मत्ती 20

बारी रे मजदूरा रा दृष्टान्त

1 “सरगा रा राज्य कासु गृहस्बामी रे बराबर साहा , ज़ोह दोती निकतअ की आपांणी दाखा री बारी में मजदूरा आणे । 2 तेऊ मजदूरा का (बे) एक दीनार रोजकअ डाहू होर तया आपांणी दाखा री बारी में भेजी । 3 तेहुकी एक पहर ढल़ु त् , तेऊ निखल़ी करे होरा लोक बजारे बेकार खड़े हेरी , 4 होर तेऊ बोलू , ' तमे भी दाखा री बारी मर नाहाँ , होर ज़ोह कुछ ठीक साहा तमा बे देलअ ।' तया भी नाठे । 5 तेहुकी तेऊ दूजे होर चिउंणे पहरे भी तेऊ तेढा ही करू । 6 एक घंटअ धियाड़े र रहू , तेऊ भी निखल़ी करे होरा खड़े हेरी , होर तेऊ बोलू , ' तमे किबे अखे पूरी ध्याड़ बेकार खड़े रही ?' त्याह हे तेउबे बोलू , ' एतकी तणी की कोही भी हमें कामा में नाईं लाई ।' 7 तेऊ त्याह ह बे बोलू , ' तमे भी दाखा रीबारी बे नाहाँ ।' 8 “ ब्यालके दाखा री बारी रे स्बामीएं आपणे भण्डारी बे बोलू , 'मजदूरा शादी करे पिछले का पहिले तणी तयाबे मजदूरी दे देआ । ' 9 जेबा तया आउए जूणी घंटे भर काम करू , तेबा तया एक दीनार भेटअ । 10 जूणा पहिले आउए दे , तयाहे यह समझू कि हामा जादा भेटणे , पर तया भी एक- एक दीनार भेटअ । 11 जेबा भेटा तेबा तया गृहस्बामी बे कुडकुडाई करे बोलदे लागे , 12 ' याहे पिछले एकु घंटे ही काम करू , होर तांईं तया हामा बराबर करी जूणी पूरी धियाड़े भर चुआकू होर धूपा सेहू ?' 13 तेऊ तया मेज़ा का एकु बे उतर दिंना , हे मित्र , हाँऊं ताह का किछे अन्याय नाईं करदअ । कैह तांईं ही मांह का एक दीनार नाईं बोलू , ? 14 ज़ोह तेरा साहा चुआक होर नाह ;मेरी यह इच्छा साहा कि जेतरा ताह बे देऊ तेतरा ही पिछले बे देऊ । 15 कैह यह उचित नाईं कि हाँऊं आपणे माला का ज़ोह चाहे सह करू ?कैह मेरे भले हूँणे रे कारण तुह बुरी नजरा का हेरा ?' 16 एसी रीति का ज़ोह पिछले साहा , तया पहिले हूँणे ;होर ज़ोह पहिले साहा , तया पीछे हूँणे ।” आपांणी मउती रे बिषय री चिउंणी भबिष्यबाणी 17 यीशु यरुशलेमा बे नाहंदे बारह चेले एकान्ता में नी , होर बाता तया बे बोलदअ लागअ , 18 “ हेरा , हामे यरुशलेमा बे नाहंदा ; होर मणशा र शोहरू प्रधान याजका होर शास्त्री रे हाथे रे हाथे ढाकणे बझयाल़णं होर सह घाता रे योग्य ठराउंणं । 19 होर सह अन्यजाति रे हाथे सौंपणं कि तया तेऊ ठठे े में उडाए , होर कोड़े बाहे , होर क्रुसा में चड़ाए , होर सह चिउंणे ध्याडे जिलाउंणं ।” एकु आमा री बिनती 20 तेबा ज़ेबादी रे शोहरू री आमा , आपणे शोहरू संघा यीशु सेटा नी करे प्रणाम करू , होर तेऊ का कुछ माँगदी लागी । 21 तेऊ तेसा बे बोलू , “ तूह कैह चाहंदा ?” तेसे बोलू , “ यह बचन देह कि मेरे दुई शोहरू तेरे राज्य में एक दांई होर दूजअ बांई फेरे बेशे ।” 22 यीशु उतर दिंना , “ तमे नाईं ज़ाणदे कि कैह माँगा ।ज़ोह कटोरअ हाँऊं झूटण आल़अ साहा , कैह तमे भी झूटी सका ?” तयाहे तेउबे बोलू , “ झूटी सका ।” 23 तेऊ तया बे बोलू , “तमा मेरअ कटोरअ त झूटणं पर मर्रे दाएँ होर बाएँ कुंण बशागणं मेरा काम नाईं , पर जासू बे मेरे बापू री ओरा बे तयार करू , त्याह ही बे साहा ।” 24 यह शुंणी करे दसे चेले तया दुई भाई रा रोष होऊ । 25 यीशु तया सेटा शादी करे बोलू , “ तमे ज़ाणा कि अन्यजाति रे न्यायधीश तया पैंदे दईबा ता करा , होर ज़ोह बड़ेे साहा तया त्याह ह पैंदे अधिकार डाहंदा । 26 पर तमा में एढा नाईं हूँणा , पर ज़ोह कोई तमा का बढ़अ हूँणा चाहे , सह थारअ सेबक बणे ; 27 ज़ोह तमा में प्रधान हूँणा चाहे , सह थारअ दास बणे ; 28 जेड़े की मणशा र शोहरू ;एतकी तणी नाईं आउअ कि तेउरी सेबा टईल होए , पर एतकी तणी आउअ कि आपे सेबा टईल करे , होर बहू री छुडाउणे बे आपणे प्राण देए ।” दुई काणे बे दृष्टिदान 29 तेबा तया यरीहो का निखलते , तेबा तेऊ पीछे एक बड़ेी भीड़ लागी । 30 होर दुई काणे ज़ोह सडका रे कनारे बेठे दे , यह शुंणी करे कि यीशु नाहंदअ लागदअ , पुकारी करे बोलदे लागे , “हे दईबा , दाऊदा रे शोहरूआ , हामा पैंदे दया कर ।” 31 लोके तया डांडी कि चुप रहे ;पर तया होर भी चलाई करे बोलदे लागे , हे दईबा , दाऊदा रे शोहरूआ , हामा पैंदे दया कर ।” 32 तेबा यीशु खड़े होई करे , तया शादी होर बोलू , “ तमे कैह चाहंदा की हाँऊं थारी तणी करू ?” 33 तयाहे तेउबे बोलू , “ हे दईबा , कि महारी आछी का हेरे ।” 34 यीशु तरस खाई करे तया री आछी छुहीं , होर तया तेभरी हेरदा लागा ;होर तेऊ पीछे हाँडदे लागे ।