मार्गदर्शन
(फिलिप्पियों ४:१-९)
4
1 हे म्यर प्रिय भाइयो, तुम जनर बारि मिं मिकैं भौत गर्व और आनंद छु, मिकैं तुमर भौतै निशास लागि रौ। तुम सब प्रभु मिं इसिकै भरौस करनै रया।2 मी यूओदिया और सन्तखै द्विवै स्यैणियों धैं गुजारिश करनू कि तुम झगड़ नि करिबेर प्रभु मिं एक हबेर रओ। 3 म्यर दगाड़ काम करणी, मी तुधैं लै बिनती करनू, कि तुम उनरि मधत करो। किलैकि उनुल म्यर दगाड़ मेहनत करिबेर भलि खबर फैलूणक काम करौ, और उनर नाम जीवनक किताब मिं लेखि छु।
4 तुम सब प्रभु मिं आनंदित रओ। मी फिर कूंनू, आनंदित रओ! 5 तुम सब मैंसोंक दगाड़ भल व्यहवार करो, और याद धरो कि प्रभु यीशु जलदी उणी छन। 6 के लै बातक चिन्ता नि करो, लेकिन हरेक बात मिं प्रार्थना और बिनती धन्यवादक दगाड़ परमेश्वरक सामण धरो। 7 और परमेश्वरक तरफ बे मिलणी शांति जो समझ हबेर दूर छु, तुमर दिल-दिमाग कैं यीशु मसीह मिं हमेशा समाइबेर धरि राखॉल।
8 भाइयो, उ बातोंक तरफ ध्यान लगाओ जो सांचि, आदरणीय, न्याय, पवित्र, भली, और तारीफ करणक लैक छन। बस उनुमिं आपण मन लगाई करो। 9 जे ले तुमुल मिधैं सिखौ-सुणौ और मी मिं देखि रॉखौ, उनरै अनुसार करो। और परमेश्वर जो शांतिक छवाई छु, उं तुमर दगाड़ रौल।
परमेश्वरक जरियल हम सब सह सकनू
(फिलिप्पियों ४:१०-२०)
10 मी प्रभु कैं धन्यवाद करिबेर भौत खुशि छूं कि इदुक दिनोंक बाद तुमुल म्यर लिजी भेट भेजौ। पक्क तुम पैली लै म्यर लिजी चिन्ता करछिया, लेकिन उकैं देखूणक मौक नि मिल। 11 मी आपण क्वे कमी-पेशीक कारणल यौ नि कूणय, किलैकि जे लै म्यर पास छु मील उमिं खुशि रुण सिखि है। 12 मिं दीन-हीन हालत और सम्पन्नता मिं लै रुण जाणनू, और हर बात हर परिस्थिति मिं संतुष्ट हुण सिखि है। 13 परमेश्वर जो मिकैं ताकत दिंनी, उनर जरियल मी सब चीज सह सकनू।
14 फिर लै तुमुल भल करौ, कि दुखक बखत मेरि मधत करी। 15 और जब तुमुल पैली भलि खबर सुण हैछी, तब लै तुमुल मेरि मधत करी, जबकि और क्वे लै दुसर विश्वासी समुदायल नि करि। 16 और जब मी थिसलुनिका मिं छी, तब लै तुमुल बार-बार मेरि जरवतक समान भेजौ।
17 यौ बात न्हैं कि मी दान चांनू, बल्किन यौ चांनू कि तुमुकैं यैक बदाव खूब आशीश मिलो। 18 ऑब यैक लिजी कि तुमुल इपाफ्रुदीतक हात यौ दान भेजौ, जतुक लै मिकैं जरवत छी, यै हेबेर जादे मिकैं मिलौ। तुमर दान परमेश्वरक लिजी एक खुशबुदार बलिदान छु, जैल उं खुशी हुंनी। 19 और परमेश्वर तुमर हर जरवतों कैं हमार यीशु मसीक धन-दौलतल पुर करॉल, जो महिमा सहित उनर पास छु।
20 यौ बात पक्कि छु कि हमर पिता परमेश्वरक महिमा हमेशा-हमेशा तलक हुनै रओ!
आखिरी बात
(फिलिप्पियों ४:२१-२३)
21 जो लै यीशु मसीक विश्वासी छन, उनुकैं म्यर तरफ बे पैलाग कया। और जो म्यर दगाड़ छन, उं लै तुमुकैं पैलाग कूणईं। 22 होय, यांक सब विश्वासी मैंस, खाश कर सम्राटॉक महल मिं काम करणी, तुमुकैं पैलाग कूणईं।
23 प्रभु यीशु मसीक दया तुमुमिं रओ।