शुरुवाद 39

यूसुफ मिस्र पुजुं

(उत्‍पत्ति ३९:१-२३)

1 ब्‍यापार करणी मैंस यूसुफ कैं खरीदिबेर मिस्र मिं ली गेई, और मिस्री महलक सिपैनोंक सैप कैं बेचि दे। 2 लेकिन प्रभु परमेश्‍वरल वां लै यूसुफक मधत करी। 3 जब वीक मालिक पोतीपरल देखौ कि प्रभु परमेश्‍वर यूसुफक हरेक काम करण मिं उकैं सफल बणूणी, 4 तब उ भौत खुशि छी, और वीक हरेक चीजोंक देखभाल यूसुफ करछी। 5 तब बटी प्रभु परमेश्‍वरल यूसुफक कारणल पोतीपरक घर, गॉड़-भिड़ और हरेक चीजों मिं आशीश दे।

6 यौ देखिबेर पोतीपरल आपण घरक हरेक चीजक जवाबदारी यूसुफ कैं सौंप दे। उ आपण खॉणक अलावा और के चीजक फिकर नि करछी।

7 यूसुफ डील-डौल और देखीण-चाण मिं भलौ छी। पोतीपरकि स्‍यैणि उकैं प्‍यार करण लागी। और एक दिन वील यूसुफ धैं यकलै मिं कौ, "आ, आज तु और मी एक दगाड़ पड़नू।" 8 लेकिन यूसुफल यौ कैबेर मना करि दे, "बाप रे बाप, मी यस नि करि सकन किलैकि म्‍यर मालिक आपण घरक बारि मिं मि पर पुर भरौस करुं, और वील आपण घरकि हरेक चीजक अधिकार मिकैं दी रॉखौ। 9 और यैक अलावा वील आपण घर मिं मिकैं आपण बराबरक दर्ज दी रॉखौ। लेकिन मिकैं वीक स्‍यैणिक दगाड़ नि सितण चैन। यौ खराब बात छु और परमेश्‍वरक हुकुमक खिलाफ लै छु।" 10 यूसुफकि मालकिन वीक दगाड़ रोज-रोज बात करछी लेकिन यूसुफ नि मानछी।

11 लेकिन जब एक दिन यूसुफ काम करणक लिजी वीक घर भितेर गो, उ बखत वां और क्‍वे तिसर आदिम नि छी। 12 यौ देखिबेर वीक मालकिनल वीक कुर्त पकड़िबेर कौ, "आ, म्‍यार दगाड़ पड़!" तब यूसुफ आपण कुर्त वीक हात मिं छोड़िबेर वांबे भाजि गोय। 13-14 पर वीक बाद उ स्‍यैणिल आपण दुसॉर दासों कैं बुलैबेर कौ, "देखो, यौ दासल भितेर ऐबेर म्‍यर दगाड़ जबरदस्‍ती करणकि कोशिश करी। लेकिन मील जोरल हाल्‍ल करि दे, 15 और तब उ डरिल आपण कुर्त म्‍यर हात मिं छोड़िबेर भाजि पड़ौ।"

16-18 और जब वीक बैग घर आ, तब वील उकैं लै यौ झुटि बात बतै। 19 जब यूसुफक मालिकल आपण स्‍यैणिक बात सुणी तब उकैं भौत रीश ऐ। 20 और वील यूसुफ कैं जेल मिं बन्‍द करि दे। 21 लेकिन प्रभु परमेश्‍वरकि दया यूसुफ मिं जेल मिं लै छी। 22 यैक लिजी जेलक मुखियाल सब कैदियों कैं यूसुफ कैं सौंप देईं, और उं जेल मिं यूसुफक हुकुमल काम करछी। 23 और जेलक उ मुखिया सब कामक लिजी यूसुफ मिं भरौस करछी। और जो काम यूसुफ करछी उकैं सफल बणूण मिं परमेश्‍वर वीक मधत करछी।