Hormo ge Bage ɗiŋnedin ne wi zok ge Dok ne pul
7
1 Swaga ge Salomon ne á kaɗeya kerra, ol ɗage ne digi digi zi ya, til tuwaleya ge tilla uzi ma ne tuwaleya ge may ma pet, hormo ge Bage ɗiŋnedin ne mbo ya wi zok ge Dok ne pul. 2 Naa ge ke tuwaleya ma gwan ɓol viya̰ ge wat zok ge Bage ɗiŋnedin ne zi ya to, ne da pe, hormo ge Bage ɗiŋnedin ne wi zok ge Dok ne pul mwaɗak. 3 Israyela vya ma kwa ol ma ne hormo ge Bage ɗiŋnedin ne ge ne soge ne digi zi ya, a gur se, a cwage bama pala se ge yapul ge zok ge Dok ne go, a ka uware Bage ɗiŋnedin janna go:«Bage ɗiŋnedin kwaɗa,
kwa a̰se ge na ne ɗiŋnedin!»
Tuwaleya kerra
4 Gan poseya ne ɓase ma pet, a tyare tuwaleya ma hon Bage ɗiŋnedin. 5 Gan Salomon tyare nday dudubu wara azi para azi, ne gii dudubu kis para wara azi me. A go no ge gan ma ne ɓase ma pet a ne ke vḛso hage zok ge Dok ne wak.
6 Naa ge ke tuwaleya ma mḛ́ bama swaga go, Levi vya ma mḛ́ ne bama kaŋ uware Dok ma ge gan Dawda ne só nama ne uware Bage ɗiŋnedin pe ma me, a ka uware Bage ɗiŋnedin ne kaŋ mballa go:
Kwa a̰se ge na ne ɗiŋnedin!
A gan Dawda ho̰ nama temel uware Bage ɗiŋnedin ne. Naa ge ke tuwaleya ma ka sun burci ya nama ndwara zi me. Israyela vya ma pet a mḛ́ digi ne bama koo cim.
7 Salomon mbege yapul ge ne zok ge Dok ne wak zum mwaɗak ndwara tyare tuwaleya ge tilla uzi ma, ne num fegem ge tuwaleya ge ba̰a̰n ne ma, ne da pe, twal tuwaleya ge a ne só na ne fool ŋgirma be mbyat ame tuwaleya ge tilla uzi ma, ne num fegem ge tuwaleya ge ba̰a̰n ne ma, ne bobo ma to.
8 Salomon poseya ne ɓase ge Israyela vya ma ne ma pet, a ke vḛso ɗiŋ dam ɓyalar. Naa kote ne swaga ma ya kakaɗak, ne suwal Hamat kuu ya ɗiŋ mbo maŋgaɗam ge suwal Masar ne wak mbii ya. 9 Dam ge tiimal go, a ke vḛso ge ɓaŋlaŋ. Ago a ke vḛso ne twal tuwaleya wak hageya pe dam ɓyalar, a gwan ke vḛso ge may no dam ɓyalar me. 10 Dam wara azi para ataa ge saba ɓyalar ne go, Salomon e naa viya̰ go gwan mbo bama gur ma wak zi. A gwan di ne laar saal, ne sḛ tuli ne kwaɗa ge Bage ɗiŋnedin ne ke ne Dawda ma ne Salomon ma ne Israyela vya ma pe.
Dok dyan tene ge ndwara azi Salomon ta
11 Swaga ge Salomon ne á zok ge Dok ne ma ne na zok sinna, ne kaŋ ma ge na ne e na laar zi kerra ne zok mbe ma pe pet ɗe, 12 Bage ɗiŋnedin dyan tene Salomon ta ɗaal zi, jan na go: «Mbi za̰ mo kaɗeya, mbi tal swaga mbe ya go na ka swaga ke mbi tuwaleya. 13 Swaga ge mbi ne mbo tele pḭr ya be swar mam ya suwar pal, ko mbi teme tere baktar ma ya zam kaŋ ge ne suwar pal ma uzi, ko mbi teme moy mbogom ya mbi ɓase ma pal, 14 kadɗa mbi ɓase ma, nama ge mbi dḭl ne tol ne nama ta ma, a gwan ne bama pala ya se, a kaɗe, a ɓyare mbi pe, a gwan’a ne bama sone kerra ma zi ya, mbi mbo sor mbi togor ne digi digi zi ya, mbi za̰ nama, mbi mbo pore nama sone ma, mbi mbo gwan ne nama suwal na byalam go. 15 Se no, mbi ndwara a dolla, mbi togor me a sorra ne kaɗeya ge a ne ke na ne zok mbe zi ma pe pet. 16 Se no, mbi tal zok mbe ya go, mbi mbege na ya go ne mbi dḭl pe ɗiŋnedin, mbi mbo ka dol mbi ndwara na pal ɗaɗak, mbi dwatɗa mbo kat na pal me. 17 Mo ɗe, kadɗa mo mbo mbi ndwara se dimma ne mo bá Dawda ne mbo go, mo ke mborra mbi eya ma pal, mo koy mbi eya ma ne mbi wak honna ma, 18 mbi mbo ɗur mo hool gan pe se dimma ne mbi ne ke wak tuli ne mo bá Dawda go: ‹Mbi mbo ka er mo hir ma ke muluk suwal Israyela pal›. 19 Amma kadɗa aŋ saŋge mbi aŋ go̰r ya, a kuri be koy mbi eya ma ne mbi wak honna ma ge mbi ne ho̰ aŋ, kadɗa aŋ gwan na mbo ke sḭḭm ma mo̰r, aŋ ga ke uwareya hon nama, 20 Mbi mbo ndage aŋ ne suwal ge mbi ne ho̰ aŋ na go uzi, mbi mbo saŋge zok ge mbi ne mbege na ne mbi pe mbi go̰r, mbi mbo saŋge na kaŋ maam ne kaŋ cotɗa pehir ge ɗogle ma ta. 21 Swaga ge naa ne mbo ɗageya kaleya zok ge ne ka dḛ siŋli mbe pe go, a mbo ka ke ajab, a ka ele ta go: ‹Bage ɗiŋnedin te ke suwal mbe ma ne zok mbe go kyaɗa ɗaa?› 22 A mbo ka gwan ne nama janna go: ‹A saŋge Bage ɗiŋnedin Dok ge bama báŋ ma ne, na ge ne abe nama ne suwal Masar diŋ ya zum bama go̰r, a gwa̰ mbo ke dok ge ɗogle ma temel mo̰r no. Da ne pe no, Bage ɗiŋnedin gene yál mbe ma ya pet nama pal no›.»