Kaɗe poreya ge Israyela vya ma ne ne bama sone ma pe
9
1 Dam wara azi para anda ge saba mbe ne go, Israyela vya ma kote ya ne asiyam pe, a kan kasigir ma bama ta, a bugi suwar bama ta me. 2 Pehir ge Israyela ne ma caɗe ta ya uzi ne naa ge pe ɗogle ma, a mbo ya mḛya digi ndwara fut bama sone ma, ne sone ge bama bá ma ne zum. 3 A ɗage digi mḛya, a isi nama maktub eya ge Bage ɗiŋnedin, Dok ge nama ne ne cya̰wak tek mbo gyala wak horom ndaar, ne gyala wak horom ndaar go ɗiŋ mbo gyala pala, a gur se, a ka fut bama sone ma zum Bage ɗiŋnedin Dok ge bama ne ndwara se.4 Juswa, Bani, Kadmiyel, Chebaniya, Bunni, Cherebiya, Bani, ne Kenani, a ndé tandal ge Levi vya ma ne digi, a ka oy digi ne ka̰l ndaar Bage ɗiŋnedin Dok ge bama ne ndwara se. 5 Levi vya ma, Juswa, Kadmiyel, Bani, Hachabneya, Cherebiya, Hodiya, Chebaniya ne Petahya, a jan go: «Ɗage me digi! Uware me Bage ɗiŋnedin Dok ge aŋ ne, na ge ɗiŋnedin mbo ɗiŋnedin!
Mo dḭl ge hormo ɓó uwareya,
Na he digi vew waɗe uwareya ne siya̰le ge daage pet!»
6 A mo Bage ɗiŋnedin ne ɗu kikit!
Mo ke digi digi ya ma ne kaŋ ge ne na pul zi ma mwaɗak,
ne suwar, ne kaŋ ge ne na pal ma mwaɗak,
ne maŋgaɗam ga̰l yuwam,
ne kaŋ ge na na pul se ma mwaɗak.
A mo dó nama ne pet,
kaŋ ge ne digi digi zi ya ma pet,
a gur mo ndwara se.
7 A mo Dok, Bage ɗiŋnedin, mo tá Abram ne,
mo e na ɗage ne suwal Ur ge kaldeya ma ne ya ne,
mo è na dḭl no Abraham.
8 Mo ɓo na ɗeŋger ndwara se,
mo ke wak tuli ne na no,
ndwara hon na pehir ma suwal ge Kanan ma,
ne ge Hittitiya ma, ne ge Amoriya ma,
ne ge Pereziya ma, ne ge Yebus ma,
ne ge Girgasiya ma ne no.
Mo koy wak tuli ge mo ne, ago mo dosol.
9 Mo kwa yál njotɗa ge i bá ma ne suwal Masar go,
mo za̰ nama fyaso maŋgaɗam ga̰l yuwam ge teer ne wak go.
10 Mo ke kaŋ ŋgayya ma ne kaŋ ajab Faraon ta,
ne na naa ga̰l ge temel ma ta,
ne na naa ge ne na suwal go ma ta pet.
Ago mo kwa jegreya ge nama ne mo naa ma pal.
Mo pate tene nama pal, dimma ne naa ne kwa na ne se ma̰ no go.
11 Mo caɗe maŋgaɗam ga̰l yuwam se nama ndwara zḛ,
a kale maŋgaɗam ga̰l yuwam pul se fiya̰l baŋ,
Amma naa ge a ne ka yan nama pe ma,
mo ɗigli nama maŋgaɗam ga̰l yuwam pul se ya dimma njal go.
12 Mo ka dame nama gyala ne pḭr kulbiya,
ɗaal ne pḭr ge ol sogeya me,
ka zenna ndwara hon nama kwaya̰l viya̰ mborra go.
13 Mo ka̰ mo koo ne digi ya njal Sinay pal,
mo jya̰ nama fare no.
Mo ho̰ nama mo wak yuwaleya ma ge jwap,
ne mo eya ma ge fareba,
ne mo njaŋgeya ma ne mo wak honna ge siŋli ma me.
14 Ne mo dore Musa ta, mo e nama kwa mo dam ɗigliya,
dam ge a ne mbege na ne mo pe,
ne mo wak honna ma, ne mo eya ma, ne mo njaŋgeya ma.
15 Swaga ge a ne ke kyamal,
mo ho̰ nama kaŋzam ne digi digi zi ya.
Swaga ge a ne ke mam njuwal,
mo e mam ɓulla ne njal zi ya ne nama pe.
Mo jya̰ nama go,
nama mbo ame suwal ge mo ne guni tene hon nama na.
16 Amma i bá ma, jegreya ge nama ne zi,
a kuri mo wak,
a be gwan ne bama pala mo wak honna ma pe se to.
17 A kuri mo wak,
a be dwat ne kaŋ ajab ma ge mo ne ke ne bama pe to,
Wak kuriya ge nama ne zi,
a e ndu bama ndwara zḛ na gwa̰ ne bama
mbo mo̰r zi suwal Masar ya.
Amma mo, mo Dok ge ne pore naa ne,
bage sya naa ko̰r, ne bage laar wanna,
dṵṵl ne pore kerra,
zuliya ceɗed kwa a̰se zi.
Mo be saŋge nama mo go̰r to.
18 Ko swaga ge a ne ɗeere nday vya ne fool kaal ne ta pe,
a ne ka janna go:
«No a i Dok, na ge ne ndage i ne suwal Masar ya zum ne!»
A ke ya̰l ge ɓaŋlaŋ.
19 Kwa a̰se ge mo ne ge ɓaŋlaŋ zi,
mo be ya̰ nama ful pul zi ya to.
Gyala, pḭr kulbiya be abe tene uzi ne nama pal
be ge ɗame nama viya̰ go to to,
ɗaal, pḭr ge ol sogeya ka zenna nama
pal viya̰ ge a ne ka mborra go me.
20 Mo ho̰ nama o̰yom ge mo ne ge kwaɗa
ndwara saare fare.
Mo be kuri nama ne kaŋzam maan to,
uwale, swaga ge a ne ka ke mam njuwal,
mo ho̰ nama mam njotɗa.
21 Del wara anda, mo ka mbar nama ful pul zi,
a̰me be woɗege nama to,
nama ba̰r ma be vḛne to,
nama koo ma be ɗage to me.
22 Mo ɓya̰ nama suwal ma
ne naa ge ne suwal mbe ma go nama tok go,
mo va nama joo suwal ma se didig.
A ame suwal Hechbon ge gan Sihon ne,
ma ne suwal Basan ge gan Og ne.
23 Mo zuli nama vya ma se
dimma ne guwa̰r ma ne pḭr digi go,
mo e nama wat suwal ge mo ne ke wak tuli hon nama bá ma na go.
24 Nama vya ma ame suwal mbe,
mo gwa̰ ne Kanan ma,
naa ge suwal mbe ma pala nama pe se.
Mo ɓya̰ naa ge suwal ma ne nama gan ma nama tok,
ne da pe, nama ke ne nama kaŋ ge nama laar ne ɓyare.
25 A ame suwal ga̰l ge ne ve se ne gulum ga̰l ma,
ne suwar ge num tutub ma,
ne zok ma wiya ne kaŋ kwaɗa ma,
ne tub ma, ne oyo̰r ma, ne uwara olive ma,
ne uwara ge zamma ma baŋneya bindik.
A zá, a huri, a so̰ no ɗoɗor.
A gá a̰yya kwaɗa ge mo ne ge ɓaŋlaŋ zi.
26 Amma a saŋge pala ga̰l,
a kuri mo wak no,
a saŋge eya ge mo ne ma bama go̰r no,
a hṵ mo anabi ma ge a ne ka waage nama go
nama gwa̰ ya mo ta ma,
a ke ya̰l ge ɓaŋlaŋ.
27 Mo ɓya̰ nama, nama naa ge ho̰l ma tok go nama ke nama yál.
Amma swaga wak nonna ge nama ne zi,
a fya mo ta, ne digi zi ya mo za̰ nama.
Kwa a̰se ge mo ne ge ɓaŋlaŋ zi,
mo ho̰ nama naa ge zur ma,
a zú nama ne nama naa ge ho̰l ma tok go no.
28 Swaga ge a ne kat halas,
a ka gwan ke ya̰l mo ndwara se.
Mo ka gwan sot nama, nama naa ge ho̰l ma tok go,
a ka ke nama yál.
Amma swaga ge a ne gwan fyal mo ta,
ne digi zi ya, kwa a̰se ge mo ne zi, mo ka za̰ nama.
Mo ka zur nama go no ɗaɗak.
29 Mo dwage nama janna go, nama gwa̰ ya mo eya ma pal,
amma jegreya ge nama ne zi,
a be gwan ne bama pala mo wak honna ma pe se to,
a saŋge mo wak yuwaleya ma bama go̰r,
ko ne jo̰, ndu ge ne ke mborra nama pal,
ne nama ta ɓol ndwara puy ɗe,
a kuri mo wak, a ke pala ndaar,
a be za̰ mo wak to.
30 Mo wa̰ tene ne nama del ma gḛ,
ne o̰yom ge mo ne ge mo ne ho̰ mo anabi ma zi,
mo ka waage nama,
go no puy ɗe, a be e bama togor za̰ mo to,
a go no, mo ɓya̰ nama naa ge pe ɗogle ma tok go no.
31 Laar wanna ge mo ne ge ɓaŋlaŋ zi,
mo be burmi nama uzi to,
mo be saŋge nama mo go̰r to.
Ago mo Dok ge sya naa ko̰r, ne bage kwa naa a̰se ne.
32 Se no, Dok ge i ne, Dok ge ɓaŋlaŋ,
Bage pool, Bage ne hon naa vo,
Bage ne koy wak tuli, ne kwa a̰se ge na ne.
Ndi yál ge ne ɓo i, ne i gan ma,
ne i ga̰l ma, ne i naa ge ke tuwaleya ma,
ne i anabi ma, ne i bá ma, ne mo ɓase ma pet,
ne zaman ge gan ge Asiriya ma ne ya, ɗiŋ ma̰ no kaŋ baŋ to.
33 Mo, mo ka dosol ge kaŋ ge ne dé ya i pal ma zi pet,
ago mo ɗeŋger kaŋ kerra ge mo ne ma zi,
amma i, i naa ge ne ke ya̰l ma ne.
34 I gan ma, ne i ga̰l ma, ne i naa ge ke tuwaleya ma, ne i bá ma,
a be ke mborra mo eya ma pal to.
A be gwan ne bama pala mo wak honna ma,
ne mo wak yuwaleya ma ge mo ne ho̰ nama ma pe se to.
35 Swaga ge a ne ka a̰yya ne kaŋ kwaɗa
ge mo ne ho̰ nama bama suwal go,
ge suwal ge fiyal ne ge num tutub ge mo ho̰ nama na go,
a be ke mo temel mo̰r to,
a be gwan ne bama kaŋ kerra ge sonne ma zi ya to me.
36 Ndi ma̰ no, i gá ya mo̰r,
i gá ya mo̰r ge suwal ge mo ne ho̰ i bá ma na go,
ndwara go nama za na uwara tolla ma ne na kaŋ kwaɗa ma.
37 Suwal mbe kaŋ kwaɗa ma gá ya gan ge mo
ne ɓya̰ i nama tok go ne i sone ma pe ma.
A gá ya ke muluk i ne i kavaar ma pal laar ɓyareya ge bama ne zi.
I ya non wak ge ɓaŋlaŋ zi.