प्रेरितों 7

स्‍ितफनुसक भाषण

(प्रेरितों ७:१-५३)

1 यौ सब सुणिबेर महायाजकल स्‍ितफनुस धैं पुछौ, "के यौ बात सांचि छा?"

2 तब स्‍तिफनुसल कौ, "हे महारॉजो, सुणो! जब हमर कुल पितर इब्राहीम आपण जनम भूमी मेसोपोटामिया मिं छी, तब महान परमेश्‍वरल उकैं आपण दर्शन दिबेर कौ, 3 "तु आपण बिरादरी और यौ देश कैं छोड़िबेर उ देश मिं जा, जो मी तुकैं दिखूंल।" 4 तब उ वांक जॉग छोड़िबेर हारान देश मिं रुण लागौ। और यां वीक बौज्‍यूक मरणक बाद परमेश्‍वर उकैं यौ देश मिं ल्‍याईं, जां हम ऐल रुंनू। 5 हालाकि उ बखत उ वां परदेशीक चारि रुंछी, फिर लै परमेश्‍वरल वीक दगाड़ यौ वैद करौ कि मी यौ पुर देश त्‍यर वंशजों कैं द्‍यूंल। उ बखत इब्राहीमक क्‍वे नॉनतिन नि छी। 6 और परमेश्‍वरल उधैं यौ लै कौ, कि त्‍यार वंशज एक तिसर देश मिं चार सौ साल तलक परदेशियोंक चारि रौल। और वांक मैंस उनुकैं आपण गुलाम बणैबेर भौत जादे दु:ख द्‌याल। 7 यैक बाद मी उ मैंसों कैं सजा द्‍यूंल, और त्‍यार वंशज यां मेरि सेवा करॉल।

8 फिर परमेश्‍वरल इब्राहीम धैं आपण सब मैंसोंक खतना करणक लिजी कौ, जो यौ वैदक निशाण ह्‌वल। यैक बाद इब्राहीम बे इसहाक पैद हौ, और पैद हईयक अठूं दिन वीक खतना हौ। इसहाक बे याकूब, और याकूब बे हमार बार कुल पितर पैद हईं।

9 यौं बारों मिंबे दस आपण भै यूसुफ कैं देखिबेर जलण लागीं। यैक लिजी उनुल उकैं मिस्र जाणिवॉलों कैं बेचि दे। 10 पर परमेश्‍वरल यूसुफ कैं सब दु:ख-तकलीफ बे बचैबेर मिस्रक उप-रॉज बणा। 11 यैक बाद पुर मिस्र और कनान देश मिं भयंकर अकाव पड़ौ, यौ कारणल हमार पितरों कैं अनाज नि मिल। 12 लेकिन जब याकूबल सुणौ कि मिस्र देश मिं अनाज छु, तब वील आपण च्‍यालों कैं मिस्र देश मिं भेजौ। 13 यूसुफल उनुकैं पैली देखिबेर आपण बारि मिं नि बताय कि मी को छूं, लेकिन जब उं दुबार अनाज लिणक लिजी मिस्र मिं आईं, तब वील उनुकैं बता कि मी तुमर भै यूसुफ छूं। 14 यूसुफल आपण भैनों कैं भेजिबेर आपण बौज्‍यू और उनार नॉनतिनों कैं लै मिस्र मिं बुलवा। उनेरि गिनती उ बखत पचहत्‍तर छी। 15 और उं सब मिस्र देश मिं ऐबेर यूसुफक दगाड़ रुण लागीं, और सब वैं मरि ग्‍याय। 16 और उनर लाशों कैं लैबेर कनान देश मिं उ कबर मिं दफनाई गोय, जकैं इब्राहीमल मोल ली रॉखछी। 17 लेकिन यैक बाद लै उनार वंशज मिस्र मिं भौत जादे बढ़ ग्‍याछी।

18 तब मिस्र मिं दुसर रॉज बणौ, जो यूसुफक बारि मिं के नि जाणछी। 19 वील हमार पुरखोंक दगाड़ यस खराब बर्ताव करौ कि उनुकैं परेशान हबेर आपण पैद हई च्‍यालों कैं खेड़न पड़छी। 20 यौ बखतै मोशेशक जनम हौ। उ देखीण चाणक भलौ छी, और तीन म्‍हैण तलक उ आपण घर मिं रौ। 21 जब वीक इज उकैं और जादे दिनों तलक नि लुकै सकि, तब वील उकैं एक टुपर मिं धरिबेर गाड़ मिं धरि दे। तब मिस्री रॉजकि चेलि उकैं टिपिबेर आपण घर ली गे और आपण च्‍यलक चारि उकैं पावौ। 22 और मोशेश कैं मिस्रियोंक पुर ज्ञान-विज्ञानक बारि मिं सिखाई गोय, और उ एक खाश आदिम बणि गोय।

23 जब मोशेश चालीस सालक छी, तब उ आपण इस्रायली भैनोंक दगाड़ भेट करणक लिजी गो। 24 तब एक यहूदी मैंसक दगाड़ अन्‍याय हुण देखिबेर वील अन्‍याय करणी मिस्री मैंस कैं यैक लिजी मारि दे, 25 कि यैल वीक जातिक भै समझि जॉल कि परमेश्‍वर यैकै जरियल हमुकैं छुड़ाल, पर उं नि समझ। 26 जब दुसॉर दिन दुबार उनर बीच मिं ऐबेर वील द्वी यहूदियों कैं आपस मिं लड़न देखिबेर उनुकैं समझूण लगा कि तुम भै-भै हबेर एक-दुसर कैं किलै मारणाछा? 27 तब उनुमिंबे एकल उधैं कौ, "तुकैं हमर न्‍याय करणी सैप कैल ठैरा? 28 के जसिक त्‍वील बेई उ मिस्री कैं मारौ, उसिकै तु आज मिकैं मारण चांछै?" 29 यौ सुणिबेर मोशेश वांबे भाजिबेर मिध्‍यान देश मिं परदेशि हबेर रुण लागौ। और वां वीक द्वी च्‍याल हईं।

30 जब मोशेश कैं वां चालीस साल है ग्‍याछी, तब परमेश्‍वरल ऑगल जलणी बुजक बीच बे उकैं दर्शन दे। 31-34 यौ देखिबेर मोशेश दंग रै गोय। जब उ वीक नजिक गो, तब परमेश्‍वरल उधैं कौ, "मी त्‍यार पुरखा इब्राहीम, इसहाक और याकूबक परमेश्‍वर छूं।" यौ सुणिबेर मोशेश डरिल कॉमण लागौ और उकैं देखणकि हिम्‍मत नि आइ। परमेश्‍वरल कौ, "नजिक नि आ, पर आपण ज्‍वत ख्‍वल, किलैकि जो जॉग मिं तु ठॉड़ है रौछै, उ पवित्र जॉग छु। मील आपण मैंसोंक जो मिस्र मिं छन, उनेरि दु:ख-तकलीफ देखि रॉखी, और उनुधैं जबरन काम करूणियोंकि शिकैत लै सुणि है। उनुकैं छुड़ूणक लिजी मी स्‍वर्ग बे उतरिबेर यां ऐ रयूं। यैक लिजी मी तुकैं मिस्र देश भेजनू, तु वां जा।

35 परमेश्‍वरल उ मोशेश कैं जकैं इस्रायलियोंल यौ कैबेर ह्‌याव समझौ, कि तुकैं हमर न्‍याय करणी सैप कैल ठैरा, उकणी उनर छुणूणिवॉल ठैरा! 36 और यैलै चमतकराक काम करिबेर उनुकैं मिस्र देश बे लाल समुदरक बॉट भ्‍यार निकलौ, और उ चालीस साल तलक रेगिस्‍तान मिं उनर नेता लै छी। 37 यैक बाद यौ मोशेशलै इस्रायलियों धैं कौ, "परमेश्‍वर तुमुमिंबे म्‍यर जस एक नबी छांटिबेर ठॉड़ करल।" 38 और मोशेशकै जरियल परमेश्‍वरल सिनै डॉन मिं हमार पुरखोंक दगाड़ बात करिबेर हमुकैं नीम लै देईं।

39 लेकिन हमार पुरखोंल उं नीमों कैं छोड़िबेर मिस्र वापिस जाणक लिजी आपण मन बणा। 40 जब मौशेश कैं डॉन मिं परमेश्‍वरक दगाड़ बात करन-करनै भौत दिन है ग्‍याछी, तब मैंसोंल वीक भै हारून धैं कौ, "हमर लिजी यस द्‍‍यप्‍तकि मूरती बणा, जो हमर अघिल-अघिल हिटो, किलैकि हम नि जाणन कि मोशेशक दगाड़ के हौ, जो हमुकैं मिस्र देश बे निकालिबेर यां ल्‍या।" 41 तब उनुल एक सुनक बॉछ बणा, और वीक सामण भेट चढ़ैबेर आपण हातल बणाई उ बाछक मूरतिक लिजी त्‍यार मनूण लागी। 42 यौ सब देखिबेर परमेश्‍वर नराज हौ, यैक लिजी उनुल उनुकैं दुसर द्‍‍याप्‍तोंक पुज करणक लिजी छोड़ि दे। जस भौत साल पैली परमेश्‍वरक सेवक आमोसल लिख रॉखछी,

"हे इस्रायलियो, जब तुम चालीस साल तलक रेगिस्‍तान मिं घुमणाछिया, के तुमुल मिकैं अन्‍न और जानवरोंकि भे चढ़ैछा?

43 नि चढ़ाई, लेकिन तुम मोलेक और रिफाम द्‍‍याप्‍तोंक पुज करणाछिया, जनर मूरतियों कैं तुमुल बणै रॉखछी।

यैक लिजी ऑब मी तुमुकैं बाबुल देश मिं लिजैबेर बसूंल।"

44 जब हमार पितर रेगिस्‍तान मिं छी, तब उनर पास परमेश्‍वरक तम्‍बू लै छी, जकैं मोशेशल परमेश्‍वरक हुकुमक अनुसार बणाछी। 45 और जब हमार पुरखा यहोशूवक दगाड़ यौ देश मिं आईं, और परमेश्‍वरल उनर लिजी यांक मैंसों कैं निकालि दे, तब लै परमेश्‍वरक तम्‍बू उनर दगाड़ छी। और यौ तम्‍बू यां दाउद रॉजक बखत तलक छी। 46 दाउद मिं परमेश्‍वरक दया छी, यैक लिजी वील बिनती करी, कि मी परमेश्‍वरक लिजी एक भवन बणै सकूं। 47 जकैं बाद मिं वीक च्‍यल सुलेमानल पुर करौ।

48 लेकिन परमेश्‍वर मैंसक बणाई भवन भितेर नि रुन। 49 जस धर्म शास्‍त्र मिं लिख रॉखौ, कि परमेश्‍वर यस कूं,

"स्‍वर्ग मेरि गद्‍दी, और धरति मेरि चौकि छु,

तुम म्‍यर लिजी कस घर बणाला,

और के म्‍यर अराम करणक लिजी क्‍वे घर है सकछा?

50 के यौ सब दुनी मील आपण हातल नि बणाई?""

51 यौ सब कूणक बाद स्‍ितफनुसल यस लै कौ, "ओ निठूर मैंसो, तुम परमेश्‍वरक बात कैं अणसुणी किलै करछा! जस तुमार पुरखा करछी, तुम लै उनेरि चारि पवित्र आत्‍माक खिलाफ छा। 52 तुमार पुरखोंल परमेश्‍वरॉक सेवकों कैं सतया, उनुल उनुकैं लै मारि दे, जनुल मुक्‍तिदाताक यौ दुनी मिं उणकि भविष्‍यबाणी करी। उ मुक्‍तिदाता कैं पकड़ूणी और उनर खूनी ऑब तुम बणि ग्‍याछा! 53 तुमुल परमेश्‍वरक नीम तो पा, लेकिन वीक पालन नि कर!"

स्‍ितफनुसकि मौत

(प्रेरितों ७:५४-८:३)

54 यौ सब सुणिबेर वांक सब मैंस स्‍ितफनुसक लिजी दांत पिसण और झुझलाण लागीं, 55 लेकिन स्‍तिफनुसल पवित्र आत्‍मा मिं हबेर एकटक स्‍वर्गक तरफ चैबेर परमेश्‍वरकि महिमा देखी। और वील यीशु कैं परमेश्‍वरक दैण तरफ ठॉड़ देखौ। 56 तब वील कौ, "देखो, मी स्‍वर्ग कैं खुली और मसीह कैं परमेश्‍वरक दैण तरफ ठॉड़ देखणयूं!" 57 पर उं आपण कान बन्‍द करिबेर एक दगाड़ स्‍तिफनुस मिं झपटीं। 58 और उकैं पकड़िबेर मारणक लिजी नगरक भ्‍यार ली गेईं। और मारणिवॉलोंल आपण लम्‍ब कुर्तों कैं उतारिबेर पौलुस नामक जवानक पास धरि रॉखछी। यौ पौलुस लै इनर दगाड़ शामिल छी।

59-60 जब उं घंतरूणाछी, तब स्‍ितफनुसल प्रार्थना करी, "हे प्रभु यीशु, मेरि आत्‍मा कैं कबूल करिया!" यैक बाद वील आपण घुनोंक बल लफाईबेर जोर-जोरल कौ, "हे प्रभु, यौ पाप इनुमिं नि लगाया!" और यौ कैबेर उ मरि गोय।