मत्ती 25

दस कुँबारियों रा दृष्टान्त

1 “ सरग रा राज्य तया दस कुंबरिया रे बराबर हूँणा ज़ोह आपणे मसले नी करे आपणे लाढ़े संघा भेंटा करदी निकती । 2 तया मेज़े पाँज़ मुर्ख होर पाँज़ समझदार , । 3 मूर्खे आपणे मसले त नी , पर आपु संघा तेल नाईं निउं ; 4 पर समझदारे आपणे मसले संघा आपांणी कुपी में तेल भी भरू । 5 जेबा लाढ़े रे ईंहंणे में देर होई , तेबा तया सभी टुली लागी होर सूती । 6 “ आधी राची में धूम मची : ' हेरा , लाढअ इहंदअ लागअ ! तेऊसंघा भेंटा करने बे चाला ।' 7 तेबा सभे कुँबारियाँ उठी करे आपणे मसले ठीक करदी लागी । 8 होर मूर्खे समझदारा बे बोलू , ' आपणे तेला मेजा का कुछ हमा बे भी देया , किबेकि म्हारे मसले हिशी चाली ।' 9 पर समझदारे उतर दिंना , 'कदाचित यह हामा होर तमा बे पूरा नाईं होए ; भला यह साहा की तमे बेचण आल़े सेटा नाहीं करे आपु बे तेल लआ ।' 10 तेबा तया लउंदी चाली , तेबा लाढअ आउअ , होर ज़ोह तयार , सह तेऊ संघा रे घरा बे नाठी होर दुआर बन्द करू । 11 एता बाद तया दूजी कुंबारिया भी बोलदी लागी , हे स्बामी , हे स्बामी , हामा बे दुआरा खोला !' 12 तेऊ उतर दिंना , 'हाँऊं तमा बे सच बोला , हाँऊं तमा नाईं ज़ाणदअ ।' 13 एतकी तणी ज़ागदे रहा , किबेकि तमे नाईं तेसा धियाड़े ज़ाणदे , नाह तेसा घड़ी । तोड़े रा दृष्टान्त 14 “ किबेकि यह तेऊ मणशा री दशा साही साहा जूणी प्रदेशा बे नाहंदे टाइमे आपणे दास शादी करे आपांणी संपति त्याह ह बे सोंपी । 15 तेऊ एकु बे पाँज़ तोड़े होर दूजे बे दुई , होर चिउंणे बे एक ; अर्थात हर एकु बे तेउरी सामर्थ्य रे साबे दिने , होर तेबा प्रदेशा बे नाठअ । 16 तेबा जासु पाँज़ तोड़े भेटे , तेऊ तेभरी नाहीं करे तयाहे संघा लेन देन करू , होर पाँज़ तोड़े होर कमाई । 17 एसी रीति संघा जासु दुई भेटे , तेऊ भी दुई होर कमाई । 18 पर जासु एक भेटअ , तेऊ नाहीं करे माटा कोतू , होर आपणे स्बामी रे ढबे गझयाई डाही 19 “ बहू धियाड़े बाद तया दासा र स्बामी इच्छी करे तया का साबा माँगदअ लागअ । 20 जासु पांज तोड़े भेटे , तेऊ पांज़ तोड़े होर आणी करे बोलू , 'हे स्बामी , तांईं मांह बे पांज तोड़े सोंपी , हेर , माईं पांज़ तोड़े होर कमाई ।' 21 तेउरे स्बामी तेउबे बोलू , 'धन्य , हे शोभले होर बिश्बासयोग्य दास , तूह थोड़े में बिश्बासायोग्य रहू ;मांह तूह बस्तु (चिज़ा) र अधिकारी बणाउणं । आपणे स्बामी रे आनन्दा में सहभागी हो ।' 22 होर जासु दुई तोड़े भेटे , तेऊ भी इच्छी करे बोलू , 'हे स्बामी , तांईं मांह बे दुई तोड़े दिने , हेर , माईं दुई तोड़े होर कमाई ।' 23 तेउरे स्बामी तेउबे बोलू , 'धन्य , हे शोभले होर बिश्बासयोग्य दास , तूह थोड़े में बिश्बासायोग्य रहू ;मांह तूह बहू बस्तु (चिज़ा) र अधिकारी बणाउणअं । आपणे स्बामी रे आनन्दा में सहभागी हो ।' 24 “ तेबा जासु बे एक तोड़अ भेटअ , तेऊ इच्छी करे बोलू , ' हे स्बामी , हाँऊं ताह ज़ाणा कि तूह कठोर (सख्त) मणश साहा : तूह ज़धे कंधी नाईं बउंदअ तखे लउंदा होर ज़खे नाईं छींटता तखा का बटोरा । 25 एतकी तणी हाँऊं डरु होर तेरअ तोड़अ नाहीं करे माटे में गझयाउ ।हेर , ज़ोह तेरअ साहा , यह सह साहा ।' 26 तेउरे स्बामी उतर दिंना , ' हे दुष्ट होर आलसी दास , जेबा तूह यह ज़ाणा , कि ज़खे माईं नाईं बउ तखा का लउंदा , होर ज़खे माईं नाईं छींटु तखा का बटोरा : 27 तेबा ताह लोढ़ी , कि मेरअ रपई सर्राफों बे दींदअ , तेबा हाँऊं इच्छी करे आपणा धन ब्याज समेत माँगदअ । 28 एतकी तणी तेऊ तोड़े तेउका माँगा , होर जासू सेटा दस तोड़े साहा , तेऊ बे देह । 29 किबेकि जासू कासी सेटा साहा , तेउबे होर दींणा ;होर तेऊ सेटा बहू हूँणा : पर जासू सेटा किछे नाईं आन्धा , तेऊका सह भी ज़ोह तेऊ सेटा भी साहा , सह भी माँगणा । 30 होर एउ नकामे दासा बागले न्यारे में पा , ज़खे लेरना होर दाँद चाबणा हूँणा ।' न्याय री ध्याड़ 31 “ जेबा मणशा र शोहरू आपांणी महिमा में इलअ होर सब सरग दूत तेऊ संघा ईंहंणे , तेबा सह आपांणी महिमा रे सिंहसना पेंदे बिराजमान हूँणअं । 32 होर सब जाति तेउरे सामने कठे करणी ; जेड़े फुआल भेडा बकरी का अलग करा , त्तेड़े ही तेऊ तया एकु दूजे का अलग करणी । तेऊ भेडा आपांणी धूरा फेरा बे होर बाकरी बाईं फेरा बे खड़ी करणी । 33 तेऊ भेडा आपांणी धूरा फेरा बे होर बाकरी बाईं फेरा बे खड़ी करणी । 34 तेबा राजा आपणे धुरे फेरा आल़े बे बोलणाा , 'हे मेरे बापू रे धनी लोको , ईच्छा , तेऊ राजे रअ धिकारी होआ , ज़ोह जगता में आदि (पहिले) का तयार करू द । 35 किबेकि हाँऊं भोछअ , होर तमे मांहबे खांणे बे दिंना ;हाँऊं शोखअ , तमे मांह बे पाणी पलाऊ ;हाँऊं परदेशी , होर तमे हाँऊं आपणे घरे ठहराउ ; 36 हाँऊं नेगअ , होर तमे मांह बे झिकड़े पनेईं , होर बमार , होर तमे मेरी सुधि करी , हाँऊं बंदीगृहा में , होर तमे मांह बे मिलदे आउए ।' 37 “ तेबा धर्मी तेउबे उतर दींणा , 'हे दईबा , हामे कधू तूह भोछअ हेरू होर ख्लाऊ ?या शोखअ हेरू होर पाणी पलाऊ ? 38 हामे कधू तूह परदेशी हेरू होर आपणे घरे ठहराउ ?या नेगअ हेरू होर झिकड़े पनेईं ? 39 हामें कधू बमार होर बन्दीगृहा में हेरू होर तांईं संघा मिलदे आउए ? 40 तेबा रजा त्याह ह बे उतर दींणा , 'हाँऊं तमा बे सच बोला कि तमे ज़ोह मेरे होछे का होछे भाई मेजा का तमे कासु एकु संघा करू , सह माईं ही संघा करू ।' 41 तेबा तेऊ बाईं फेरा आल़े बे बोलणाा , ' हे शापित लोको , मेरे सामने का तेसा अनन्त आगि में नाहाँ , ज़ोह राकसा होर दूता बे तयार करी दी । 42 किबेकि हाँऊं भोछअ , होर तमे मांह बे खाणे बे नाईं दिंना ;हाँऊं शोखो , तमे मांह बे पाणी नाईं पलाऊ ; 43 हाँऊं परदेशी , तमे हाँऊं आपणे घरे नाईं ठहराउ , हाँऊं नेगअ , तमे मांह बे झिकड़े नाई पनेईं ;हाँऊं बमार होर बन्दीगृहा में , तमे मेरी सुधि नाईं लई ।' 44 “ तेबा तया उतर दींणा , 'हे दईबा , हामें तूह कधू भोछो , या शोखो , या परदेशी या नेगअ या बमार या बन्दीगृहा में हेरू , होर तेरी सेबा ठहील नाईं करी ?' 45 तेबा तेऊ तयाबे उतर दींणा , ' हाँऊं तमा बे सच बोला कि तमे ज़ोह याह होछे का होछे मेंज़ा का कासु एकु संघा नाईं करू , सह माँईं संघा भी नाईं करू ।' 46 होर याह अनन्त दण्ड भोगणा पर धर्मी अनन्त जीबना में प्रबेश करना ।”