प्रेरितों के काम 23

1 पौलुसे महासभा फेरा बे टकटकी लाई लगातार भालू होर बोलू , “ हे भाईओ मांई आज तंणी दईबा बे बिलकुल सच्चे बिबेका संघे जीबन बिताऊ ।" 2 एता पेंदे हनन्याह महायाजके त्याह ह बे ज़ोह तेऊ सेटा खड़े , तेऊ मुंहे थपड मारणे री आज्ञा दीनी । 3 तेबा पौलुसे बोलू , “ हे चुने लाई दी दईबा तू मारणअ । कह तू व्यवस्था रअ नुसारी मेरे न्याय करदअ बेठअदअ होर तेबा रे बिरुध म्हा मारणे री आज्ञा दिंदा ?” 4 ज़ोह सेटा खडे , त्याह ह बोलू , “ कह तू दईबा रे याजका बे भला बुरा बोलदा ?” 5 पौलुसे बोलू , “हे भाईओ हांऊं नांई जांणदअ , कि यह महायाजक सा , किबेकी लिखुदा सा , ' आपणे लोगा रे प्रधाना बे बुरा नांई बोले ।' 6 तेबा पौलुसे यह जाणी करे कि एक दल सदूकियों होर दूजअ दल फरीसी रअ सा , सभा में पुकारी करे बोलू , “ हे भाईओ , हाँऊ फरीसी होर फरीसी रे बंशा रअ सा मुंएदे री आशा होर पुनरुत्थान री बजह संघा मेरा न्याय हुंदा लागादा ।" 7 जेबा तेऊ यह गअल बोली , तेबा फरीसी होर सदूकी बीचे झगडा हुंदा लागा; होर सभा में फुट पड़ी । 8 किबेकी सदूकी त यह बोलदा , कि न पुनरुत्थान सा , न स्वर्गदूत , होर ना दुष्टात्मा सादी पर फरीसी याह सभी मानदा । 9 तेबा बड़ेा हाला मचु होर कुछ शास्त्री ज़ोह फरीसी दला रे , खडे उठे होर यह बोली करे झगडदे लागे , “हामे एऊ आदमी में कोई बुराई नांई पाई होर ज़ेबा कोई दुष्टात्मा या स्वर्गदूत तेऊक बोला तेबा होर केह ?” 10 जेबा झगडा बहू बढ़ू तेबा सेनापति डरु कि कंही त्याह पौलुसा रे टुकड़े-टुकड़े नांई करे , एतकी तंणी तेऊ सैनिक बे आज्ञा दीनी कि ऊंहदे नांही करे त्याह ह बीचा मेंज़ा का जबरदस्ती काहडी करे किले बे नींए । 11 तेसी राची दईबा एतेऊ सेटा खड़े होई करे बोलू , “ हे पौलुसा , साहस डाह , किबेकी जेह्डी तांई यरूशलेमा में गबाही दीनी , तेहडी ताह रोमा में भी गबाही दीणी आई ।

पोलुसा रे हत्याह रे बारे में गल्ला

12 जेबा दिहाड होई तेबा यहूदी षड्यंत्र रचू होर शपथ खाई कि जेबरे तंणी पौलुसा मारी नांई लये तेभरे तंणी ना हामा खांणा ना पींणा। 13 त्याह हे आपू में कसम खाई दी , त्याह चाहली आदमी , । 14 तेबा त्याह प्रधान याजक होर प्राचीनों सेटा बोलदे लागे , “ हामे कसम खाई कि जेबरे तंणी पौलुसा मारी नांई लेलेतेभरे तंणी हामा किछे नांई खांणा ।" 15 इसलिए एबा तमे होर महासभा सेनापति समझा कि तेऊ आपू सेटा बहाने संघे शादा कि तमा तेऊ रे बारे में जांच पड़ताल करणा चांहदा ; हामे तेऊरअ खे पूजणे क पहिले ही सह मारी पाऊंणअ । 16 पौलुसा रे भांणजे यह सभे शुंणु होर पौलुसा बे गढा में इच्छी करे खोजू । 17 तेबा पौलुसे सूबेदारा मेंज़ा का एकी बे आपु सेटा शदाई करे बोलू , “ एऊ आदमी सेनापति सेटा नींआ किबेकी यह तेऊ क कुछ बोलना चांहदा ।" 18 तेऊ सह सेनापति सेट बे नींउ होर बोलू , “बंदी पौलुसे म्हा शदाई करे बिनती करी कि यह आदमी सेनापति क कुछ बोलना चांहदा । एऊ तेऊ सेटा नी ।" 19 सेनापति तेऊ रअ हाथ डाहकू होर अलग नी कर पुछु , “ तू म्हा क कह बोलना चांहदा ?” 20 तेऊ बोलू , “यहूदियों षड्यंत्र रचू दा सा कि ताह क बिनती करे कि काला पौलुसा महासभा में आंणे एह्ड़ा की त्याह पूरी तरह तेऊरी जाँच करना चांहदा । 21 परन्तु त्याह ह री नांई शूणे , किबेकी त्याह ह में चाहली क उझे लोगा घाता में सा जासू यह ठानू दा सा कि जेबरे तंणी पौलुसा मारी नांई लए तेभरे तंणी त्याह ह नांई खांणा नांई पींणा , होर एबा त्याह तयार सा होर तेरे बचना रे इन्तजारा करदे लागेदे । 22 तेबा सेनापति जबाना यह आज्ञा देइकरे बीड़ा करू , “ कासु क नांई बोले कि तांई या गला महा क खोजी ।"

पोलुसा थेलिक्सा जेह नहंण

23 तेबा तेऊ दुई सूबेदार शदाई होर बोलू , “ दुई श सैनिक , सतर घुडसबार होर दुई श भलेत कौसरिया नांहणे बे राची त्याह र करा ।" 24 होर पौलुसा री सबारी बे त्याह र डाहा कि सअ फैलिक्स न्यायधीश सेटा सकुशल नींणअ । 25 होर तेऊ एक चिठ्ठी एढ़ी लिखी : 26 “ महामहिम राज्यपाल फौलिक्सा बे क्लौदुयुस लुसियासा री नमस्ते े । 27 यह आदमी यहूदियों षड्यंत्र करी करे मारणअ चाहू परन्तु जेभरे मांई जांणू यह रोमी सा , तेबा सेना भेजी करे यह छुडाऊ । 28 हाँऊ जांणना चांहदा की त्याह हे एऊ पेंदे कासु कारणे दोष लाऊ , एत कि तंणी मांई यह महासभा में नींऊ । 29 तेबा मांई जांणू कि त्याह हे आपांणी व्यवस्था रे बिबदा रे बिषय में एऊ पेंदे दोष लाऊ , परन्तु मारणे होर बाहनणे लायक एउ मेंज़ा काोई दोष नांई आंहदा । 30 जेबा म्हा यह पता चलू कि एऊ आदमी रे बिरुद्ध षड्यंत्र रचणा लाऊदा तेबा मांई तेभरी यह ताह सेटा भेजू होर दोषा लाऊणे आले भी आदेश दीना कि त्याह ह तेरे सामने एउरे बिरुद्ध दोष लाए । 31 अत: जेह्डी सैनिका बे आज्ञा दीनी , तेहडी ही त्याह हे पौलुस राचो राच अन्तिपत्रिसा बे आंणू । 32 परन्तु दूजे दिहाड़े घुडसबार तेऊ संघे नांहणे री तंणी छाडी करे किले बे बापस आए । 33 घुडसबार कौसरिया पूजी करे राज्यपाला बे चिठ्ठी दीनी होर पौलुस तेऊ सामने प्रस्तुत करू । 34 तेऊ चिठ्ठी पढ़ी करे पुछु , “ यह कासु जागह क सा ?" 35 होर जेबा तेऊ जाणू कि यह किलिकिया क सा तेबा तेऊ बोलू , “ जेभरे ताह पेंदे दोष लाऊणे आले इंहणे , तेबा म्हा तेरी सुनबाई करणी ।" होर तेऊ आदेश दीना कि सअ हेरोदेस री राजभबना री सुरक्षा में डांहणअ ।