Kaŋ mballa ge Musa ma ne Israyela vya ma ne
15
1 Go no, Musa ma ne Israyela vya ma a her kaŋ mballa uware Bage ɗiŋnedin go:«Mbi uware Bage ɗiŋnedin,
ago waɗe waɗe,
Buwale tisi ma ne naa ge ne pus pore digi ma
maŋgaɗam ga̰l se ya.
2 Bage ɗiŋnedin a mbi pool ne,
a na e mbi mbal kaŋ ne,
a mbi Bage máya ne.
A mbi Dok ne,
mbi mbo ka siya̰le na.
A Dok ge mbi bá ma ne ne,
mbi mbo ka dore na.
3 Bage ɗiŋnedin a bage mbal pore ne,
na dḭl Bage ɗiŋnedin.
4 Bwa pus pore ge Faraon ne ma, ne na asagar ma
maŋgaɗam ga̰l yuwam se ya,
na pus ge garlaŋ pore ma ne
pú maŋgaɗam ga̰l yuwam se ya.
5 Mam sululi nama pal,
a ɗigli mam pe se ya dimma ne njal go.
6 O Bage ɗiŋnedin, mo tok matoson pool ŋguŋgu,
O Bage ɗiŋnedin, mo tok matoson pur naa ge ho̰l ma go.
7 Ge pool ge ne waɗe waɗe ge mo ne zi,
mo pú mo naa ge ho̰l ma pe uzi.
Ge pore juliliya ge mo ne zi,
mo bwá nama pe dimma ne ol ne til kazaam go.
8 Ne o̰yom ge mo ne nda na ne mo vo̰r zi ya,
mam ma kote ta digi,
mam so̰o̰l gá mḛ sogeya dimma ne gulum ga̰l go.
Suwar ge ne maŋgaɗam ga̰l yuwam pul se ya sirsi digi.
9 Naa ge ho̰l ma ka janna go:
I ma̰ yan nama pe,
i wan nama,
i ma̰ pál nama kaŋ ma,
laar ɓyareya ge i na pal,
i ma̰ pwat i kasagar ma,
i ma̰ dibi i tok nama pal.
10 Mo uusi saam,
maŋgaɗam ga̰l sululi nama pal,
a ɗigli mam pe se ya dimma ne byaŋlar go.
11 O Bage ɗiŋnedin, ne dok ma buwal zi,
a wuɗi mbya ne mo go ne ɗaa?
Mbegeya ge mo ne zi,
a wuɗi mbya ne mo go ne ɗaa?
Mo mbya naa sya mo vo,
mo mbya uwareya,
mo ke kaŋ ge ajab ma.
12 Mo tyare mo tok matoson,
suwar uɗi nama uzi.
13 Kwa a̰se ge mo ne zi,
mo ɗame ɓase ge mo ne zú nama mbe ma.
Pool ge mo ne zi,
mo ɗame nama mbo mo swaga katɗa ge mbegeya ya.
14 Pehir ge ɗogle ma za̰ fare mbe,
a abe ndatɗa rarag,
Filistiya ma iigi digi
dimma ne ndu gwale ne ke twala go.
15 Vo ge ɓaŋlaŋ wá̰ ga̰l ge suwal Edom ne ma,
naa ge pateya ge suwal Mowab ne ma, abe ndatɗa rarag,
naa ge ne suwal Kanan go ma sḛ iya tiliŋ.
16 Vo ge ɓaŋlaŋ mbo wan nama.
Ne pool ge mo ne,
a mbo zane wak ɗamal
dimma ne njal ne dol sù go,
ɗiŋ, O Bage ɗiŋnedin, mo ɓase ma kale ne ɓya!
Ɗiŋ ɓase ge mo ne yá nama yat ma kale ne ɓya.
17 Mo mbo gene nama ya,
mo hon nama swaga katɗa mo joo go njal pala digi,
ge swaga ge mo ne nṵsi na ne mo pe katɗa go, o Bage ɗiŋnedin,
ge swaga ge mbegeya, ge mo ne sḭ na ne mo tok zi go, o Bageyal!
18 Bage ɗiŋnedin a gan ne ɗiŋnedin.»
19 Ago tisi ge Faraon ne ma, ɓanna ne na pus pore ma, ne na naa ge ne pus pore go ma, a wá maŋgaɗam ga̰l pul se ya, Bage ɗiŋnedin gwa̰ ne mam ya nama pal no. Amma Israyela vya ma mbo maŋgaɗam ga̰l pul se fiya̰l. 20 Aaron ná vya ge gwale Maryam, na ge anabi, he gaŋga vya na tok go, naa zaab ma pet a zut zum na pe go ne gaŋga vya ma bama tok go, ne kaŋ ndalla me. 21 Maryam ka e nama kaŋ pe mballa go:
«Uware me Bage ɗiŋnedin,
ago, ŋgay pool waɗeya ge na ne,
pú tisi ma ne naa ge ne pus pore go ma
pe maŋgaɗam ga̰l pul se ya.»
MBORRA GE ISRAYELA VYA MA NE FUL PUL ZI
(15:22—18:27)
Mam ge Mara ne
22 Musa ɗage ne Israyela vya ma ne maŋgaɗam ga̰l ge teer wak go, a her viya̰ mbo ful pul ge Chur ne ya. A ke dam ataa swaga mborra go ful pul zi, a ɓol mam to bat. 23 A det ya mam yaŋga Maraa wak go, amma a day njot mam ge Mara ne to, ne da pe ka zwala. Da ne no pe a to na dḭl no Mara, ndwara go zwala. 24 Ɓase ma ɗage sal fare Musa pal janna go: «I njó da ɗaa?» 25 Musa fyal Bage ɗiŋnedin ta. Bage ɗiŋnedin ŋgay na uwara a̰me, Musa dol na mam se, mam mbe saŋge kwaɗa ne njotɗa pe.
A swaga mbe go no, Bage ɗiŋnedin ho̰ ɓase ma eya ma ne wak honna ma no. A swaga mbe go no me, Bage ɗiŋnedin kugi nama no. 26 Na sḛ jan nama go: «Kadɗa aŋ za̰ mbi Bage ɗiŋnedin Dok ge aŋ ne fare ya, aŋ ke kaŋ ge mbi laar ne ɓyare ma, aŋ koy mbi eya ma, ne ke mborra mbi wak honna ma pal ɗe, mbi mbo mḛre aŋ ne moy a̰me ge mbi ne mḛre Masar ma ne na to bat. A mbi Bage ɗiŋnedin, bage ne zon aŋ ne.» 27 A det ya Elim go, ago baal pul Elim ka da ne mam tok ma pe wol para azi, ne tumur ma wara ɓyalar na wak go. A kat mam wak go gwa, swaga mbe go.