परमेश्वर इब्राहीमक घर आईं
(उत्पत्ति १८:१-१५)
18
1 थ्वाड़ बखत बाद परमेश्वर फिर इब्राहीमक पास परगट हईं। यौ तब हौ जब इब्राहीम मम्रे मिं ठुल बांजक बोटोंक पास रुंछी। उ दोफरिक बखत मिं आपण टैन्टक भ्यार बे बैठि रौछी, 2 तब वील तीन मैंसों कैं उण देखौ। वील उनर सामण जैबेर कौ, "ओहो महारॉज, तुम हिटिबेर म्यर गरीब खॉण मिं थ्वाड़ ऐराम करि लियो। 4 मी तुमर हात-खुट ध्वेणक लिजी पाणि ल्युंनू, 5 थ्वाड़ खॉणक इंतजाम करनू और तुमुल जां लै जाण छु खॉण खॉणक बाद जाया, तब तलक तुम यां स्योव मिं ऐराम करो।" उनुल कौ, "ठिक छु।6 इब्राहीम जल्दी आपण टैन्ट भितेर गो, और सारा धैं कौ, "झटपट तीन पैंसेरि पिसूंवाक र्वाट पका।" 7 और इब्राहीमल जल्दी-जल्दी जैबेर आपण जानवरों मिं बे एक भलौ जानवर लिबेर आपण नौकर कैं दिबेर कौ, "यकैं झट्ट काटिबेर पकाओ।"
8 जब खॉण पाकौ तब इब्राहीमल उ तीनों कैं शिकार, र्वाट, दैं, और दूध दे। 9 और खॉण खान-खानै उनुल इब्राहीम धैं पुछौ, "तेरि स्यैणि सारा कां छु?" वील कौ, "टैन्ट भितेर छु।" 10 वीक बाद उनुमिं बे एकल कौ, "आज बे ठिक एक सालक बाद मी फिर यां ऊंल और उ बखत तलक साराक एक च्यल है रौल।" 11 इब्राहीम और सारा द्विवै बुड़ है ग्याछी और ऑब सारा आपण नॉनतिन पैद नि करि सकछी। 12 सारा यौ बात सुणिबेर हसि और उ मन-मनै कूण लागी, "मी और म्यर घरवाव द्विवै बुड़ छूं और नॉनतिन कैं जनम दिणैक ताकत लै म्यर पास न्हैं। के फिर लै यस ह्वला?"
13 तब उ मैंसल जो सांचि मिं परमेश्वर छी कौ, "साराल हसिबेर किलै कौ, "मी बुड़ि छूं और नॉनतिन कैं जनम नि दी सकन! 14 किलै प्रभु परमेश्वरक लिजी के मुश्किल छा? न्हैं, मी जांनू और फिर दुबार अघिल साल तुमर पास ऊंल। उ बखत तलक तेरि स्यैणि च्यल कैं जनम दी रॉखेलि।" 15 पर साराल डरक मारी कौ, "मी नि हस।" लेकिन प्रभु परमेश्वरल कौ, "ना, तु हसि तो छै।"
परमेश्वरक दगाड़ इब्राहीमक सौद
(उत्पत्ति १८:१६-३३)
16 खॉण खॉणक बाद उं उठिबेर सदोम नगरक तरफ गेईं। और इब्राहीम उनुकैं थ्वाड़ दूर तलक पुजूणक लिजी गो। 17 जब उं एक उंच्च जॉग मिं पुजीं, जांबे उं सदोम नगर कैं देखि सकछी, तब प्रभु परमेश्वरल आपण मन मिं सोचौ, "के मी इब्राहीम कैं उ बात बतै दिंनू जो ऑब मी करुंल? 18 इब्राहीम एक ठुल और मजबूत देशक कुल पिता बणि जॉल। और यैक जरियल सॉर धरतिक मैंसों कैं आशीश मिलेलि। 19 मील यैक लिजी उकैं अलग करौ, कि उ आपण नॉनतिनों कैं सच्चाई और इमानदारिल जिन्दगी बितूणक लिजी बतै सको, जस मील उकैं बतै रॉखछी। तब मी आपण करी वैद कैं उनर दगाड़ पुर करुंल।"
20 यैक लिजी प्रभु परमेश्वरल इब्राहीम धैं कौ, "मील यौ बात भौत बार सुण है कि सदोम और गमोरा नगरक मैंस भौत खराब छन। 21 यौ बातक बारि मिं पत्त करणक लिजी मी आपण दूतों कैं वां भेजनू। वीक बाद देखुंल कि उनुकैं नांश करण छु या नि करण।"
22 तब दुसॉर द्वी मैंस, जो परमेश्वरक दूत छी, सदोम नगरक तरफ जानै रईं। लेकिन प्रभु परमेश्वर इब्राहीमक दगाड़ वां ठॉड़ रईं।
23 तब इब्राहीमल परमेश्वर धैं कौ, "हे प्रभु, के तुम उ पुर नगरक मैंसों कैं नांश करणक लिजी सोचणाछा? 24 अगर उ नगर मिं पचास धर्मी मैंस ह्वला, के तुम तब लै उ नगर कैं नांश करि द्यला? के तुम उ पचास धर्मी मैंसोंक लिजी उ नगर कैं नि बचाला? 25 यौ पक्कि बात छु, कि तुम उ नगर कैं जरूड़ बचाला। अगर यस नि ह्वल, तब अधर्मी और धर्मी सबों कैं एक जसि सजा मिलेलि। पर तुम पुर धरतिक न्याय करणी छा, के तुम सही न्याय नि करला?" 26 तब प्रभु परमेश्वरल कौ, "अगर मिकैं सदोम नगर मिं पचास धर्मी मैंस लै मिलला, तब मी उ नगर कैं नांश नि करुंल।"
27 तब इब्राहीमल कौ, "हे प्रभु, तुमर सामण मी केवल धूल और छारूण छूं। फिर लै तुम मिकैं बात कूणक मौक दियो। 28 अगर वां पैंतालिस धर्मी मैंस ह्वला, तब के ह्वल? के तुम पांच कम मैंसोंक कारणल पुर नगर कैं नांश करि द्यला?" तब प्रभु परमेश्वरल कौ, "अगर मिकैं वां पैंतालिस धर्मी मैंस मिलला, मी उ नगर कैं नांश नि करुंल।"
29 लेकिन इब्राहीमल फिर प्रभु परमेश्वर धैं कौ, "अगर तुमुकैं वां चालीस धर्मी मैंस मिलॉल, तब तुम के करला?" प्रभु परमेश्वरल कौ, "अगर मिकैं वां चालीस धर्मी मैंस लै मिलॉल तब मी उ नगर कैं नांश नि करुंल।"
30 तब इब्राहीमल कौ, "हे प्रभु परमेश्वर, मिकैं माफ करिया कि मी फिर पुछनू कि अगर वां केवल तीस धर्मी मैंस ह्वाल, तब तुम के करला?" तब उनुल कौ, "अगर मिकैं तीस धर्मी मैंस मिलॉल तब मी उ नगर कैं नांश नि करुंल।"
31 तब इब्राहीमल कौ, "हे प्रभु परमेश्वर, मी तुमुकैं तकलीफ दिबेर आइ पुछनू, कि अगर वां बीस धर्मी मैंस ह्वाल तो?" प्रभु परमेश्वरल जबाब दे, "तब मी उ नगर कैं नांश नि करुंल।" 32 फिर इब्राहीमल कौ, "हे प्रभु, तुम मी देखि नराज नि हया, मी फिर पुछनू कि अगर वां दस धर्मी मैंस ह्वाल तब तुम के करला?" उनुल कौ, "तब लै मी उकैं नांश नि करुंल।"
33 वीक बाद प्रभु परमेश्वरल इब्राहीम धैं बात करण बन्द करि दे और वांबे जानै रईं। और इब्राहीम लौटिबेर आपण घर आ।