Ɓol ta ge Yakub ma ne Esawu ne
33
1 Yakub her na pala digi, kwar Esawu ne mborra ya ne naa kikis anda na pe go. Var na vya ma se, Lea ma, ne Rachel ma, ne na kale ge azi ma buwal zi. 2 E na kale ma ne bama vya ma mborra ndwara zḛ, é Lea ma ne na vya ma nama pe zi, go̰r ya dab, é Rachel ma ne Yusuf. 3 Na sḛ dol tene mborra nama ndwara zḛ, ge go na dé na ná vya ta ya, gur na koo se ɗiŋ ndwara ɓyalar. 4 Esawu her so ya na ndwara zi, mbo ya abe na na sḛ zi, ka komre na, a det fyaso jwak. 5 Swaga ge Esawu ne ka̰ na ndwara kwar naa zaab ma, ne naa jabso ma ɗe, ele na go: «A wuɗi ma ne no ɗaa?» Yakub jan na go: «A vya ge Dok ne ho̰ mo dore nama, kwaɗa ge na ne zi ma ne.»6 Kale ma ne bama vya ma a yan’a nama ta gwa, a gur bama koo ma se. 7 Lea ma ne na vya ma yan’a me, a ke mbe go me. Go̰r go dab, Rachel ma ne Yusuf yan’a, a gur bama koo ma se me. 8 Esawu ele na go: «Mo dwat ke ne vog ge mbi ne ɓó nama ya mbe ma no da ɗaa?» Yakub jan go: «A ndwara go, mbi ma̰ ɓol kwa a̰se ne mbi bageyal ta nde de!» 9 Esawu jan na go: «Ná vya, mbi da ne kaŋ ma zuliya bindik, koy mo kaŋ mbe ma ne mo sḛ pe.» 10 Yakub jan na go: «A go to, mbi kaɗe mo, kadɗa mo kwa mbi a̰se, ame bobo mbe ma no ne mbi tok go, ago swaga ge mbi ne kwa mo ndwara no, a dimma ne mbi ne kwa Dok ndwara fa̰ go, se no, mo ame mbi kwaɗa. 11 Mbi kaɗe mo, ame bobo ge mbi ne teme mo nama ya mbe ma no, ago Dok ke mbi kwaɗa, mbi da ne kaŋ ma mbyatɗa.» Yakub gwarge tene Esawu ta ɗiŋ, Esawu vin ame nama. 12 Esawu jan na go: «Ɗage me nee, nee ka̰ ta viya̰ go mborra, mbi dol tene mo ndwara zḛ.» 13 Yakub jan na go: «Mbi bageyal, kwa go naa jabso ma koo woɗege woɗege, mbi da ne gii ma ne nday ma ge a gale ne njot pam ne go, kadɗa nee har ta ya digi mborra dam ge ɗu pul zi, ago gii ma ya su mwaɗak. 14 Ya̰ mbi bageyal mbo mbi ndwara zḛ ya, mo dore ba gá twableya ɗeɗe ne kavaar ma, ne naa jabso me, ɗiŋ mbi ba det mo ta suwal Seyir ya.» 15 Esawu jan na go: «A kwaɗa ge mbi ya̰ mo mbi naa a̰me ma se mbut.» Yakub jan na go: «Kyaɗa go ɗaa? Mbi ɓyare ɗeŋgo go mbi bageyal na ame mbi na ta kwaɗa!» 16 Dam mbe go juju, Esawu her viya̰ gwan’a suwal Seyir go. 17 Yakub her viya̰ mbo Sukot ya, na sḛ sin na zok, lar gur ma ne na kavaar ma pe me. Da ne pe no, a ho̰ swaga mbe dḭl no go Sukota.
Yakub ɗage mbo kat suwal Sichem go