मत्ती 22

बियाह - भोजा रा दृष्टान्त

1 यीशु तेउकी तया वे बोलदअ लागअ , 2 सरगा रा राज्य तेऊ राजा बरावर सह , जासू आपणें शोहरू रा बियाह करू । 3 होर तेऊ आपणें दास भेजी कि 'निमंत्रित लोका बियाह में शादी ;परंतु तया ईणां नाई सोचु। 4 तेउकी तेऊ होरी दासा यह भेजी करी बोलू , 'निमंत्रि लोका वे बोलू हेरा , माई भोज तैयार डाउदा करी , मेरे बल्द होर पालीं दे डागे मारी दे है , होर सब कुछ तैयार सादा; बियाह रे भोजे वे ईच्छा ।' 5 पर सह उपेक्षा करी करे नाठे कोई आपणे खेचा बे , कोई आपणे बपारा बे । 6 होरे लोके ज़ोह बची तीही तेउरे दास ढाकी करे तया रा अनादर करू होर मारी पाई । 7 तेबा राजे रोष आउआ , होर तेऊ आपांणी सेना भेजी करे तया हत्याह रे रा नाश करू , होर तया रा नगर ज़ाल़ी पाऊ । 8 तेबा तेऊ आपणे दासा बे बोलू , ' बियाह रा भोज त तयार साहा पर शादी दे लोका योग्य नाईं ठहरी । 9 इतकी तणी तमे चुराहे में नाहाँ होर जेतारे लोका तमा भेटले , सभी बियाह रे भोज़ा में शादा ।' 10 तेबा तयाहे दासे सड़का में नाहीं करे कैह बुरे कैह भले , जेतारे भेटे , सभे कठे करी : होर बियाह र घर अतिथि संघा भरू । 11 “ जेबा राजा अतिथि हेरदअ मीतर आउअ , तेबा तेऊ तखे एक मणश हेरू , जूणी बियाह रे झिकड़े बान्हीं दे नाईं , । 12 तेऊ तेऊका पुछु , ' हे मितर ;तूह बियाह रे झिकड़े बानी बिना अखे किबे आउअ ?' तेऊ र मुँह बन्द होऊ । 13 तेबा राजे सेबका बे बोलू , ' एउरे हाथ ज़ाघा बान्हीं करे तेऊ बागे न्यारे में पा , तखे लेरना होर दांद पिशणा 14 किबेकि शादी दे त बहू साहा पर चुनी दे थोड़े साहा ।” कैसरा बे कर दींणा 15 तेबा फरीसी नाहीं करे आपु में बिचार करू कि तेऊ कासु साबे गला में फसाए । 16 पर त्याह हे आपणे चेले हेरोदिया संघा तेऊ सेटा यह बोलणाे बे भेजी , “हे गुरु , हामे ज़ाणा कि तूह सचअ साहा , होर दईबा री बात सचाई सिखाउंदा , होर कासी री परबाह नाईं करदअ , किबे कि तूह मणशा र मुँह हेरी करे गला नाईं करदअ । 17 एतकी तणी हामा बे खोज़ कि तूह कैह सोचा ? कैसरा बे कर दींणा ठीक साहा कि नाईं ।” 18 यीशु तया री दुष्टता ज़ाणी करे बोलू , “ हे कपटियो , मांह किबे परेखा ? 19 करा र सिक्क मांह बे रिहा ।” तेबा तयाहे तेऊ सेटा दीनार आणु । 20 तेऊ तया का पुछु , “ यह छाप होर ना कासका साहा ?” 21 तयाहे टू बे बोलू , “कैसरा रा ।” तेबा तेऊ तया बे बोलू , “ ज़ोह कैसरा रा साहा , सह कैसरा बे ; होर दईबा रा साहा , तेऊ दईबा बे देआ ।” 22 यह शुणी करे तया परशान होई , होर तेऊ छाढ़ी करे नाठे । पुनरुत्थान होर बियाह 23 तेसी धियाड़े सदुकी ज़ोह बोला , की मुएँ दे रा पुनरुत्थान साहा ही नाईं , तेऊ सेटा आउए होर तेऊ का पुछु , 24 “ हे गुरु , मुसा बोलू , कि अगर कोई मणश बिना शोहरूए मरे , तेबा तेऊर भाई तेउरी बेटढ़ी संघा बियाह करी करे आपणे भाई बे बंश पैदा करे । 25 एबा म्हारअ खे सात भाई , ;पहिलअ बियाह करी करे मुअं होर शोहरू नाईं हूँणे रे कारण आपांणी बेटढ़ी आपणे भाई बे छाढी । 26 एउ साबे दूजे होर चिउणे भी करू , होर साते तणी यहे ही होऊ । 27 सभी का बाद सह बेटढ़ी भी मुईं । 28 पर जिउंदी हूँणे बाद सह तया साता मेजा का कासकी बेटढ़ी हूँणी ? किबेकि सह सभी री बेटढ़ी होई छेकी , ।” 29 यीशु तया बे उतर दिंना , “ तमे पवित्र शास्त्रा होर दईबा री सामर्थ्य नाईं ज़ाणदे ; एउ कारणे भुला में पड़ी दे । 30 किबेकि जिउंदे हूँणे बाद नाहं तया बियाह करना होर नाहं तया बियाह में दींणे पर सरगा में दईबा रे दूता रे बराबर हूँणे । 31 पर मुएँ दे रे जिउंदे हूँणे रे बिषय में कैह यह बचन नाईं पढू ज़ोह दईबे तमा बे बोलू 32 ' हाँऊं इब्राहम र दईब , होर इसहाका र दईब , होर याकूबा र दईब साहा ? सह मुएँ दे र नाईं , पर जिउंदे र दईब साहा ।” 33 यह शुणी करे लोका तेऊरे उपदेशा का परशान होई । सभी का बड़ेी आज्ञा 34 जेबा फरीसी यह शुणु कि यीशु सदुकी र मुँह बन्द करू , तेबा तया कठे होई । 35 तया मेंज़ा का एक ब्यबस्थाबके तेऊ परेखणे री तणी पुछु , 36 “हे गरु , ब्यबस्था में कूंण जेही आज्ञा बड़ेी साहा ?” 37 तेऊ तेउबे बोलू , “ तूह दईब आपणे दईबा का आपणे सारीे प्राण होर आपांणी साड़ी बुदि रे संघा प्रेम डाह । 38 बड़ेी होर मुख्य आज्ञा त यहे साहा । 39 होर तेसी रे बराबर यह दूजी भी साहा कि तूह आपणे पड़ोसी संघा आपु बराबर प्रेम डाह । 40 या ही दुई आज्ञा सारीी ब्यबस्था होर भबिष्यद्क्ता रा आधार साहा ।” मसीह कासकअ शोहरू साहा 41 जेबा फरीसी कठे , तेबा यीशु तया का पुछु , 42 “ मसीहा रे बिषय में तमे कैह सोचा ? सह कासकअ शोहरू साहा ?”तयाहे तेउबे बोलू , “ दाऊदा र ।” 43 तेऊ तया का पुछू , “ दाऊद आत्मा में होई करे तेउबे दईबा किबे बोला ? 44 ' दईबा , मेरे दईबा बे बोलू , मांह धुरा फेरे बेश , जेबरे तणी कि हाँऊं तेरे बइरी तेरी ज़ाघा थंईं ना करे ।' 45 भला , जेबा दाऊदा तेउबे दईबा बोला , तेबा सह तेऊ र शोहरू केड़े होऊ ?” 46 एतके उतरा में कोई भी एक गल नाईं बोली सकू । तेसा दिहाड़ी का कासी भी तेऊ का पूछणे रा सहास नाईं होऊ ।