प्रेरितों के काम 1

परिचय

1 हे थियुफिलुस , मांई आपांणी पहिली कताब त्याह सभी गला रे बिषय में लिखी ज़ोह यीशु पहिले करदा होर सीखाउन्दअ रहू । 2 तेसा दिहाड़ी जेबरे तंणी त्याह प्रेरितों बे जूंणा तेऊ चुनी दे , पवित्र आत्मा री आज्ञा देइकरे उझे नांई शदाई । 3 तेऊ दुःख उठाने बाद भी बहुत पके सबूता संघे आपणे आपा बे जिउंदअ रीहाऊ , होर चाहली दिहाड़ी त्याह हेरदअ रहू होर दईबा री राज्य री गला करदअ रहू । 4 होर तेऊ त्याह बे मिलिकरे रहणे री आज्ञा दीनी , “ यरुशलेमा नाह छाडे , परन्तु जासू की प्रतिज्ञा मेरे बापू करी बाट ज़ोह ते रहा , जासू की चर्चा तमे म्हा क शूणी । 5 किबेकी यहुन्ना त पाणी में बपतिस्मा दीदआ कुछ दिहाड़ी बाद तमा पवित्र आत्मा क बपतिस्मा पाऊणी ।

यीशु रा स्वर्गारोहण

6 तेबा त्याह कठे होई करे तेऊ का पुछु , “ हे दईबा केह ताह एऊ टाइमे इस्राएल वै छुटकारा दिणा (बे राज्य फरेऊणा "_)। 7 तेऊ त्याह बे बोलू , “त्याह समया या कालों बे जानणा , जूंणा पिता आपणे अधिकारा में डाहिदे , थार काम नांई आंहदा "। 8 परन्तु जेबरे तमा पेंदे पवित्र आत्मा ईहलअ तेबा तमे सामर्थ्य पाऊंणा होर यरूशलेम होर सारीे यहूदी होर सामरी में होर प्रथ्वी री छोर तक मेरे गबाह हूंणे । 9 यह बोली करे त्याह हेरदे-हेरदे सअ सरग बे उझे चुआकू होर बादले सअ आपांणी आछी में गझेऊ । 10 तेरे नांहदे टाइमे जेबा त्याह सरग भालले , लागेदे , तेबा हेरा दुई मर्द शेते झिख्डे बाहनी त्याह सेटा खडे हुए । 11 होर त्याह बे बोलू , “ हे गलीली पुरुषा तमे सबे खड़े होई सरग किबे भाले लागेदे? यहे यीशु , ज़ोह थारे सामने सरग बे नीऊ , जेड़ी तरह तमे स सरग बे नांहदअ भालू , एढ़ी तरह सअ भी इंहणअ ।

मत्तियाह बे यहूदा रा पद भेटणा

12 तेबा त्याह जैतून ना रे पहाडा कअ , ज़ोह यरूशलेम क एक सब्ता ऋ दिहाड़ी बराबर नेड , यरुश्लेमा बे बापस आए । 13 जेबा त्याह तखे पूजे , त्याह एकी जगह नाठे जखे , पतरस होर याकूब , अन्द्रियास होर फिलिप्पुस होर थोमा होर बरतुल्मै होर मती होर हलकई रा शोहरू याकूब होर शैमोन जेलितेस होर याकूब रा शोहरू यहूदा रंहदा , । 14 या सबे बहू बेटडी संघे होर यीशु री आमा मरियम होर तेउरे भाई संघे एक मन होई करे प्रार्थना करदे लागे । 15 त्याह ई दिहाड़े पतरस भाई मेंजे ज़ोह एक श लोगा बराबर , खड़े होई करे बोलदअ लागअ । 16 “ हे भाईओ , आबश्य , कि पवित्र शास्त्रा रा लेख पुरअ होऊ , ज़ोह पवित्र आत्मा दाऊदा रे मुंह क यहूदा रे बिषय में ज़ोह यीशु रे ढाकणे आले र आगूबा , पहिले क बोलू , । 17 किबेकी सअ हामे संघे गींणू होर तेसा सेबकाई में सहभागी होऊ । 18 तेऊ अधर्मा री कमाई संघे एक खेच घाडी पेंदे लऊ होर सअ पडू होर तेऊरअ पेट फुटअ होर सारीी आंतडी बागे निखती । 19 ऐसा गला यरूशलेम में रहणे आले सभे समझी अखे तंणी कि तेऊ खेचा रा ना त्याह री भाषा में "हकलदमा" यानि कि लोहू रा खेच पडू । 20 भजन संहिता में लिखुदा , 'तेऊ रअ घर उजेड़ा होर तेऊ में कोहे नांई बसे होर तेऊ रा पद कोई दूजअ नांई लए। 21 इसलिय जेतरी दिहाड़ी दईबा यीशु हामे संघे ईछदअ रहू-अर्थात यहुन्ना रे बपतिस्मा क लेइकारे तेऊ रे हामा सेटा नीणे तक , जूंणा लोगा बराबर हामे संघे रही । 22 उचित सा कि त्याह में एक लोग हामे संघे जी उठणे रा गबाह हो । 23 तेबा त्याह ए दुई खड़े करी , एक यूसफ ज़ोह बार सबा कहलाउदा , जासका ना युसतुस , दूजअ मतियाह । 24 होर यह प्रार्थना करी , “ हे दईबा तू ज सभी रे मना जाणा यह प्रगट कर कि याह दुई में तांई कुण चुनु । 25 कि सअ ऐसा सेबकाई होर प्रेरिताई रा पद ले जूंण यहूदा छाडीकरे आपांणी जगह बे नाठअ" । 26 तेबा त्याह ए त्याह रे ना री पडची पाई होर पडची मतियाह रे ना री निखली । तेबा स त्याह ग्यारह प्रेरितों संघे गीणू ।