Fare pala hageya ge maktub ne
Swaga ndil maktub mbe no, nee kwa go Baybul a be maktub a̰me ɗu ne to, amma a maktub ma gḛ, maktub ma ɗu ɗu wara myanaŋgal para myanaŋgal ge naa pe hini hini ne njaŋge nama ne O̰yom ge Dok ne ta. Ago fare ge ne maktub mbe ma zi ma no pet a uusi uusi ne Dok ta ya, ndwara go, a Dok ka jan fare ne nama ne, ko ne na ka̰l fare ta dimma ne Musa ta go, ko ne O̰yom ge Dok ne ta dimma ne anabi ma ne naa ge may ma ta go.
Baybul varse pe azi, ndwara go Wak tuli ge zaŋgal ma ne Wak tuli ge giya̰l. Wak tuli ge zaŋgal njaŋge da ne wak ibriniya maktub a̰me ma njaŋge da ne wak aramiya me. Amma Wak tuli ge giya̰l njaŋge da ne wak grek.
Wak tuli ge zaŋgal e pe da ne pe dolla ge kaŋ ma ne pet, ne talla ge Dok ne tá pehir ge Israyela ne, nama ge ne tó ne hir ge Abraham ne zi ne da pe na ke wak tuli ne nama ndwara go nee Bage máya Jeso Kris tó ne nama zi. Mborra ge nama Dok ndwara se be kat iyalam go tiliŋ to, a ɓo yál ma: kyamal ma zi, ne mo̰r zi suwal Masar ya, ne iigiya ge bama naa ge gulum pala ma ne, ne mo̰r suwal Babilon ya. Amma Dok ka yuwale nama ne na fare ma, ka mḛre nama, ka zur nama me. A go no, ka teme nama na anabi ma ya no ndwara go nama jya̰ nama na laar ɓyareya ma, nama mḛre nama ne mborra ge nama ge jwap na ndwara se to pe.
Go no puy ɗe, Dok teme na vya ge laar wanna Jeso Kris ya no, na mbo ya suya ne naa pe pet, ago ndu ge daage pet ge ne hon fareba ya na ta na ɓo ndwara ge ɗiŋnedin. A na no ge nee ne ɓol na fare, ne na kaŋ kerra ma, ne na naa ge temeya ma kaŋ ge a ne ke ma ne nama maktub ge a ne njaŋge ma ne Wak tuli ge giya̰l zi. Wak tuli ge giya̰l ŋgay viya̰ máya Jeso Kris zi.
Baybul a fare ge Dok ne ne, ndu ge ne isi na mbya gwan ne na pala na fare janna ma pe se, hon fareba na fare janna ma ta, ne da pe kat ne ndwara ya na zi. Dimma ne jya̰ go:
«Ago, a be fare ge mbyaɗam ne to, amma kat ne ndwara ge aŋ ne ya na zi.» (Dwa 32:47)
«Amma a njaŋge kaŋ mbe ma no, ne da pe aŋ ho̰ fareba go Jeso Kris ne, a Dok Vya ne, aŋ ho̰ fareba, aŋ ɓo ndwara dḭl ge na ne zi.» (Yoh 20:31)
Fare pala hageya ge wak tuli ge zaŋgal ne
Wak tuli ge zaŋgal a maktub ge Yuda ma ne ne. Dok Bage ɗiŋnedin jya̰ nama na fare ma, ne na Eya ma ya maktub mbe zi.
Wak tuli ge zaŋgal da ne maktub ma ɗu ɗu tapolɗu para lamaɗo, varseya pe hini hini anuwa̰y. Varseya ge zḛ ge a maktub ma anuwa̰y ge a ne tol nama «Eya ge Musa ne ma». Ge maktub mbe ma zi, nee e pe ɓol pe dolla ge kaŋ ma ne pet, ne talla ge Dok ne tá pehir ge Israyela ne, ne gwanna ge nama ne ne mo̰r ge suwal Masar ne ya, ne honna ge ne ho̰ nama na Eya ma ge ful pul zi swaga mborra go. Maktub mbe ma anuwa̰y mwaɗak, maana ma jan go na Musa njaŋge nama ne.
Varseya ge azi a maana ge Israyela vya ma ne. Da ne maktub ge Juswa ne go mbo maktub ge Ester ne ya, maktub ma ɗu ɗu wol para azi. Nama mbe ma no, a wan maana ge Israyela vya ma ne ma pe, ne watɗa ge nama ne ya suwal Kanan go, ndwara go suwal wak tuli go, ne zaman ge naa ge kun sarya ma ne go, ne maana ge nama gan ma ne, ɗiŋ mbo palla ge nama ne katɗa ge nama ne paal zi ge suwal Babilon ya, ne gwanna ge Yuda ma ne ne paal zi ya.
Varseya ge ataa a fare sḭ ma ne kaŋ mballa ma ne, a maktub ma ɗu ɗu anuwa̰y. Maktub mbe ma zi, nee ɓol fare sḭ ma ne fare a̰me ma le ge kwarra ma pal, ne kaŋ mballa ma. Da ne maktub ge Ayuba ne go ɗiŋ mbo maktub Kaŋ mballa ge ne waɗe kaŋ mballa ma.
Varseya ge anda a maktub ge anabi ma ne ma, maktub ma ɗu ɗu wol para myanaŋgal. Ne nama buwal zi, anabi ge ne njaŋge fare gḛ ma a tol nama anabi ge ga̰l ma, ge ne njaŋge fare woɗege ma a tol nama anabi ge jyale ma. Nama fare janna ma zi, a tol Israyela vya ma nama gwa̰ ya ke laar ɓyareya ge nama Dok ne, ne mḛre nama ne pala gwanna se to ge nama ne pe. A ka mḛre pehir ge ɗogle ge ne ka ke pehir ge Israyela ne yál ma me.
Varseya ge go̰r dap, ge anuwa̰y, a maktub daalam ge Danyel ne. Dok ŋgay Danyel kaŋ ge ne mbo mbo ya ma.
Wak tuli ge zaŋgal a pe dolla ge naa ge Dok ne ma ne, ma̰ no nee ge Kris ne ma nee ɓol moɗegeya ma gḛ, ne kaŋ ge ne mbya kerra Dok ndwara se ma, ne fare ma gḛ ge Wak tuli ge zaŋgal zi. Ɗiŋ ma̰ no maktub mbe ma da ne hamba gḛ ge be to ne nee ge Kris ne ma pe.
Fare pala hageya ge wak tuli ge giya̰l ne
Wak tuli ge giya̰l da ne maktub ma ɗu ɗu wara azi para ɓyalar, mwaɗak a njaŋge nama da ne wak grek. A jan fare ge Jeso Kris ne, ne pe dolla ge ɓase ge Dok ne ma ne Kris zi, ne moɗegeya ya ma ne hateya ma katɗa ge viya̰ ge dosol ge Dok ne go Kris Jeso zi, ne gwanna ge Jeso ne ya ndwara mbo ya abe na naa ma.
Nee da ne pool varse maktub ge Wak tuli ge giya̰l ne ma se pe anda.
Varseya ge zḛ ge da ne maktub ma ɗu ɗu anda, a nama ge a ne tol nama fare ge kwaɗa ge Jeso Kris ne. Nama mbe ma no a wan fare ge Jeso ne ma pe, ne tolla ge na ne go ɗiŋ mbo na siya, ne na fare ge ne hate ma, ne na kaŋ ŋgayya ge ne ka kerra ma ne pool ge na Bá ne ho̰ na ta. A maktub mbe ma no zi ge nee ne ɓol naa ge Jeso ne tó nama, saŋge nama na naa ge ame hateya ma no. Swaga ge ne ɗage gwan mbo na Bá ta digi ya, ho̰ nama na wak no go nama mbo ɓol pool ge ne mbo ne digi zi ya, go no nama mbo an suwal ma go pet oy fare ge Dok ne, ne da pe ndu ge daage pet ge ne hon fareba ya na ɓo máya.
Varseya ge azi da ne maktub ɗu, na sḛ no wan temel ge naa ge temeya ge Jeso ne ma ne ke go̰r siya ge na ne go, ne pe dolla ge ɓase ge Dok ne ma ne. Ago ne pool ge O̰yom ge mbegeya ta, na ge a ne ɓo na dam Pantekot go, a oy fare ge Dok ne naa ta, ne suwal ga̰l ma ne suwal ge jyale ma go, naa gḛ a ho̰ fareba no, ne Yuda ma buwal zi, ne pehir ge ɗogle ma buwal zi me. Ne jo̰ a ka ɓol yál ma gḛ: wanna daŋgay zi ma, siya ma, ne iyalla ma, ŋgwabeya ma puy ɗe, a be kan bama tok digi to, a ke temel ge bama Bageyal ne ya̰ bama na wak na pal. A na no ge nee ne ɓo viya̰ ge kwa Dok ge fareba Jeso Kris zi.
Varseya ge ataa da ne maktub ma ɗu ɗu wara azi para ɗu, nama mbe ma no mwaɗak a maktub ge naa ge temeya ma ne ka njaŋge hon ɓase ge Dok ne ma ge suwal a̰me ma go, ko ne maktub ge a ne ka njaŋge hon naa ga̰l ge Dok ne a̰me ma ne temel ge ne nama tok kerra pe. A go no, swaga isi nama go nee ɓol moɗegeya ma, ne hateya ma, ne mḛreya ma ge fare a̰me ma ge ne ke ne bama viya̰ go to ma pal, ne yuwaleya ma me ge katɗa ge Dok zi pal. Ndu ge ne njaŋge maktub gḛ ne swaga mbe no zi a Bulus. Nee ɓol sinna ge ɓase ge Dok ne ya maktub mbe ma no zi, ne donna ge nama ne me. Uwale, hateya ma ge naa ge ne mbya kat ga̰l ndwara in ɓase ge Dok ne ma ya swaga mbe no zi.
Varseya ge anda, a Daalam ge Yohanna ne. Dok e Yohanna kwa kaŋ ge ne digi zi ya ma, ne kaŋ ge ne mbo mbo ya ma, ɗiŋ gwanna ge Jeso ne ya ndwara mbo ya abe na ɓase ma go. Na no a maktub ge ne moɗege Dok vya ma nama ka nṵsiya jejew ne dam gwanna ge Jeso ne ya pe.
Wak tuli ge giya̰l ŋgay nee viya̰ máya Jeso Kris zi, moɗege nee ge mborra ge nee ne Dok zi pal, yuwale nee, nee ka jejew ne gwanna ge Jeso ne ya pe. Kadɗa yál ma, ne iigiya ge dunya ne ma ya go puy ɗe, dam a̰me ɗu yál mbe ma no pet a mbo á, Jeso mbo mbo ne na muluk ge fareba ne ge dosol ya ne na ɓase ma pe.