मत्ती 21

यरूशलेमा में बिजय प्रबेश

1 जेबा तया यरूशलेमा नेढ पूजी होर जैतून पहाडा पैंदे बैतफगे सेटा आउए , तेबा यीशु दुई चेले यह बोली करे भेजी , 2 “ सामने रे गराएँ नाहाँ ।तखे पूजदे ही एक गाधी बान्हीं दी , होर तेसे संघा बचअ भेटणअं ।तया खोली करे मांह सेटा बे आंणा । 3 अगर तमा बे कोई कुछ बोल्लअ , तेबा बोले कि दईबा याह रा प्रयोजन साहा , तेबा तेऊ तया तेभरी भेजणे ।” 4 यह एतकी तणी होऊ कि ज़ोह बचन भबिष्यद्क्ता रे दुआर बोलुदा , सह पूरा हो 5 “ सिय्योना री बेटी बे बोला , हेर , तेरअ राजा ताह सेटा बे इहंदा सह नम्र साहा , होर गाधे में बेठअ द साहा ; पर लादू रे बच्चे पैंदे ।'” 6 चेले नाहीं करे , जेढ़ा यीशु बोलूदा , तेढा ही करू । 7 होर गाढ़ी होर बच्चे आणी करे , तया पैदे आपणे झीकड़े पाई , होर सह तया पैंदे बेठअ । 8 तेबा बहू लोके आपणे झिकड़े बाता में बिछाई , होर होरे लोके बूटे का डाल़ी काटी करे बाता बिछाई । 9 ज़ोह भीड़ जेंह - जेंह नाहंदा , होर पीछे-2 इहंदा , पुकारी -पुकारी करे बोला , " दाऊदा री शोहरू बे होशाना , धन्य ज़ोह दईबा रे ना का इहंदा , सरगे होशाना ।” 10 जेबा तेऊ यरूशलेमा में प्रबेश करू , तेबा सारीे नगरे हलचल मची , होर लोका बोलदे लागे , “ यह कुंणअं साहा ?” 11 लोके बोलू , “यह गलीला रे नासरता र भबिष्यद्क्ता साहा ।” देहुरे का बपारी काढने 12 यीशु दईबा रे देहुरे में नाहीं करे तया सभे , ज़ोह देहुरे में लेना देना करदे , तया काढ़ी , होर सर्राफो रे पीढ़े होर कबूतरा बेचण आल़े री चौउकी उलटाई ; 13 होर तेऊ बोलू , “ लिखुदा साहा , 'मेरअ घर प्रार्थना रअ घर कलाउणं ; पर तमे तेऊ चोरा री खोह बणाउंदा ।” 14 तेबा काणे होर लेंगड़े , देहुरे में तेऊ सेटा बे आउए , होर तेऊ तया ठीक करी । 15 पर जेबा प्रधान याजक होर शास्त्री याह अद्बभुत काम , ज़ोह तेऊ करी , होर टसु देहुरे में ' दाऊदा री शोहरू बे होशाना 'पुकारदे हेरी , तेबा तया रोष उठू , 16 होर तेउबे बोलदे लागे , कैह तूह शुंणा कि या कैह बोला ?”यीशु तया बे बोलू , “ उओह; कैह तमे यह कधी नाईं पढू : ' बालका होर दूध झुटते शोहरू रे मुँहा का तांईं अपार स्तुति कराई ?” 17 तेबा सह तया छाढी करे नगरा का बागे बैतनिय्याह बे नाठअ होर राच तखे बिताई । फल़ रहित अंजीरा र बूटअ 18 भोरा (ब्याल्के) जेबा सह नगरा बे बापस इहंदअ , तेबा तेऊ भोछ लागी। 19 सडका रे कनारअ जीरा र बूटअ हेरी क्रुसा ह तेऊ सेटा बे नाठअ , होर पाचा छाढ़ी करे तेता में किछे नाईं पाई करे तेऊ बे बोलू , “ एबरा का ताह में कधी 20 यह हेरी करे च़ेलअचम्भा होऊ होर तयाहे बोलू , “ यह अंजीरा र बूटअ तेभरी केढ़े शुकअ ?” 21 यीशु तया बे उतर दिंना , “हाँऊं तमा बे सच बोला , अगर तमे बुशाह डाहले होर सन्देह नाईं करे , तेबा नाईं सीधी यह करना ज़ोह एऊ अंजीरा रे बूटे संघा करू , पर एउ पहाडा बे भी बोलले , ' उड़ , होर समुद्रा में नाहीं करे पड़ ' , तेबा यह हूँणा । 22 होर ज़ोह कुछ तमे प्रार्थना में बिश्बासा का माँगले सह सब तमा बे भेटणा ।” यीशु रअ धिकारा पैंदे प्रश्न 23 सह देहुरे में नाहीं करे उपदेशा करदअ , तेबा प्रधान याजक होर लोका रे पुरनियें तेऊसेटा इच्छी करे पुछू , “तुह यह काम कास्के अधिकारा का करा ? होर ताह बे यह अधिकार कुंणी दिंना ?” 24 यीशु तयाबे उतर दिंना , “ हाँऊं भी तमा का एक गल पूछा ; अगर तमे मांह बे खोजले , तेबा हाँऊं भी तमा बे खोज़लअ कि काम कासु अधिकारा का करा । 25 यहुन्ना रा बपतिस्मा कंधा का , ? सरगा री ओरा का या मणशा री ओरा का ?” तेबा तया आपु में बिबादा करदे लागे , “ अगर हामे बोलले ' सरग ा री ओरा का' , तेबा तेऊ हामा बे बोलणाा , ' तेबा तमे तेऊरा बुशाह किबे नाईं करू ?' 26 अगर बोलले ' मणशा री ओरा का' , तेबा हामा भिड़ा री डर साहा , किबेकि सब यहुन्ना भबिष्यद्क्ता मना ।” 27 तेबा तयाहे यीशु बे उतर दिंना , “ तेबा हाँऊं भी तमा बे नाईं खोज़दअ कि यह काम कासके अधिकार का करा । दुई शोहरू रा दृष्टान्त 28 “ तमे कैह सोचा ? कासु मणशा रे दुई शोहरू , ; तेऊ पहिले सेटा नाहीं करे बोलू ।' हे पुत्र , आज दाखा री बारी में काम कर ।' 29 “ तेऊ उतर दिंना , मांह नाईं नाहंणा ' , पर तेहुकी बसताई करे नाठअ । 30 तेहुकी बापू दूजे सेटा नाहीं करे एढा ही बोलू , तेऊ उतर दिंना , ' जी नाहूँ ' , पर नाईं नाठअ । 31 या दुई मेंज़ा का कुंणी बापू री ईच्छा पूरी करी ?” तयाहे बोलू , “ पहिले ।” यीशु तयाबे बोलू , “ हाँऊं तमा बे सच बोला कि महसूल माँगण आल़े होर बेश्याएँ तमा का पहिले दईबा रे राज्य में प्रबेश करा । 32 किबेकि यहुन्ना धर्मा री बात रिहाउंदे तमा सेटा बे आउअ , होर तमे तेऊ रा बुशाह नाईं करू ; पर महसूल माँगण आल़े होर बेश्याओं तेऊ रा बुशाह करू : होर तमे यह हेरी करे तेहुकी भी नाईं बस्ताए कि तेऊ रा बुशाह करदे । दुई किसाना रा दृष्टान्त 33 “ एक होर दृष्टान्त शुंणा : एक गृहस्बामी , जूणी दाखा री बारी लाई , तेतके चहु फेरे बाड लाई , तेता में रसा गाढ़अ कोतू होर गुम्मट बणाऊ , होर किसाना बे तेतका ठेका देई करे प्रदेशा बे नाठअ । 34 जेबा फल़ा रा टाइम नेड आउआ , तेबा तेऊ आपणे दास तेऊ रे फल़ा आंणने बे किसाना सेटा बे भेजी । 35 पर किसाने तेउरे दास ढाकी करे , एखा चिकी होर एखा मारी , होर कासु पैंदे पथराब करू । 36 तेहुकी तेऊ पहिले का ज्यादा होर दास भेजी , होर तयाहे भी तेडा ही करू । 37 लास्टा में तेऊ आपणे शोहरू तया सेटा भेजी कि तया मेरे शोहरू रा आदर करना । 38 पर किसाने शोहरू हेरी करे आपु में बोलू , ' यह त बारिस साहा , ईच्छा , यह मारी पाउणं एउ री मीरास लउणी ।' 39 पर तयाहे सह ढाकु होर दाखा री बारी का बागे काढी करे मारी पाऊ । 40 एतकी तणी दाखा री बारी र स्बामी इलअ , तेबा तयाहे किसाने संघा कैह करना ?” 41 तयाहे तेउबे बोलू , “ तेऊ तया बुरे लोका बुरी रीति संघा नष्ट करने ; होर दाखा री बारी रा ठेका दूजे लोका बे दींणा , जूणा तेउबे टाइमा में फल़ देले ।” 42 यीशु तया बे बोलू , “ कैह तमे पवित्र शास्त्रा में यह नाईं पढू : ' जूण पाथर राज मिस्त्री नकामअं डाहू , सहे कुणे र पाथर होऊ ? यह दईबा री ओरा का होऊ , होर म्हारी नजरा में अद्बभुत साहा ।' 43 एतकी तणी हाँऊं तमा बे बोला कि दईबा रा राज्य तमा का माँगणा होर एडी जाति बे ज़ोह तेऊर फल़ आणे , दींणा । 44 ज़ोह एउ पथरा पैंदे पढ़लअ , सह चकनाचूर हूँणअं ; होर जासू पैंदे सह पढ़नअं , सह पिष्णअं ।” 45 प्रधान याजक होर फरीसी रे दृष्टान्ता शुंणी क्रुसा मझी कि सह तया रे बिषय में बोला । 46 होर तयाहे सह ढाकणअं चाहू , पर लोका का डरी किबेकि तया तेऊ भबिष्यद्क्ता मना , ।