इब्रानियों 3

यीशु मूसा का श्रेष्ट (बढ़अ)

1 एतकि तणी हे भाइयो, तमेे ज़ोह स्बर्गीय बुलाहटा में भागी साहा , तेऊ प्रेरिता होर महायाजक यीशु पैंदे ज़ासु हामे अंगीकार करा ध्यान करा । 2 ज़ोह आपणे नियुक्त कर्ण आल़े बे बुशाह योग्य तिही, जेढ़अ मूसा भी दईब रे सारीे घरे तिही । 3 किबेकि मूसा यीशु का एतरअ बढ़ीकरे महिमा रे योग्य समझू द साहा ,जेतरअ कि घरा बणाउण आल़अ (मिस्त्री) घरा का ज्यादा आदर डाहंदा । 4 किबेकि हर एकु घरा बणाउण आल़अ कोई ना कोई हुँदा, पर जूणी सब कुछ बणाउ सह दईब साहा । 5 मूसा त दईब रे सारीे घरे सेबका रे बराबर बुशाह लायक रहू कि ज़ासु गला रा बर्णन हुण आल़ा तिही, तया री गुआही दे । 6 पर मसीह शोहरू रे बराबर दईब रे घरा र अधिकारी साहा ; होर तेऊ र घर हामे साहा तिही अगर हामे आपणे हिमता(हिम्मता) पैंदे होर आपणी आशा रे घमण्डा पैंदे अन्त तणी दृढ़ता का स्थिर रहे ।

अबिश्बसा रे प्रति चताबनी

7 पर जेढ़ा पबित्र आत्मा बोला, “ अगर आझ तमेे तेऊ र शब्द शुणा , 8 तेबा आपणे मना कठोर नांई करा, जेढ़ा कि रोषा ठयाउणे रे टाइमे होर परीक्षा री ध्याड़ी ज़गले करू, । 9 ज़खे थारे बाबे दादू हाँऊं जाँची करे प्रेखु होर चाल़ी साला तणी मेरे काम हेरी 10 एउ कारण हाँऊं तेऊ टाईमा रे लोका का गुस्से में रहू, होर बोलू ,याह रे मन सदा भटकते रहंदा, होर त्याह मेरी बात नांई पछेणी ।' 11 तेबा माँईं रोषा में इछी करे यह कसम खाई ,' तया मेरे रामा में प्रबेश नांई करी पाए ' ।” 12 हे भाइयो चुस्त रहा कि तमा में एढा बुरा होर अबिश्बासी मन ना हो, ज़ोह तमा जीबते(जिउंदे) दईब का दूर हटाए । 13 पर ज़ासु ध्याड़ी तणी आज़क़ी ध्याड़ बोला, हर एक ध्याड़ी एकु दूजे समझाऊदे रहा, एढा नांई होए कि तमा मेंजा का कोई एक आदमी पापा रे छला में इछी करे कठोर होए । 14 किबेकि हामे मसीहा रे भागीदार होई दे साहा, अगर हामे पहिले पैंदे अन्त तणी दृढ़ता का स्थिर रहे । 15 जेढा बोला, “ अगर आझ तमेे तेऊ र शब्द शुणे ,तेबा आपणे मना कठोर नांई करा, जेढा कि रोषा ठयाउणे रे टाईमे करा, ।” 16 भला कुंणी लोके शुणी करे भी रोष ठियाउ ? कैह त्याह हे सभी नांई, ज़ोह मूसा रे दुआरा मिस्रा का निकते, ? 17 होर सह चाल़ी साला तणी कासु लोका का क्रोधित(गुस्से में)रहू ? कैह त्याह ही का नांई जूणी पाप करू तिही होर त्याह ह रे शफ़ ज़गले पड़ी रही ? 18 होर तेऊ कासु का कसम खाई कि तमेे मेरे रामा में प्रबेश नांई करणा ? कैह सीधी तया का नांई जूणी आज्ञा नांई मनी ? 19 पर हामे हेरा कि तया अबिश्बासा रे कारण प्रबेश नांई करी सके ।