Ezekiyas nṵsi temel ge zok ge Bage ɗiŋnedin ne zi
31
1 Swaga ge a ne a vḛso kerra ɗe, Israyela vya ma mwaɗak, a mbo suwal ge Yuda ne ma go, a ɓá kaŋ sḭḭm ma, a gul uwara ge sḭḭm Achera ne ma uzi, ne burmi swaga sḭḭm ne swaga tuwaleya ma uzi mwaɗak ne suwal Yuda ma ne Bayami go. A ke go mbe no ca suwal Efrayim ma ne Manasa go. Go̰r go, ndu ge daage gwan na suwal ya. 2 Ezekiyas caɗe naa ge ke tuwaleya ma ne Levi vya ma bama varra ma pal, hon ndu ge daage temel kerra na varra pal. Naa ge ke tuwaleya ma ne Levi vya ma, a̰me ma a ka ke tuwaleya ge tilla uzi ma ne ge ba̰a̰n ne ma, a̰me ma ka siya̰le Bage ɗiŋnedin ge zok ge Bage ɗiŋnedin ne wak go. 3 Gan hon le ɗu ge na kaŋ ɓolla ma ne, ne ke tuwaleya ge tilla uzi ge cya̰wak ma ne ge gasamal ne pe, ne tuwaleya ge dam ɗigliya ma, ne saba wak ma, ne ge vḛso ma ne pe me, dimma ne a ne njaŋge nama ne maktub eya ge Bage ɗiŋnedin ne zi go. 4 Na sḛ jan naa ge ne ka ne Ursalima diŋ ma go, nama ho̰ naa ge ke tuwaleya ma ne Levi vya ma kaŋ ma ndwara, ne da pe, nama ho̰ ta ne temel pe dimma ne a ne njaŋge na ne maktub eya ge Bage ɗiŋnedin ne zi go. 5 Swaga ge a ne waage ɓase ma fare mbe ɗe, Israyela vya ma gene bama kaŋ wak ge zḛ ge ma ya, gḛme ma, ne oyo̰r jiya̰l ge giya̰l ma, ne num ma, ne daaram ma, ne kaŋ ge daage ge a ne ɓo na ne gaaso zi ma pet, a gene nama ya. A gene ɗu ne wol zi ge bama kaŋ ma ne ma ya mwaɗak me. 6 Uwale, Israyela vya ma, nama ge ne ka ne suwal ge Yuda ne go ma, poseya ne Yuda ma a hon ɗu ne wol zi ge bama nday ma ne, ne gii ma, ne ɗu ne wol zi ge kaŋ ma ge ne mbya mbegeya ne Bage ɗiŋnedin Dok ge bama ne pe ma. A kote nama digi tabeya ɓulul. 7 A e pe kote nama digi ge saba ge ataa go ɗiŋ a mbo á nama koteya saba ge ɓyalar go. 8 Swaga ge Ezekiyas ma ne naa ga̰l ge temel ma ne mbo ya ndil kaŋ ma ge a ne kote nama digi ma, a uware Bage ɗiŋnedin, a uware Israyela vya ma me.9 Ezekiyas ele naa ge ke tuwaleya ma ne Levi vya ma fare ne kaŋ ge a ne kote nama digi ma pe. 10 Kep tuwaleya Azariya ge ne vuwal pe ge Sadok ne zi, gwan ne na janna go: «Ne swaga ge naa ne ɗage gene bama kaŋ wak ma ya zok ge mbegeya zi day, i zam kaŋ huriya, kaŋ pe ma gwan gá, ago Bage ɗiŋnedin e na wak busu na ɓase ma pal. Kaŋ ma ge a ne kote ne go go ma no, a kaŋ ma pe ge ne gá ma ne.»
11 Gan Ezekiyas hon wak go a nṵsi zok ma pul ge zok ge Bage ɗiŋnedin zi. Swaga ge a ne nṵsi nama, 12 a ka mbo ne bama kaŋ wak ma, ne ɗu ne wol zi ge bama kaŋ ma ne, ne kaŋ ge mbegeya ne Dok pe ma ya zok mbe ma zi. A é Konaniya, ndu ge ne vuwal pe ge Levi ne zi koy nama, a é na sele Chimey na goopol me. 13 Yehiyel, Azariya, Nahat, Asayel, Yerimot, Yozabad, Eliyel, Yismakya, Mahat, ne Benaya, a ka naa ge lobre temel ma. Nama ga̰l ka Konaniya ma ne na sele Chimey, wak honna ge gan Ezekiyas ma ne Azariya kep tuwaleya ne pal. 14 Kore ge Yimna vya, ne vuwal pe ge Levi ne zi, bage koy zok wak le ge ham ge, a bage ge koy bobo ma ge a ne ke nama ne laar ɓyare hon Dok ma ne. Na sḛ ka var kaŋ wak ma ge hon Bage ɗiŋnedin ma ne kaŋ ge mbegeya uzi cat ma se ne. 15 Ge suwal ma ge naa ge ke tuwaleya ma ne ma go, Eden, Minyamin, Juswa, Chemaya, Amariya ne Chekaniya, a ka na ziyar go ndwara var bama sele ma kaŋzam naa ga̰l ma ne naa jabso ma bama pe ma go. 16 A be ka var kaŋ ɗeŋgo hon naa ge a ne isi nama to, a ka var naa kaŋ da ne del ataa go mbo digi, uwale ne nama ge a ne mbo zok ge Bage ɗiŋnedin zi bama dam eya ma pal mbo ke na temel bama varra ma pal, ne bama pe go. 17 A isi naa ge ke tuwaleya ma da ne bama vuwal pe ma go, Levi vya ma, ne del wara azi go mbo digi, a isi nama bama temel kerra ma pal, ne bama pe go. 18 A isi nama ne bama yàl wak go mwaɗak: nama gwale ma, nama vya ge sonmo ma ne ge zaab ma, ne naa ge ne kat ne nama ta ma mwaɗak, nama ge mbya zam kaŋ ge mbegeya ge ne zok ge Dok ne zi ma. 19 Aaron vya ma, naa ge ke tuwaleya ma, nama ge ne ka bama suwal ma le ge ful zi ma go, a tá naa a̰me ma suwal ge daage go ndwara var naa ge ke tuwaleya ma ne Levi vya ma mwaɗak ge a ne isi nama kaŋ ma.
20 No a kaŋ ge Ezekiyas ne ke ma ne pet ge suwal Yuda go. Ke kaŋ ge siŋli, ne ge dosol, ne ge ɗeŋger Bage ɗiŋnedin Dok ge na ne ndwara se. 21 Ne kaŋ ma ge na sḛ ne ke ma mwaɗak, ko swaga nṵsi temel ma ge zok ge Dok ne zi, ko swaga gwan ne na pala eya ma ne wak honna ma pe se, ka ɓyare ke laar ɓyareya ge Dok ne, ka ke na da ne dulwak ɗu, a go no, ka uniya no.