kale mbe ma a nṵsi nama ne kaŋ ke kale ge naa zaab ne ma saba wol para azi: a wan nama sḛ saba myanaŋgal da ne num ge mir ne, saba myanaŋgal ne num ge hur tuli ma ne kaŋ ke kale ge naa zaab ma ne ma me. Vya kale ge daage ka da ne na dam ge mbo dwam zok ne gan Zerses. 13 Swaga ge dam ge vya kale a̰me ne ɗage mbo dwam zok ne gan ɗe, a hon na kaŋ ge daage pet ge na sḛ ne ɓyare ma na tok ya, ba ɗage ne zok ge naa zaab ne go mbo ɓol gan. 14 A mbo gan ta ya gasamal, a dwam zok ne gan, cya̰wak a ba ɗage mbo zok ge gan gwale ge wanna digi ma ne zi ya, koyya ge ajibaŋ Chasgaz tok go. Na sḛ gwan gwan’a gan ta to, gan ɓyare na tolla ya ne na dḭl ne bḛ.

15 Swaga ge Ester ge Abihay vya, Murtukay bá vya ge ne wá na dam ne mbya mbo gan ta ya ɗe, be ele a̰me ge ɗogle to, ɓyare ɗeŋgo kaŋ ge Hege, ajibaŋ ge gan ne, bage koy naa zaab ne ho̰ na. Ester det kwaɗa naa ge ne ka kwar na ma ndwara zi pet. 16 A gene Ester mbo gan Zerses ya saba ge wol go, ndwara go, saba Tebet, del ɓyalar ge na muluk ne zi. 17 Gan laar wan Ester waɗe naa zaab ge may ma pet. Ester det na ndwara zi, ke na kwaɗa waɗe vya kale ge may ma pet. Par kadmul gan na pal, e na gan gwale Vasti byalam go. 18 Gan ke vḛso ge ɓaŋlaŋ ne Ester pe, tol na ga̰l ma ne na naa ga̰l ge temel ma ya pet. Her kaŋ siyal potɗa ne naa ge ne na suwal go ma pal uzi, var naa bobo ma ne tok lwagar na laar ɓyareya pal me.

19 Swaga ge a ne gwan kote vya kale ma ya ge ndwara azi go ɗe, Murtukay ne katɗa gan zok wak pal. 20 No puy ɗe, Ester be ben na pe zum to, dimma ne Murtukay ne yuwale na go. Ester ka ke fare ge Murtukay ne jan na ma pal, dimma ne na dḛ ne ka na tok go go.

Murtukay fut naa ge ne ɓyare hun gan ma pe zum

21 Dam a̰me ɗu, Murtukay ne katɗa gan zok wak pal. Ajibaŋ ge ne koy gan zok wak ma azi, Bigtan ma ne Teres, a za̰ ta go bama hṵ gan, ne da pe, nama laar ka hot hot gan pal. 22 Murtukay za̰ nama fare mbe, mbo jan gan gwale Ester pal. Ester me, mbo jan gan fare mbe ne dḭl ge Murtukay ne. 23 Swaga ge a ne hale fare mbe pe, a ɓol go, na fareba. A wan ajibaŋ mbe ma jwak, a pel nama uwara ta digi. A njaŋge fare mbe maktub maana zi, ge gan ndwara go.