भरौस करणल हम धार्मिक ठैरनू
(फिलिप्पियों ३:१-११)
3
1 हे म्यार भाइयो, प्रभु मिं हमेशा मगन रओ। मिकैं उं बातों कैं बार-बार तुमुकैं लिखण मिं के परेशानी न्हैं, किलैकि यैल तुमेरि हिफाजत ह्वेलि। 2 गलत शिक्षा दिणी कुकूरों बे, जो सिखूंनी कि खतना करण जरूड़ी छु, सावधान रओ। 3 सांचि खतनावॉल तो हम छूं, जो पवित्र आतमाक जरियल परमेश्वरक अराधना करनू। हम मैंस और उनर रीतियों मिं भरौस नि करिबेर केवल यीशु मसीक कारणल खुशि छूं।4 मी तो दुसर मैंसोंक हबेर जादे भरौस आपुं मिं धरि सकछी। 5 म्यर पैद हुणक अठूं दिन म्यर खतना हौ। इस्रायली बिन्यामीन जातिक म्यर गोत्र छु, मी एक पक्क यहूदी और कठोर नीमोंक पालन करणी फरीसी दलक धर्म गुरु छी। 6 यां तलक कि अगर क्वे नीमों कैं मानणल धर्मी है सकुं, तब यौ मी छी। मी इतुक जोशिल छी कि मी यीशु मिं भरौस करणियों कैं गलत समझिबेर उनुकैं सतूंछी।
7-8 लेकिन यौ बातों कैं, जनुकैं मी पैली भौत खाश मानछी, ऑब उं म्यर लिजी बेकार छन, किलैकि ऑब मी यीशु मसीक दगाड़ मिलि गोयूं। उनर लिजी मील उं सब छोड़ि है। 9 मी उं सब नीमों कैं मानिबेर आपुं कैं धार्मिक नि बणै सकछी, लेकिन यीशु मसीह मिं भरौस करणक कारणल परमेश्वरल मिकैं धार्मिक ठैरा।
10 बस मी यौ चांनू कि यीशु मसीह कैं और लै जादे जाणि ल्यूं, और उनर दुबार ज्यून हुणक सामर्थ कैं महसूस करूं। और उनरै चारि सताव कैं मौत तलक सहबेर उनर दगाड़ भागिदार बणूं। 11 जैल एक दिन मी मौत बे दुबार ज्यून हुण तलक पुजि सकुंल।
परमेश्वरक बातों मिं बढ़ण
(फिलिप्पियों ३:१२-२१)
12 मी यौ नि कूणय कि मिकैं यौ सब मिलि गो, और मी निष्पाप बणि गोयूं, पर मी अघिल बढ़णयूं, जैल मिकैं उ सब मिलि सको, जैक लिजी यीशु मसील मिकैं आपण हात मिं ली रॉखौ।
13 होय, मिकैं पत्त छु कि ऐल तलक मील यौ सब नि पै रॉख। लेकिन मी पैलियॉक बातों कैं भुलिबेर, अघिलकि बातों मिं नजर धरिबेर हिटुं। 14 जस एक दोड़णिवॉल जोशल आपण लक्ष्यक तरफ दौड़बेर जां, उसिकै मी लै सिद्द आपण लक्षक तरफ जांनू। और यौ परमेश्वरक इनाम छु, जैल मी हमेशाक लिजी यीशुक दगाड़ ज्यून रै सकुंल।
15 हमुमिंबे जदु पक्क विश्वासी छन, उं यौ बिचार धरो। और अगर यौ बातक लिजी तुमुमिं अलग बिचार हो, तब परमेश्वर तुमुकैं यैक बारि मिं लै बताल। 16 जदुक हमुल सिखि हैलौ, आपण चाल-चलन उस्सै बणूण छु।
17 भाइयो, तुम लै जस मी करनू, उस्सै करो, और उनुकैं ध्यानल देखो जो यौ ढङल आपण जिन्दगी बितूंनी, जैक नमुन तुम हमुमिं देखछा। 18 किलैकि मील तुमुधैं भौत बार पैली लै कौ और आज लै डाड़ मारि-मारिबेर कूणयूं, कि आज लै भौत मैंस यीशुक बिरोध मिं छन। 19 आखिरकार इनर विनाश ह्वल, किलैकि उं हर बखत आपण पेटक लिजी सोचनी और आपण बेशर्मिक बातों मिं गरदन उंच्च करनी, और दुनियॉक चीजों मिं आपण मन लगै रॉखनी।