Maan ma ne ɓyale ma
16
1 Ɓase ge Israyela vya ma ne ma pet, a ɗage ne Elim ya, a det ya ful pul ge Sin ne go, na ge ne Elim ma ne njal Sinay buwal zi. Ne swaga ge a ne ɗage ne suwal Masar ya go, a dé ya go go dam wol para anuwa̰y ge saba ge azi ne go. 2 Pehir ge Israyela ne ma pet a ɗage sal fare Musa ma ne Aaron pal ful pul zi. 3 Israyela vya ma jan nama go: «Golgo Bage ɗiŋnedin hun i dana suwal Masar ya, swaga ge i ne ka kote ta zam duur i kaja̰le ma wak go, ne katugum ma huri ta. Aŋ gene i ya ful pul mbe no zi ndwara pur i uzi kucup ne kyamal!»4 Bage ɗiŋnedin jan Musa go: «Mbi ma̰ kan aŋ kaŋzam ne digi zi ya se. Dam ne dam ɓase ma mbo ka mbo abe bama kaŋzam ge mbyat dam ɗu. Go no, mbi mbo kugi nama, nama mbya ke mborra mbi eya ma pal mbyat ko de. 5 Dam ge myanaŋgal go, a mbo abe waɗeya pal azi ge dam ge may ma ne nṵsiya.»
6 Musa ma ne Aaron jan Israyela vya ma pet go: «Ma̰ gasamal no, aŋ ma̰ kwa go na Bage ɗiŋnedin ndage aŋ ne suwal Masar diŋ ya zum ne. 7 Kwap cya̰wak aŋ ma̰ kwa hormo ge Bage ɗiŋnedin ne. Ago Bage ɗiŋnedin za̰ aŋ fare salla ge aŋ ne sá na pal ma. I ɗe, i wuɗi ma ne koko ge aŋ ba sal fare i pal ɗaa?» 8 Musa jan nama go: «Ma̰ gasamal no Bage ɗiŋnedin ma̰ hon aŋ duur zamma, kwap cya̰wak ma̰ hon aŋ kaŋzam mbyat aŋ huriya. Bage ɗiŋnedin za̰ fare salla ge aŋ ne sá na ma. I ɗe, i wuɗi ma ne koko, aŋ sá fare be i pal to, aŋ sá Bage ɗiŋnedin pal.»
9 Musa jan Aaron go: «Jya̰ pehir ge Israyela vya ma ne ma pet go: Mbo me ya Bage ɗiŋnedin ndwara se, ago na sḛ za̰ aŋ fare salla ma.» 10 Swaga ge Aaron ne ka jan pehir ge Israyela vya ma ne ma fare ɗe, a saŋge bama ndwara le ful pul zi ya, a kwa hormo ge Bage ɗiŋnedin ne dyanna ya pḭr zi.
11 Bage ɗiŋnedin jan Musa go: 12 «Mbi za̰ fare salla ge Israyela vya ma ne. Jya̰ nama go: Ma̰ gasamal no, aŋ ma̰ zam duur, kwap cya̰wak, aŋ ma̰ ɓol kaŋzam mbyatɗa huri ta. Go no aŋ ma̰ kwa go, mbi Bage ɗiŋnedin, mbi Dok ge aŋ ne ne.»
13 Gasamal, ɓyale ma ɗage ya, a bar nama swaga katɗa go pet. Cya̰wak, mbyar kulbi se nama swaga katɗa ziyar ma go pet. 14 Swaga ge mbyar ne abe uzi go, kaŋ furmiya zaaso dimma ne tuwar-ndaar ge ne swar ne digi go gá kanna suwar pal ful pul zi. 15 Israyela vya ma ka ndil na, a ka ele ta go: «A da ne go ɗaaa?» Ago a wan na pe to. Musa jan nama go: «A kaŋzam ge Bage ɗiŋnedin ne ho̰ aŋ zamma ne. 16 Ndi, wak honna ge Bage ɗiŋnedin ne no: Ndu ge daage na abe na pool zamma pal, ndwara koro pul ɗu. Ndu ge daage na abe isiya ge naa ge ne na yadiŋ ma pal.» 17 Israyela vya ma ke mbe go no. Naa ge abe gḛ ma kat, naa ge abe woɗege ma kat me. 18 A ka ŋgay na da ne koro, nama ge a ne ka abe gḛ ma be ka waɗe nama pal to, nama ge ne ka abe woɗege ma, a be ka woɗegeya to me. Ndu ge daage ka abe na pool pal.
19 Musa jan nama go: «Ndu a̰me na dwaabe na digi ɗiŋ cya̰wak to.» 20 Amma a za̰ Musa to. Naa a̰me ma yá̰ na dwaabeya digi ɗiŋ cya̰wak, iyal sabayso, saŋge huri bir. Musa hot na laar nama pal. 21 Cya̰wak tatap, ndu ge daage abe pool ge na ne pal. Ago swaga ge gyala ne ɗage det se, na sḛ ɗese uzi.
22 Dam ge myanaŋgal go, nama sḛ ma abe kaŋzam ge dam azi ne, ndwara go koro pul azi ne ndu ge daage pe. Ga̰l ge vuwal pe ge Israyela vya ma ne ma mwaɗak a mbo ya jan Musa pal. 23 Musa jan nama go: «A fare ge Bage ɗiŋnedin ne jya̰ ne. Kwap a dam ɗigliya, dam ge Bage ɗiŋnedin ne mbege na ne na sḛ pe ne. Kaŋ ge ne mbya satɗa ma, sá me nama, kaŋ ge ne mbya sḭya ma, sḭ me nama, kaŋ ge ne ga ya ma, ya̰ me nama dwaabeya digi ɗiŋ cya̰wak.» 24 A ya̰ na dwaabeya ɗiŋ cya̰wak dimma ne Musa ne ho̰ bama na wak go. Kaŋ mbe hubi to, iyal sabayso to me. 25 Musa jan nama go: «Zá me na uzi ma̰ no, ago ma̰ no a dam ɗigliya ge Bage ɗiŋnedin ne ne. Ma̰ no aŋ ɓol na ful pul zi to. 26 Dam ma myanaŋgal aŋ mbo ka abe na, amma dam ge ɓyalar, a dam ɗigliya ne, mbo kat to bat.»
27 Dam ge ɓyalar go, naa a̰me ma mbut a wat zum ne abeya pe, a ɓol a̰me to. 28 Bage ɗiŋnedin jan Musa go: «Aŋ mbo gwan ne aŋ pala wak honna ma ne mbi eya ma pe se dḛ ma del ɗaa? 29 Kwa me go, mbi ho̰ aŋ dam ɗigliya, ndwara go aŋ ɗigli ta, da ne pe no, mbi ho̰ aŋ kaŋzam dam ge myanaŋgal go no ne dam azi pe. Ago ndu ge daage ka na byalam ge ɗu go. Dam ge ɓyalar go, ndu ge daage na ka na yadiŋ, na wá zum to.» 30 A go no, ɓase ma ɗigli ta dam ge ɓyalar go no.
31 Israyela vya ma hon kaŋzam mbe dḭl maan, ka zaaso saal taɗak, ka zam tuli dimma ne katugum ge a ne ke na ne daaram go. 32 Musa jan go: «Ndi wak honna ge Bage ɗiŋnedin ne no: Koy me maan digi koro pul ɗu ne aŋ vya kon ma pe. Ne da pe, nama kwa kaŋzam ge mbi ne ho̰ aŋ na ful pul zi swaga ge mbi ne abe aŋ ne suwal Masar diŋ ya zum go.» 33 Musa jan Aaron go: «He il, ká̰ maan na zi koro pul ɗu, é na Bage ɗiŋnedin ndwara se, ne da pe, na gá koyya doŋ pe ma ne doŋ pe ma.» 34 Dimma ne Bage ɗiŋnedin ne ho̰ Musa na wak go ɗe, go no me, Aaron e na gwal ge wak tuli ne ma ziyar go, ne da pe, na ka koyya digi.