प्रेरितों के काम 11

पतरसा दुआरा आपणे कामा रा स्पष्टीकरण

1 तेबा प्रेरितों होर भाईए ज़ोह यहूदिया में , शूणू की होरी जाती भी दईबा रा बचन मानू । 2 अत: जेबा पतरस यरूशलेमा बे आऊअ , तेबा खतना करी दे लोगे तेऊ संघे बाद-बिबाद करदे लागे की ; 3 तांई खतना रहित लोगा सेटा नांही करे खाऊ-पीऊ ।" 4 तेबा पतरसे त्याह ह बे शुरू क बाहड लाई शूणाऊ : 5 “हाँउ याफा में प्रार्थना करदअ , लागअदअ होर बेसुध होई करे म्हा एक दर्शन हेरू की एक पात्र , बड़ेी चादरा रे समान चहे कूणे लटकीदे , सरग क ऊतरी करे म्हा सेटा आऊअ । 6 जेबा मांई तेता पेंदे ध्यान दीना , तो तेत में पृथ्वी रे चहू टांगा आले होर बन पशु होर रेंगने आले जंतु होर सरग रे पक्षी हेरी ; 7 होर यह शब्द शूणू , 'हे पतरस उठ , मार होर खा ।' 8 मांई बोलू , “नांई दईबा ;किबेकी कोहे भी अपवित्र या अशुद्ध बस्तु मेरे मुंहा भीतर मची तंणी नांई नाठही । 9 एतके ऊतरामें सरग क दूजी बेरे होर शब्द शूणू , 'ज़ोह कुछ दईबे शुद्ध ठहराऊ , तेता अशुद्ध मत बोल ।' 10 चीण बेरे एढा ही होऊ ; तेबा सब कुछ सरगे बापस खींचू । 11 होर हेरा , तेभरी चीण आदमी ज़ोह कैसरिया क म्हा बे भेजी दे , तेऊ घरे जासु में हामे , होर दुआरा सेटा खड़े होई । 12 तेबा आत्मा म्हा निसंकोच होई करे त्याह संघे नाहणे बे बोलू , होर या छह भाई भी मांई संघे आए ; होर हामे तेऊ आदमी रे घरा बे नाठए । 13 तेऊ हामा बे खोजू की तेऊ एक स्वर्गदूत आपणे घरे खडअ हेरू , तेऊये तेऊ बे बोलू , 'याफा में आदमी भेजी करे शमौन ज़ोह पतरस कहलाऊंदा शदाह । 14 तेऊ ताह बे एढी गला खोजणी , जासके दुआरा ताह होर तेरे सारीे घराने उद्धार पाऊँणा ' 15 जेबा हाँऊ गला करदअ लागअ ; तेबा पवित्र आत्मा त्याह ह पेंदे एढी रीति संघे ऊतरु जेहढी पहिले हामा पेंदे ऊतरु , । 16 तेबा महा दईबा रअ सअ बचन याद आऊअ ; ज़ोह तेऊ बोलू , 'यहुन्ना त पाणी में बपतिस्मा दिंदा , परन्तु तमा सभी पवित्र आत्मा बपतिस्मा दींणा ।' 17 अत: दईबे त्याह ह बे भी सहे दान दीना , ज़ोह हामा दईबा यीशु मसीह रे विश्वासा करने पेंदे भेटा ; तेबा हांऊ कुण सा ज़ोह दईबा रोकी सके ?” 18 यह शूणी करे त्याह चुप रही , होर दईबा री बड़ेाई करी करे बोलदे लागे , 'तेबा त दईबे भी अन्यजाति बे भी जीबना में मन फिरबा रा दान दीना ।

अन्ताकिया री कलीसिया

19 ज़ोह लोग तेऊ क्लेशा रे मारे ज़ोह स्तिफनुसा रे कारण पडू , तितर-बितर होई , त्याह हांडदे-हांडदे फीनाके होर साईप्रस होर अन्ताकिया में पूजे ; परन्तु यहूदी छाडी कासु होरी बे बचन नांई शूणाऊंदे , । 20 परन्तु त्याह ह में कुछ साइप्रसबासी होर कुरेनी , ज़ोह अन्ताकिया में ईछी करे यूनानी लोगा बे भी दईबा यीशु रे सुसमाचारा री गला शूणाऊंदे लागे । 21 दईबा रअ हाथ त्याह पेंदे , होर बहू लोगा विश्वास करी करे दईबा फेरा बे फीरी । 22 जेबा त्याह ह री चर्चा यरूशलेमा री कलीसिया में शूणने में आई , तेबा त्याह हे बरनबास अन्ताकिया भेजू । 23 सअ तखे पूजी करे दईबा रा अनुग्रह भाली आनंदित होऊ , होर सभी बे उपदेश दीना की तन मन लाई करे दईबा में लिपटे रहा । 24 सअ एक भलअ आदमी , होर पवित्र आत्मा होर विश्बासे संघे परिपूर्ण , : होर भी बहू लोगा दबा में मिली । 25 तेबा सअ शाऊला लोड़ने री तनणी तरसुसा बे नाठअ । 26 जेबा तेऊ सअ भेटअ तेबा तेऊ सअ अन्ताकिया आणू ; होर एढा होऊ की त्याह एकी साला तंणी कलीसिया बे मिलदे होर उपदेशा दिंदे रही ; होर चेले सभीक पहिले अन्ताकिया में मसीही कहलाई । 27 त्याह ही दिहाड़ी कई भविश्यबक्ता यरूशलेमा क अन्ताकिया आऊए । 28 त्याह ही में अगबुस नामक एकी खड़े होई करे आत्मा री प्रेरणा क यह खोजू कि सारीी दुनिया में बडअ आकाल पडनअ- सअ आकाल क्लौदियुसा रे टाइमे पडू । 29 तेबा चेले फैसला करू कि हर एक आपणे-आपणे ढबे रअ नुसारी यहूदिया में रहणे आले भाईओं री सहायता री तंणी कुछ भेजे । 30 त्याह ह एढा ही करू ; होर बरनबास होर शाऊला रे हाथे प्राचीनों सेटा कुछ भेजू ।