मत्ती 23

शास्त्री होर फरीसी का साबधान

1 तेबा यीशु भिड़ा होर आपणे चेले बे बोलू , 2 “ शास्त्री होर फरीसी मूसा री गद्दी में बेठे दे ; 3 एतकी तणी हाँऊं ज़ोह कुछ तमा बे बोल्लअ तेता करे होर मने , पर तया साही काम नाईं करे ;किबेकि तया बोला त साहा पर करदे नाईं । 4 त्याह ह एक एडे गरके बोझा बे जासू चुआकणा मुशिकल साहा , बान्हीं करे तया मणशा री कान्हां डाहंदा ;पर आपु तेता आपांणी गुठी संघा भी सरकाउंणा भी नाईं चाहंदे । 5 तया आपणे सारीे काम लोका रिहाउंणे बे करा : तया आपणे ताबिजा च़ऊड़े करा होर आपणे झिकड़े री कोरे बढ़ाउंदा । 6 भोजा में मुख्य-2 ज़ाघा , होर सभा में मुख्य- मुख्य आसन , 7 बजारे नमस्कार , होर मणशा में रब्बी बणना तया भाउंदा । 8 पर तमे रब्बी नाईं बणे , किबेकि थारअ एक ही गुरु साहा , होर तमे सभे भाई साहा । 9 पृथ्वी में कासी बे आपण बापू नाईं बोले , किबेकि थारअ एके ही बापू साहा , ज़ोह सरगे साहा । 10 होर स्बामी भी नाईं बणे किबेकि थारअ एक ही स्बामी साहा , अर्थात मसीह । 11 ज़ोह तमा का बडअ हो , सह थारअ सेबक बणे । 12 ज़ोह कोई आपणे आपु बे बडअ मनलअ , सह होछअ हूँणअं होर ज़ोह कोई आपणे आपा बे होछअ मनलअ , सह बडअ हूँणअं । शास्त्री होर फरीसी रे पाखण्डा री भर्त्सना 13 “ हे कपटी शास्त्रियो होर फरीसियो तमा पैंदे हाय ! तमे मणशा बे सरगा रे राज्य र दुआर बन्द करा , नाह त आपु ही तेऊ में प्रबेश करदे होर नाह तेऊ में प्रबेशा कर्ण आल़े प्रबेश करने दिंदे । 14 हे कपटी शास्त्रियो होर फरीसियो तमा पैंदे हाय ! तमे बिधबा रे घरा खांदा , होर रिहाउंणे री तणी बड़ेी देर तणी प्रार्थना करदे रहंदा एतकी तणी तमा ज्यादा दण्ड भेटणा । 15 “ हे कपटी शास्त्रियो होर फरीसियो तमा पैंदे हाय ! तमे एकु जना आपणे मता में आणने री तणी सारीे जल होर थला में फिरा , होर जेबा सह मता में इहंदा तेबा तेऊ आपु का दूना नारकीय बणाउंदा । 16 “हे काणे अगुबे , तमे पैंदे हाय ! ज़ोह बोला कि अगर कोई देहुरे री कसम खाए तेबा किछे नाईं , पर जेबा कोई देहुरे रे सुने री कसम खाए तेबा तेता का फसणअं । 17 हे मूर्खो होर काणेयों , कुंण बडअ साहा ; सुना या सह देहुरअ जासू में सुना पवित्र हुंदा ? 18 तेहुकी बोला कि अगर कोई बेदी री कसम खाए तेबा किछे नाईं पर ज़ोह भेंट तेता में साहा , अगर कोई तेतकी कसम खाए तेबा फसणअं । 19 हे काणेयों , कुंण बडअ साहा ; भेंट या बेदी जासू का भेंट पवित्र हुंदा ? 20 इतकी तणी ज़ोह बेदी री कसम खांदा , सह तेतकी होर ज़ोह कुछ तेता में साहा , तेतकी भ कुछ तेता में साहा , तेतकी भी कसम खांदा । 21 ज़ोह देहुरे री कसम खांदा , सह तेउरी होर तेऊ में रहंण आल़े री भी कसम खांदा । 22 ज़ोह सरगा ऋ कसम खांदा , सह दईब रे सिंहसना री होर तेता में बेशण आल़े री भी कसम खांदा । 23 “ हे कपटी शास्त्रियो होर फरीसियो तमा पैंदे हाय ! तमे पोदीने , होर सोंफ , होर जीरे रा दसा अंश टी दिंदा , पर तमे ब्यबस्था री गम्भीर गला अर्थात न्याय , होर दया , होर बुशाह छाढू ; लोढ़ी , कि याह भी करदे रहंदे पर याह भी नाईं छाड़दे । 24 हे काणे अगुबे , तमे मच्छरा त छाना , पर ऊंटा त निगल़ा । 25 “ हे कपटी शास्त्रियो होर फरीसियो तमा पैंदे हाय ! तमे कटोरे होर थाल़ी पैंदे -पैंदे का मांजा पर तया मितर नयारे होर असंयम का भरी दे साहा । 26 हे काणे फरीसी , पहिले कटोरे होर थाल़ी मितरा का मांज़ कि तया बागा का भी साफ़ हो । 27 “ हे कपटी शास्त्रियो होर फरीसियो तमा पैंदे हाय ! तमे चुना फेरी दी कब्रा रे बराबर साहा ज़ोह पेंदा का टी शोभली हेरा , पर मितर मुडदे रे हाढके होर सभी प्रकारा री मलिनता का भरी साहा । 28 एसी रीति का तमे भी उझे का मणशा धर्मी हेरा , पर मितर कपट होर अधर्मा का भरी दे । शास्त्री होर फरीसी पेंदे दण्डा री भबिष्यबाणी 29 “ हे कपटी शास्त्रियो होर फरीसियो तमा पैंदे हाय ! तमे भबिष्यद्क्ता री कब्रा सबारा होर धर्मी री कब्रा बणाउंदा , 30 होर बोला , 'अगर हामे आपणे बाबा दादू री धियाड़े में हुंदे तेबा भबिष्यद्क्ता री हत्या में त्याह रे साझी नाईं हुँदे ।? 31 एता का त तमे आपु पेंदे आपे ही गुआही दिंदा कि तमे भबिष्यद्क्ता रे हत्याह रे शोहरू साहा । 32 पर तमे आपण बाबा दादू रे पापा र घडअ पूरी तरह भरा । 33 हे सर्पपो , हे करैता रे शोहरूअ , तमे नरका रे दण्डा का केढे बचणे ? 34 एतकी तणी हेरा , हाँऊं तमा सेटा भबिष्यद्क्ता होर शास्त्री होर बुदिमाना भेजू ;होर तमा तया मेंज़ा का कुछ मारी पाउंणे होर क्रुस में चढ़ाउंणे , होर कुछ आपणे आरधनालय में कोड़े बाहंणे होर एकु नगरा का दूजे नगरा बे खदेढदे रहंणे । 35 जासू का धर्मी हाबिल का लई करे बिरिक्याह रे शोहरू जकरयाह तणी , जूण तमे देहुरे होर बेदी रे मझे मारू , जेतारे धर्मी रा लोहू पृथ्वी में बहाउ सह सब थारे मुड़े पढ़णा । 36 हाँऊं तमा बे सच बोला , या गला एउ टाईमा रे लोका पेंदे इहंणी । यरूशलेमा बे बिलाप 37 “ हे यरूशलेम , हे यरूशलेम ! तुह भबिष्यद्क्ता मारी पाउंदा , होर ज़ोह ताहसेटा भेजी दे , त्याह ह पेंदे पथराब करा ।केतरी ही बारी माईं चाहू जेड़े मुर्गी आपणे शोहरू फयाखा भईं कठे करा , तेढे ही हाँऊं भी तेरे बालका कठे करू , पर तमे नाईं चाहू । 38 हेरा , थारअ घर तमा बे उजाड़ छाड़ा । 39 किबेकि हाँऊं तमा बे बोला कि एब्रा का तेबरे तणी नाईं बोलले , 'धन्य साहा सह , ज़ोह दईबा रे ना का इहंदा ' टबरे तणी तमे मांह भी कधी नाईं हेरणअं ।”