Twal tuwaleya ma ne fal ge ga̰l
4
1 Ɗeere twal tuwaleya ne fool ŋgirma, na twala kil anuwa̰y, na fiyal kil anuwa̰y, na haal kil azi ne tok pyaso ŋgayya azi me.2 Gwan ɗeere fal ge ga̰l gwale hubluk ne fool ŋgirma. Ne na wak le may go mbo le may ya mbo kil azi ne tok pyaso ŋgayya ɗu, na haal mbo kil ɗu ne tok pyaso ŋgayya ɗu, táál ge ne koŋle na wak se twala mbo kil ɓyalar ne tok pyaso ŋgayya ɗu. 3 Na ziyar koŋleya se, ne nday pool ma ɗebceya na ta lay azi, tok pyaso ŋgayya ɗu, a ɗebce nday pool ma ɗu ɗu wol. A ɗebce nday pool mbe ma dagre da ne fal mbe. 4 Fal mbe ka eya ge nday ma wol para azi pal, ndwara go, ge ataa ma ndwara saŋgeya le kuu, ataa ndwara le mbii, ataa ndwara le ham, ataa le sya me. Nama duur ma ga le zi ya, fal pe se. 5 Fal mbe wak dṵṵl mbo tok ɓyan-sut ɗu, na wak gurgiya somndol dimma ne seɗe wak go, kat syalla dimma ne uwara wak folla go, na pul ame mam litre dudubu kis para wara azi.
6 Gwan ɗeere fal ta wol, é nama zok ge Dok ne zi, anuwa̰y le matoson go, anuwa̰y le magul go me, ne usi kaŋ ge a ne ke tuwaleya ge tilla uzi ma pe. Mam ge ne fal ge ga̰l go me ɗe, da ne naa ge ke tuwaleya ma pe, a usi ta da ne na.
Kaŋ ge a ne ɗeere nama ge may ma ne zok ge Dok ne pe
7 A ɗeere ɗuli kal ma wol ne dinar, njaŋgeya ge a ne njaŋge pal, a e nama ge zok ge Dok ne zi, anuwa̰y le matoson pal, anuwa̰y le magul pal me. 8 A nṵsi tabul ma wol, a e nama ge zok ge Dok ne zi, anuwa̰y le matoson pal, anuwa̰y le magul pal me. A ɗeere seɗe vya ma kis ne dinar.
9 A ver yapul ɗu ne naa ge ke tuwaleya ma pe, a gwan ver yapul ge ga̰l ɗu, a par na zok wak ma, a so̰y zok wak mbe ma se ne fool ŋgirma.
10 A e fal ge ga̰l ge zok ge Dok ne le matoson pal, ge na ziyar le ge mbii ge go. 11 Huram ɗeere hṵli ge kan sḭḭm ma, ne pel ma, ne seɗe vya ma. Ago no ge Huram ne á temel ge gan Salomon ne ho̰ na kerra ge zok ge Dok ne zi.
Isiya ge kaŋ ge Huram ne só nama pet
12 No a kaŋ ma ge Huram ne só nama ne pet ne zok ge Dok ne pe: Uwara zok pul ma azi, ne bama kaŋ eya pala digi ma gwale hubluk, ne kaŋ ge zorra dimma ne kool go ma azi ndwara kage kaŋ ge é uwara zok pul ma pala digi ge gwale hubluk mbe ma se. 13 Uwara grenad tolla ma kikis anda kageya ge kaŋ ge ne kool go ma ta lay azizi koŋle kaŋ ge é uwara zok pul ma pala digi se. 14 Huram só pus ma, ɗeere fal ma eya nama pal me. 15 Ɗeere fal ge ga̰l ge gwale hubluk, eya ge nday pool ma wol para azi pal. 16 Ɗeere hṵli ge kan sḭḭm ma, ne pel ma, ne kaŋ ge gàn duur ma.
Kaŋ ge Huram-Abi ne ɗeere nama mbe ma no pet hon Salomon ne zok ge Dok ne pe, ɗeere nama da ne fool ŋgirma ge siŋli. 17 A ɗeere kaŋ mbe ma suwar zi, ge babur pul ge maŋgaɗam Urdun ne go, suwal Sukot ma ne Sereda buwal zi. 18 Kaŋ ge Salomon ne ke mbe ma ka gḛ ge be a wan dṵṵl ge fool ŋgirma ge a ne ke kaŋ mbe ma ne na pe to.
19 Salomon gwan ɗeere kaŋ ge ɗogle ma ne dinar ne zok ge Dok ne pe: twal tuwaleya ge dinar ne dukan tilla pe, tabul ge dinar ge katugum ge ne tuwaleya pe ma ne kan ne na pal, 20 ɗuli kal ma ne bama ɗuli ma ne dinar ge siŋli. A dun ɗuli mbe ma sorra ge zok ge mbegeya uzi hini cat zi eya ma pal. 21 Ne kaŋ dimma ne uwara wak folla go ma, ne ɗuli ma, ne gān ge ne ɗuli kal pe ma, a ɗeere nama da ne dinar ge siŋli gḛ. 22 Wa̰le ma, ne seɗe vya ma, ne seɗe ma, ne kaŋ abe ol wak ma, a ɗeere nama da ne dinar ge siŋli. Zok wak ge pul zi ge ge zok ge mbegeya uzi hini cat ne, ne zok ge Dok ne wak ge ga̰l, a so̰y nama da ne dinar.