Asa gan ge Yuda ne
14
1 Asa ke kaŋ ge kwaɗa ne ge dosol Bage ɗiŋnedin Dok ge na ne ndwara se. 2 Asa gú twal tuwaleya ge dok ge ɗogle ma ne ne swaga sḭḭm ma uzi, ɓá njal sḭḭm ma ge a ne é nama uzi, syal uwara ge sḭḭm Achera ne uzi me. 3 Jan Yuda ma go nama kare Bage ɗiŋnedin Dok ge nama bá ma ne pe ɗeŋgo, nama ke mborra na eya ma ne na wak honna ma pal. 4 Gul swaga sḭḭm ma ne twal til dukan ge sḭḭm ma ne ma uzi ne suwal ge Yuda ne ma go mwaɗak. Na zaman go, suwal gá halas. 5 Ne halas mbe zi, ɓol viya̰ ge sin suwal ge Yuda ne ma digi. Ago suwal ka halas, ndu a̰me ge mbal pore ne na be kat to, ne da pe, a Bage ɗiŋnedin sḛ ka koy na katɗa halas ne. 6 Asa jan Yuda ma go: «Sḭ me nee suwal mbe ma digi, ve me nee nama se ne gulum ga̰l, ne zok ge haal ge njole swaga ma, pa me nee zok wak ge fetɗa ma wad, ne jo̰ a nee sḛ ma ne nee suwal ma pal ne gale. Ago nee ho̰ ta kare Bage ɗiŋnedin Dok ge nee ne pe, na sḛ ɓyare nee pe ne, ho̰ nee katɗa halas ne swaga ma go no pet me.»A hon ta temel kerra zi, a sin suwal mbe ma digi pet.
Halla ge Asa ne ge Zera pal
7 Asa ka da ne asagar ma dudubu kikis ataa ne pehir ge Yuda ne zi, nama mbe ma no, a ka naa pool ge in ɓiyaar ge ga̰l ma ne deŋso ma bama tok go. Ne pehir ge Bayami ne zi, na asagar ma ka naa dudubu kikis azi ne para wara tiimal, a ka naa ge ne ha̰le ne kajamle mballa ma, a kat ne ɓiyaar ge jabso ma bama tok go me. Nama sḛ ma pet, a naa ge pateya ma ne.
8 Zera ndu ge suwal Kuch ne, mbo ya ne na asagar ma na pe go, naa dubu ɗu ne pus pore ma kikis ataa me ndwara det Yuda ma pore mballa. 9 Asa ɗage ya na ndwara zi, a nṵsi ta se da̰re nama ne pore mballa pe ge baal pul ge Sefata ne go, gwa ne suwal Marecha. 10 Asa tol Bage ɗiŋnedin Dok ge na ne, jan na go: «O Bage ɗiŋnedin! Ndu a̰me ge ɗogle be mo to ge ɗaŋge ndu ge woɗegeya pe ge ndu ge pool pal to. So i ko̰r ne se no, o Bage ɗiŋnedin. I ya̰ i saareya ma ya mo pal, i mbo ya ke pore ne naa ge zuliya ceɗed mbe ma no dḭl ge mo ne zi. O Bage ɗiŋnedin, mo i Dok ne, ya̰ ndu dasana na há mo ne pore to.»
11 Bage ɗiŋnedin hal Kuch ma Asa ma ne Asagar ge Yuda ma ne ma ndwara zḛ, a her so. 12 Asa ma ne na asagar ma yan nama pe ɗiŋ mbo suwal Gerar ya. Kuch ma sú tabeya njinjik, ndu a̰me ɗu ɓol viya̰ má tene to. Ago a Bage ɗiŋnedin sḛ, ne na asagar ma a burmi nama pe ne. Yahud ma pál kaŋ ma gḛ ge be to. 13 A ame suwal ge ne Gerar ziyar go ma mwaɗak. Ago, a Bage ɗiŋnedin sḛ ka̰ vo ge naa ge ne suwal mbe ma go zi ne. A ame nama suwal ma, a pál kaŋ ge ne suwal mbe diŋ ma kakaɗak, ne jo̰ kaŋ paal ma ka gḛ ge be to. 14 A gwan det naa ge koy kavaar ma ɗyagarta ma, a pál gii ma ne jambal ma gḛ ge be to. A gwan’a Ursalima go.