इब्रानियों 4

दईब रे लोका रा राम

1 एतकि तणी जेबा कि तेऊ रे रामा में प्रबेश करणे री प्रतिज्ञा एब्रे तणी साहा, तेबा हामें डरी लोढ़ी एढा नांई होए कि तमा मेंज़ा का कोई आदमी तमा का बंचित रहे । 2 किबेकि हामा त्याह ही साही सुसमाचार शुणाउदा साहा, पर शुणी दे बचना का तया बे किछे फायदा नांई होऊ ;किबेकि शुणन आल़े रे मना में बुशाहे संघा नांई बेठा 3 जूणी बुशाह करूदा साहा तिही तेऊ रामा में प्रबेश करा, जेढ़ा तेऊ बोलू , “ माँईं आपणे रोषा में कसम खाई कि तया मेरे रामा में प्रबेश नांई करी पाए ।” पर जगता री उत्पति रे टाईमा का तेऊरे काम पुरे होई दे , । 4 किबेकि साती ध्याड़ी रे बारे में तेऊ यह बोलू , “ दईबे साते ध्याड़े आपणे सब काम निपटाई करे राम करू ।” 5 होर एसा जागहा भी यह बोला, “ तया मेरे रामा में प्रबेश नांई करी पाए ।” 6 तेबा जेबा यह गल बाकि साहा की केतारे होर साहा ज़ोह तेऊ रामा में प्रबेश करे, होर ज़ासु बे तेऊरा सुसमाचार पहिले शुणाऊ, त्याह हे आज्ञा नांई मनणे रे कारण तेऊ में प्रबेश नांई करू , 7 एतकि तणी सह कासु बिशेष ध्याड़ी डाही करे एतरी ध्याड़ी बाद दाऊदा री कताबा में तेऊ बे ' आज़की ध्याड़ बोला । जेढ़ा पहिले बोलू तिही, “ अगर आझ तमेे तेऊ र शब्द शुणे तिही तेबा आपणे मना कठोर नांई करा ।” 8 किबेकि ज़ेबा यीशु तया रामा में प्रबेश करे, तेबा तेता बाद दूजी ध्याड़ी री चर्चा नांई हूँणी । 9 पर ज़ाणा कि दईब रे लोका बे सब्ता रा राम बाकि साहा ; 10 किबेकि जूणी तेउरे रामा में प्रबेश करू, तेऊ भी दईब रे बराबर `आपणे काम पुरे करी करे राम करू । 11 पर हामे तेऊ रामा में प्रबेश करणे रा प्रयत्न करे ,एढा नांई होए कि कोई आदमी तया रे बराबर आज्ञा मनी करे पड़े । 12 किबेकि दईब र बचन जिउंद, होर प्रबल तिही होर हर एक दोधारी (दुही तरफा)तुरारा का भी चोखा साहा ;होर प्राण होर आत्मा बे तिही होर गाँठ -गाँठ होर गुदे -गुदे अलग करी करे उआर पार छेदा होर मना री भाबना होर बचारा जांचा । 13 सृष्टि री कोई बस्तु तेऊ में गोझी दी नांई आंधी पर ज़ासु का हामा काम साहा, तेउरी आछी रे सामने सब बस्तु खुली होर प्रकट साहा ।

बढ़अ महायाजक

14 एतकि तणी जेबा म्हारअ बढ़अ महायाजक साहा, ज़ोह सरगा का होई करे नाठदअ साहा, अर्थात दईबा र शोहरू यीशु, तेबा इच्छा तिही हामे आपणे अंगीकार दृढ़ता का थामी (ढाकी)डाहंणा । 15 किबेकि म्हारअ एढअ महायाजक नांई ज़ोह म्हारी निर्बलता में दुखी ना होई सके, पर सह सभी गला में हामा बराबर त परेखु तिही तेबा भी पाप नांई निकतअ । 16 एतकि तणी इच्छा, हामे अनुग्रह रे सिंहासन रे नेढ हियाब बान्ही करे चले कि हामा पैंदे दया हो, होर अनुग्रह पाए ज़ोह जरूरता रे टाईमे म्हारी साहा यता करे ।