Geleya ge Dina ne
34
1 Dina ge Yakub ma ne Lea vya wat zum, ne da pe, na mbo ndil vya kale ge ne suwal diŋ ma. 2 Sichem, ge Hamor ndu ge Hiv ne vya, gan ge suwal ne vya, kwa Dina, zwal na, mbo fí ne na. 3 Na sḛ mbarge ne Dina ge Yakub vya, na laar wan na, ka jan na fare ndwara saŋge na haŋgal ya na pal. 4 Sichem jan na bá Hamor go: «Sá̰ mbi vya gwale mbe no.» 5 Yakub za̰ go, Sichem vḛne na vya Dina go. Ne jo̰ na vya ge sonmo ma gale ya swaga koy gii ma ful zi ya ɗe, gá katɗa wak ɗamal ɗiŋ nama gwan’a ɓya. 6 Hamor, ge Sichem bá mbo ɓol Yakub, jan na fare. 7 Swaga ge Yakub vya ma ne ya̰ ne ful zi ya, a ne za̰ fare mbe ɗe, a ndil go nama ndi bama senna, nama laar hot ge be to, ne kaŋ ge saaso ge Sichem ne ke pe, ne fiya ge ne fí ne Yakub vya pe, ké kaŋ ge ndu ne mbya ke na Israyela vya ma buwal zi to bat. 8 Hamor jan nama go: «Mbi vya Sichem laar wa̰ aŋ vya ge gwale wan, mbi kaɗe aŋ, ya̰ me na, na ka yàl ne na. 9 Ne gá ne zḛ no, i da ne pool hon aŋ i vya ge gwale ma kat yàl, aŋ sḛ ma hon i aŋ vya ge gwale ma kat yàl me. 10 Aŋ da ne pool kat dagre ne i, suwal gá ge aŋ ne. Aŋ da ne pool kat na go, aŋ ka saŋge aŋ tok, aŋ ɓol aŋ swaga ma ne aŋ pala.»11 Sichem jan Dina bá ma ne na ná vya ma go: «Kwa me mbi a̰se, kaŋ ge aŋ ma̰ ɓyare ya ne mbi ta, mbi ma̰ hon aŋ na. 12 Ko aŋ há mbi bware sanna gḛ, ne bobo ma gḛ ceɗed puy ɗe, mbi ma̰ hon aŋ nama, amma aŋ ho̰ mbi aŋ vya kat yàl.» 13 Yakub vya ma gwan Sichem ma ne na bá Hamor fare ne son, ne Sichem ne vḛne bama ná vya ge gwale Dina pe. 14 A jan nama go: «I ne pool hon i ná vya ndu ge be vyan ba̰y to kat yàl ne na to. Ago mbo gá wak sáso ne i pe. 15 I fare ge jan aŋ myalam ɗu kikit, ago aŋ naa sonmo ma nama vya̰ ba̰y dimma ne i go. 16 Go no, i ba hon aŋ i vya ge gwale ma kat yàl, i sḛ ma ba kat yàl ne aŋ vya ge gwale ma me. 17 Amma kadɗa aŋ vin vyan ba̰y to, i mbo wan i ná vya ge gwale, i mbo, i mborra.»
18 Nama fare janna mbe ke Hamor ma ne na vya Sichem sḛ tuli. 19 Vya dore mbe no, be ke dṵṵl ne fare mbe to, ago na laar wa̰ Yakub vya ge gwale mbe gḛ ge be to. Na sḛ me, a ndu ge ne hormo gḛ ne na bá yadiŋ ne.
20 Hamor ma ne na vya Sichem a mbo bama suwal viya̰ wak pala zum ya, a jan bama naa ge suwal ma go: 21 «Naa mbe ma, a naa ge kwaɗa ne nee ma ne. Nama ka nee suwal go, nama ka saŋge nama tok, suwal ya go fiyal ne nama pe! Nee da ne pool san nama vya ge gwale ma, nama sḛ ma san nee vya ge gwale ma me. 22 A vin’a kat dagre ne nee, ndwara go nee ba gá naa ge ɗu ma, kadɗa nee naa sonmo ma vin’a vyan ba̰y dimma ne bama go. 23 Kadɗa nee vin nama ya kat dagre ne nee, nama kavaar ma ne nama kaŋ kwaɗa ma mbo gá ge nee ne.» 24 Nama ge a ne ka viya̰ wak pala go ma pet, a vin fare ge Hamor ma ne na vya Sichem ne. Naa sonmo ge ne suwal diŋ ma pet a vyan ba̰y.
25 Dam ge ataa go, ne jo̰ a ɗage ya njot yál ɗe, Yakub vya ge azi ma, Simeyon ma ne Levi, Dina ná vya ma, a her bama kasagar ma, a wat suwal diŋ sèlè jyan, a hun naa sonmo ma uzi kakaɗak, 26 a hun Hamor ma ne na vya Sichem me. A gwan wan Dina ne Sichem diŋ ya me. 27 Yakub vya ma kan ta, a mbo pál kaŋ ma ne suwal diŋ, ne a ne vḛne bama ná vya ge gwale pe. 28 A pál nama gii ma ne nama nday ma, ne nama kwara ma, ne kaŋ ge ne suwal diŋ ma, ne ge ne ful zi ge ma mwaɗak. 29 A pál nama kaŋ ma mwaɗak, nama gwale ma, ne nama vya ma mwaɗak ne nama yàl ma diŋ.
30 Yakub jan Simeyon ma ne Levi go: «Aŋ ke mbi sulgu, aŋ hat mbi ya sone naa ge suwal ma ndwara zi, Kanan ma ne Feresi ma ndwara zi. A mbo ɓan bama pe ya digi mbi pal, a mbo hál mbi, ne jo̰ mbi naa ma woɗege baŋ. A mbo burmi i ne mbi vya ma uzi kakaɗak.» 31 Nama sḛ ma jan go: «Be mbyat a ke i ná vya dimma ne gwale kaya go to!»