Nehemiya 10

Ɓase ma vin ke mborra eya pal

1 Ne no pe, i ke wak tuli njaŋgeya maktub zi. I ga̰l ma, ne i Levi vya ma, ne i naa ge ke tuwaleya ma a e bama logom ma maktub mbe ta.

2 Naa ge a ne e bama logom maktub mbe ta ma dḭl ma no: Nehemiya ge Hakaliya vya, bage ne dó na ndwara ne suwal pal, ne Sedekiyas, 3 Seraya, Azariya, Irmiya, 4 Pachehur, Amariya, Malkiya, 5 Hattuch, Chebaniya, Malluk, 6 Harim, Meremot, Obadiya, 7 Danyel, Ginneton, Baruk, 8 Mechullam, Abiya, Miyamin, 9 Maaziya, Bilgay, Chemaya. No, a naa ge ke tuwaleya ma ne.

10 Levi vya ma: Juswa ge Azaniya vya, ne Binwi ge ne vuwal pe ge Henadad ne zi, ne Kadmiyel, 11 ne nama kaam ma: Chebaniya, Hodiya, Kelita, Pelaya, Hanan, 12 Mika, Rehob, Hachabiya, 13 Zakkur, Cherebiya, Chebaniya, 14 Hodiya, Bani, Beninu.

15 Ga̰l ge ɓase ma ne ma: Paros, Pahat-Mowab, Elam, Zattu, Bani, 16 Bunni, Azgad, Bebay, 17 Adoniya, Bigvay, Adin 18 Ater, Ezekiyas, Azur, 19 Hodiya, Hachum Besay, 20 Harif, Anatot, Nebay, 21 Magpiyas, Mechullam, Hezir, 22 Mechezabeel, Sadok, Yaddwa, 23 Pelatiya, Hanan, Ananiya, 24 Hosiya, Hananiya, Hachub, 25 Hallohech, Pila, Chobek, 26 Rehum, Hachabna, Maaseya, 27 Ahiya, Hanan, Anan, 28 Malluk, Harim, Baana.

29 Naa ge ne gá ge may ma, ndwara go, naa ge ke tuwaleya ma, ne Levi vya ma, ne naa ge koy zok wak ma, ne naa ge mbal kaŋ ma, ne naa ge a ne ho̰ nama ne ke temel zok ge Dok ne zi pe ma, poseya ne naa ge a ne abe ta uzi ne naa ge suwal ne ma ta ndwara ke mborra eya ge Dok ne pal ma, ɓanna ne bama gwale ma ne bama vya ge sonmo ma ne ge gwale ma ge ne mbya kwar fare ma pet, 30 a ɓan wak dagre ne bama ná vya ma, bama ga̰l ma. A guni ta go bama gá ke mborra eya ge Dok ne pal, na ge ne ho̰ nama na ne nà dore Musa ta, ne da pe, bama koy ne ke mborra wak honna ge Bage ɗiŋnedin Dok ge bama ne ma pal, ne na wak yuwaleya ma, ne na eya ma pal pet. 31 I za̰ ta go, i hon i vya ge gwale ma naa ge suwal ma kat yàl to, i san nama vya ge gwale ma hon i vya ge sonmo ma to me. 32 Kadɗa naa ge suwal ma gene kaŋ ge daage pe ja yatɗa dam ɗigliya go, ko dam a̰me ge mbegeya go, nee ne pool yat nama to. Del ge ɓyalar ma go me, a ya̰ wul ge daage baŋ be potɗa. 33 I ho̰ ta wak go, del ge daage zi, ndu ge daage na ho̰ bware fool kaal ɗu ge gram anda ne temel ge zok ge i Dok ne pe, 34 ne katugum ge a ne tyare na hon Dok pe, ne tuwaleya ge kaŋ kyarga ne ge a ne tyare na ɗaɗak pe, ne tuwaleya ge tilla uzi ɗaɗak pe, ne tuwaleya ge dam ɗigliya ma go pe, ne ge saba wak ma pe, ne ge dam vḛso ma go pe, ne tuwaleya ge mbegeya ge may ma pe, ne tuwaleya ge pore sone ge Israyela vya ma ne ma pe, ne temel ge daage pet ge ne zok ge i Dok ne zi ma pe pet me.

35 I, naa ge ke tuwaleya ma, Levi vya ma, ne ɓase ma pet, i uusi baare i ga̰l wak ma pal ne gene uwara ya zok ge i Dok ne zi del ge daage zi ne ol ge twal tuwaleya ge Bage ɗiŋnedin Dok ge i ne pe, dimma ne njaŋge ne maktub eya zi go. 36 Ne gene kaŋ wak ge i kaŋ kyarga ma ne i uwara ma ne ya zok ge Bage ɗiŋnedin ne zi del ma ne del ma, 37 ne gene i vya son ge pul soy ma, ne i kavaar ma vya pul kale ma ya dimma ne njaŋge ne maktub eya zi go, ne gene i nday ma ne i gii ma vya pul kale ma ya zok ge i Dok ne zi hon naa ge ke tuwaleya ge ne ke temel ne zok ge i Dok ne zi ma. 38 I swama watɗa ge kwaɗa ma, ne kaŋ wak ge i kaŋ kyarga ma ne ma, ne kaŋ wak ge i uwara ma ne ma, ne i oyo̰r jiya̰l ge giya̰l ma, ne i num ma, i mbo gene nama ya hon naa ge ke tuwaleya ma ge zok koy kaŋ ma ge zok ge Dok ne zi. I kaŋ wak ge ɗu ne wol zi ge i kaŋ kyarga ma ne ma, i hon Levi vya ma. Nama sḛ ma mbo ka mbo ame nama ge swaga ge daage ge i ne ke temel ne go. 39 Bage tuwaleya ge ne hir ge Aaron ne zi a̰me mbo kat ne Levi vya ma swaga ame kaŋ wak ge ɗu ne wol zi go. Levi vya ma mbo ndage ɗu ne wol zi ge bama kaŋ wak ma ne honna zok koy kaŋ ma ge zok ge i Dok ne zi. 40 Israyela vya ma ne Levi vya ma mbo ka gene bama kaŋ wak ge gḛme ne ma, ne ge oyo̰r jiya̰l ne ma, ne ge num ne ma ya zok kan kaŋ temel ma zi, na ge naa ge ke tuwaleya ge ne temel wak go ma, ne naa ge koy zok wak ma, ne naa ge mbal kaŋ ma ne zi.

Go mbe no, i ba ndil zok ge i Dok ne solom to.