यीशु रे जन्म
( मती 1 :18 -25 )
2
1 तेया दिहाड़ी में औगुस्तुस कैसर तरफा कै यह आज्ञा निकती की संसारीा रै सभी लोगा रै ना लिखने । 2 यह तेऊ टाईमा री पहली नाम लिखाई । 3 सारीे लोका आपणे ना लीखाउने री ताणी आपणे - आपणे नगरा वै नाठे । 4 तेवा यूसुफ बी ग्लीला रे नासरत के यहूदिया में दाउदाआ रे नगर बेतलहम वै नाहठअ किबेकी सह दाउदा रे घराने होर बंशा का , 5 की आपांणी मंगेतर मरियम संगा ज़ो सूईंदी तीही ना लिखाऊ । 6 तेया रे तखे रहंदे - रहंदे तेसके सूईंणे दिहाड़े पुरे होई , 7 होर तेसे आपण पहिलौठअ पुत्र वै जन्म दीना होर सह झिकड़े में लपेटी करे चरनी में डाऊ ; किवेकी तेया वै सराय में जागा नी ।स्बर्गदूत रा फुआला वै फयाड़ा
8 होर तेऊ देशे केथ्रे फुयाल तीही ज़ोह मेदाना में रहिकरे आपणे भेड़ा वे पहरा दीन्दा । 9 होर दईबा रा दूत तेया सामने खड़अ होऊ , होर दईबा रे तेज़ तेया रे चऊ तरफ चमकू , होर तेया बखे डरी । 10 तेवा स्वर्गदूत तेया वै बोलू , “डरा नी आंदे ; किबेकी भाल़ा हाऊ तमा वै एक बखे ख़ुशी री सुसमाचार शुनाऊंदा ज़ो सबी लोगा वै हूणी , 11 की आज़ दाऊदा रे नगरे थारी ताणी एक उद्धार करता जन्मु , होर यह मसीह दईबा साहा । 12 होर एतका यह थारी ताणी पता हूणा की तमा एक बालक झिकड़े में लपेटू द होर चरणी में डाऊद भाल़ण ।” 13 तेबा एकाएक तेऊ स्बर्ग दुते संघे खासे स्बर्गदूत दईबा री स्तुति करदे होर एड़ा बोलदे हेरी , 14 “सरग े दईबा री महिमा होर पृथ्बी में तेया मंशा में जासू के सह खुश सा , शान्ति हो ।” 15 ज़ेवा स्वर्गदूत तेया नेणा के स्बर्गा वै नाठे , फुआले आपु मेंज़े बोलू , “चाला हामे बेतलहम नाशिकरे यह गौल ज़ो होई , होर दईबे हामा वै खोज़ु भाले चाला ।” 16 होर तेया तेबरी नाशिकरे मरियम होर यूसुफ , होर चरणी में सह बालक भाल़ू । 17 एता भालिकरे तेया यह गौल ज़ो येऊ बालक रे बारे तेया वै खोजू तीही , प्रगट करी , 18 होर सबी शूणने आल़े या गौला के ज़ो फुआले तेया वै खोज़ी बखे हेरान होई । 19 पर मरियम या गौला आपणे मने डाई क्रुसा चती रही । 20 होर फूआले ज़ेड़ा तेया के बोलू , तेड़ा ही शुनिकरे होर भालिकरे दईबा री महिमा होर स्तुति करदे फिरी आये ।
यीशु रा नामकरण
21 ज़ेव्रे आठ दिहाड़ी पूरी होई होर तेऊ रे खतना करने रा समा आउया , तो तेऊ रा ना यीशु डाऊ ज़ोह स्वर्गदूत तेऊ रे पेटा में ईंणे के पहिले बोलू दा तीही ।
मंदिरे यीशु रा अर्पण
22 ज़ेवा मूसा री रीवाज़(व्यवस्था) सावे (अनुसारी ) तेया रे शुद्ध हूणे रे धिहाड़े पुरे होर होई , तेवा तेया सह येरुश्लेमा वै नीउँ की दईबा रे सामने आणें सके , 23 “(ज़ेड़ा की दईबा रे नैमा (व्यवस्था) में लिखू दा साहा की हर पहीलौठा दईबा री ताणी पवित्र हूणंअ : ”) 24 होर दईबा रे नेमा रे सावे : “पंडूकों र एक ज़ोह ड़ा , या कबूतरा रे दूई बच्चे आणठीक री बली दे ।
शमौन री गी
25 येरुश्लेमा में शमौन ना र एक मन्श , होर सह मन्श धर्मी होर भक्त ; होर इस्राएल री शान्ति री ताणी बाट ज़ोह्न्द लागअ द , होर पवित्र आत्मा तेऊ पेंदे । 26 होर पवित्र आत्मा संघे तेऊ वै एडा प्रकट होई की ज़ेब्रे तक सह मसीह नाई भाल़अ , तेव्रे ताणी तेऊ मौऊत वी नाई भाल़णी । 27 सह आत्मा रे सिखाउने के मंदिरा में आऊअ ; होर ज़ेब्रे माँ बाबे तेऊ बच्चे यीशु मिहत्रा वै आणे , की तेऊ री ताणी व्यवस्था री रीती रअ नुसारी करे , 28 तेबा तेउये सह आपांणी कुमड़ी ब्शेयागु होर दईबा रा धनियाबाद करठीक रे बोलू : 29 “हे स्वामी , एबा तू आपणे दासा आपने बचना रअ नुसारी शान्ति संघे भेज्दा , 30 किबेकी मेरी आछीये तेरा उद्धार भाली मुका , 31 सह तांईऐं सभी देशा रे लोगा वे तेयार करू द , 32 की सह अन्यजाति वै प्रयाषा हूणे वै ज्योति होर तेरे आपने लोका इस्राएल री महिमा होए ।” 33 तेऊ र बाव होर तेऊ री आमा या गौला कै ज़ो तेऊ रे बारे बोलदा तीही , हेरानी हूंदा तीही । 34 तेवा शमौने तेऊ वै आशीष देई करे तेऊ री आमा मरियम वै बोलू , “भाल़ , सह इस्राएल में खासे रे पड़ने होर उठने री ताणी , होर एड़अ चिह्न हूणे री ताणी ठहराऊदअ , जासू रे बिरोधा में गौला हूणी । 35 बरन तेरा प्राण भी तलबार संगा आर पार छिदण – एता संघे खासे दिला रे वचार प्रकट हूणे ।”
हन्नाह री गुआही
36 अशेर रे गोत्र में के हन्नाह ना रे एक फनुयल री शोरी एक भविष्यवक्ता तीही । सह खासी बुडली , होर वियाह बाद साता बर्षा तक सह आपने लाड़े संघे रही । 37 सह चौरासी साला के बिधबा : होर मंदिरा नाई छाड़दी , पर ब्रत होर प्रार्थना करी करे राच दीहाड़ उपासना करदा तीही । 38 होर सह तेसा घड़ी तखे इछी करे दईबा रा धनियाबाद करदी लागी , होर तेया सभी के , ज़ो येरुश्लेमा छुटकारे री बाट ज़ोह्न्दा , तेऊ बच्चे रे बारे गौला करदी लागी ।
नासरता वै बापिस ईणा
39 ज़ेवा तेया व्यवसता रअ नुसारी सब कुछ पूरा करी मुके तेउकी आपने नगरा नासरता वै भी नाठे । 40 होर बच्चअ बढ़द होर बलवंत हूंदअ रहू होर बुधी आल़ हूंदअ रहू ; होर दईबा र अनुग्रह तेऊ पेंदे तीही ।
बालका यीशु देहुरे में
41 तेऊ रे माँ बाब हर साल फसह री जाचा री दीहाड़ी येरुश्लेमा वै नाए करदा । 42 ज़ेबा यीशु बाहरा साला र होऊ , तेवा तेया जाचा री रीती रअ नुसारी येरुश्लेमा वै नाठे । 43 ज़ेबा तेया त्या दिहाड़ी पूरा करठीक रे इंदे लागे , तो बालक यीशु येरुश्लेमा में रहू ; होर तेऊ रे माँ बाब नाई जानदे । 44 तेया एड़ा जाणु की सह होरी लोका संघे हुणअ , एकी दिहाड़ी र पडाब मूकअ काड़ी : होर तेया तेऊ आपने कुटुम्बियो में होर आपने जाण पचाने में लोड़दे लागे । 45 पर ज़ेबा नाई भेटअ , तो लोड़दे - लोड़दे भी येरुश्लेमा वै नाठे , 46 होर चीई दिहाड़ी बाद तेया सह मंदिरा में शास्त्री मेज़े बेठद , तेया रे शुन्दअ होर प्रश्ना करदअ भाल़ू । 47 ज़ेथ्रे तेउ री शुणी तेया सभे तेऊ री समजा के होर तेऊ रे उत्तरा के हेरान होई । 48 तेवा तेया तेऊ भालिकरे हेरान होई होर तेऊ री आमा तेऊ के बोलू , “हे पुत्र , तांए हामा संघे एड़ा किवे करू ? हेर , तेरअ बापू होर हांउ ता लोड़दे लागे दे ?” 49 तेऊ तेया के बोलू की तमे माँ किवे लोड़दा ? तमे नी जानदे की मां आपने बापू रे घरे रहना जरूरी साहा दा ?” 50 पर ज़ो गौल तेऊ बोली , तेया सह नाई समजी । 51 तेवा सह तेया संघे नाठअ होर नासरत वै आउअ , होर तेया रे बशे रहू ; होर तेऊ री आमा या सारीी गौला आपने मने डाई । 52 होर यीशु बुधी होर डील डौल में , होर दईबा रअ नुग्रह में बढ़दअ रहू ।