Yozias, gan ge Yuda ne
34
1 Swaga ge Yozias ne za gan ka da ne del tiimal. Za gan Ursalima go del tapolɗu para ɗu. 2 Ke kaŋ ge dosol Bage ɗiŋnedin ndwara se, bole koo pul ge na báŋ Dawda ne ma mwaɗak, be ge yele na fare a̰me pala go ŋgeɗo to bat.3 Swaga ge ne ke del tiimal na gan zi, ne bool gale, e pe ɓyare Dok ge na báŋ Dawda ne pe. Ge del ge wol para azi go, Yozias e pe gul swaga sḭḭm ma uzi, ne gul uwara sḭḭm Achera ne ma uzi, ne syal kaŋ sḭḭm ge cerra ma ne nama ge a ne ɗeere nama ne fool kaal ma uzi ndwara hat suwal Yuda ma ne Ursalima harcal. 4 A gul twal tuwaleya ge Baal ne, na ndwara go, a ɓá kaŋ til dukan ge ne ka twal mbe ma pal uzi, a syal uwara ge sḭḭm Achera ne ma uzi, ne syal cerra ma, ne ge a ne ɗeere nama ne fool kaal ma uzi, a ɓá nama se yeyege, a abe nama mbo suusiya kanna ge naa ge a ne ke tuwaleya hon kaŋ sḭḭm mbe ma sḭḭm ma pala go. 5 Til naa ge ke tuwaleya ge sḭḭm mbe ma ne, ma kal ma nama twal tuwaleya ma pal. A go mbe no, ge ne ha suwal Yuda ma ne Ursalima harcal.
6 Uwale, Yozias mbo suwal ge Manasa ne ma go, ne suwal ge Efrayim ne ma, ne ge Simeyon ne ma, ɗiŋ mbo suwal ge Neftali ne ma ya, ne nama joo pala ma ge ne nama ziyar go ma go pet, 7 Yozias gul twal tuwaleya ma uzi, ne syal uwara ge sḭḭm Achera ne ma se, ɓá ma uzi yeyege, ɓá kaŋ til dukan ma uzi ne suwal Israyela go pet. Gwan ya Ursalima diŋ.
Kep tuwaleya ɓol maktub eya ge zok ge Dok ne zi
8 Swaga ge Yozias ne ke del wol para tiimal na gan zi, ne hat suwal ma ne zok ge Dok ne harcal pe, teme Chafan ge Asaliya vya ma ne Maaseya ga̰l ge ne suwal pal, ne Yowa ge Yowahaz vya, gan wak ge se ge, ndwara go, nama mbo nṵsi Bage ɗiŋnedin, Dok ge na ne zok. 9 A mbo ɓol kep tuwaleya Hilkiya, a hon na bware ge Levi vya ma ne, naa ge koy zok wak ma ne sya na ne zok ge Bage ɗiŋnedin ne pe, ne pehir ge Manasa ma ne Efrayim, ne Israyela vya ge may ma pet tok go, poseya ne pehir ge Yuda ne ma ne Bayami ne, ne naa ge ne ka ne Ursalima diŋ ma pet tok go. 10 A hon bware mbe ge ga̰l ma ge a ne ka ne temel nṵsi zok ge Bage ɗiŋnedin ne ma tok go, ne pot naa ge ke zok ge Bage ɗiŋnedin ne temel ma pe. 11 Ndwara go, naa ge ke temel uwara ma, ne naa ge sin zok ma, ne yat njal ge cerra ma, ne uwara zok pala ma, ne sin zok ma ge gan ge Yuda ne ma, ne ya̰ nama gulla se ma digi. 12 Naa mbe ma ka ke temel ma ne dulwak ɗu. Yahat ma ne Obadiya ne vuwal pe ge Merari ne zi, poseya ne Zakariya ma ne Mechullam ne vuwal pe ge Kehat ne zi, pet pehir ge Levi ne, a ka dol bama ndwara temel ma pal ne. Levi vya ge may ma, pet naa ge ne kwa kaŋ haleya ma, 13 a ka dol bama ndwara naa ge in kaŋ ma pal, ne naa ge ke temel ge may ma pal pet. Levi vya ge may ka naa ge njaŋge kaŋ ma, ne naa ge koy kaŋ ma, ne naa ge koy zok wak ma.
14 Swaga ge a ne ka abe bware ge a ne ka̰ na zok ge Bage ɗiŋnedin ne zi ne sandu zi ya, bage tuwaleya Hilkiya ɓol maktub eya ge Bage ɗiŋnedin ne ge Musa ne ho̰ na. 15 Hilkiya jan bage njaŋgeya Chafan go: «Ndi mbi ne ɓol maktub eya ja ne zok ge Bage ɗiŋnedin ne zi ya no.» Hilkiya her maktub mbe, hon na Chafan tok go. 16 Chafan mbo ne maktub ya hon gan, wan na kaŋ ge bama ne ke pe me. Jan na go: «Mo dore ma ke kaŋ ge a ne ho̰ nama kerra ma mwaɗak. 17 A abe bware ne zok ge Bage ɗiŋnedin ne zi, a ho̰ na naa ge ke temel ma ga̰l ma tok go no.» 18 Chafan gwan jan na uwale, ndi bage tuwaleya Hilkiya ne ho̰ mbi maktub ya no. Chafan isi gan maktub mbe.
Gan Yozias kan naa mbo ɓol anabi ge gwale Hulda
19 Swaga ge gan ne zá̰ fare ge ne maktub mbe pul zi, taabe na ba̰r ma ne na ta uzi. 20 Gan tol Hilkiya, ne Ahikam ge Chafan vya, ne Abdon ge Mika vya, ne bage njaŋgeya Chafan, ne Asaya na dore a̰me, jan nama go: 21 «Ne maktub ge a ne ɓó na mbe fare janna ma pe, mbo me ele Bage ɗiŋnedin fare ne mbi pe, ne naa ge ne ga ne suwal Israyela go ma pe, ne suwal Yuda pe me. Ago pore ge Bage ɗiŋnedin ne a ɓaŋlaŋ ne nee pal, ne da pe nee bá ma be ke mborra fare janna ge maktub mbe ne pal to.»
22 Hilkiya ma ne na kaam ge gan ne teme nama ma, a mbo ɓol anabi ge gwale Hulda ge Challum gwale. Challum ge Tokehat vya, ge Hasra báŋ, bage koy ba̰r ge ne zok ge Dok ne zi ma. Ago Hulda ka kat Ursalima ndwala pul ge giya̰l go. A wan na fare ge ne e bama mbo ya ɓol na pe. 23 Hulda jan nama go: «Bage ɗiŋnedin Dok ge Israyela ne jan: ‹Jya̰ me bage ne teme aŋ ya mbi ta go: 24 Bage ɗiŋnedin jan go: Mbi mbo gene yál ya suwal mbe ma, ne na naa ma pal, wak vḛneya ma ge ne njaŋge ne maktub mbe zi, ge a ne isi na hon gan ge Yuda ne ma mwaɗak, a mbo ke. 25 Ne jo̰ a saŋge mbi bama go̰r, a mbo ke tuwaleya hon dok ge ɗogle ma no, nama kaŋ kerra ma é mbi laar ya hotɗa. Se no mbi ho̰l ne suwal mbe no a ɓaŋlaŋ, mbi laar mbo iyal se to bat›. 26 Se no ɗe, aŋ mbo jan gan ge Yuda ne, na ge ne teme aŋ ya ele fare ne Bage ɗiŋnedin ne ta go, Bage ɗiŋnedin, Dok ge Israyela ne jan ne fare ge mo ne za̰ ne maktub mbe zi go: 27 Ne jo̰ fare ge mbi ne jya̰ na ge suwal mbe ma ne na naa ma pal tí mo dulwak, mo gwa̰ ne mo pala mbi pe se no, mo taabe mo ba̰r ma ne mo ta uzi no, mo fya mbi ndwara se no ɗe, mbi me, mbi zá̰ mo kaɗeya go, ka̰l ge Bage ɗiŋnedin ne. 28 Mbi mbo he mo mo bá ma pe ya halas zi, a mbo mbul mo halas zi, mo ndwara mbo kwa yál ge mbi ne mbo gene na dḛ ja suwal mbe no pal to.» A gwan’a jan gan fare mbe.
Ɓase ma gwan ke wak tuli ne Bage ɗiŋnedin
29 Gan Yozias dol temel mbo tol naa ga̰l ge ne suwal Yuda go ma ya mwaɗak poseya ne naa ga̰l ge ne Ursalima diŋ ma. 30 Gan poseya ne naa ge ne Yuda go ma, ne naa ge ne Ursalima diŋ ma pet, naa ge ke tuwaleya ma, ne Levi vya ma, ɓase ma pet, ne naa jabso go ɗiŋ mbo naa ga̰l, a mbo zok ge Bage ɗiŋnedin ne zi ya. A isi nama maktub ge wak tuli ne ge a ne ɓó na ne zok ge Bage ɗiŋnedin ne zi mbe. 31 Gan mḛ́ swaga ge a ne nṵsi na ne na pe pala digi, ke wak tuli Bage ɗiŋnedin ndwara se ndwara hon tene bole Bage ɗiŋnedin koo pul, ne koy na eya ma, ne na wak honna ma, ne na njaŋgeya ma, ne dulwak ɗu, ne na sḛ mwaɗak me, ne koy fare ge ne njaŋge ne maktub wak tuli mbe no zi ma. 32 Yozias e naa ge ne Ursalima diŋ ma poseya ne pehir ge Bayami ne ke wak tuli mbe go me. Naa ge ne Ursalima diŋ ma koy wak tuli ge bama ne ke ne Dok ge bama bá ma ne.
33 Yozias gul kaŋ sḭḭm ge seŋgre kakatak ma ne suwal Israyela go uzi mwaɗak, é Israyela vya ma uware Bage ɗiŋnedin, Dok ge bama bá ma ne. Ago dam ge Yozias ne ka ne ndwara ma go mwaɗak, Israyela vya ma be saŋge Bage ɗiŋnedin Dok ge bama bá ma ne bama go̰r to.