मत्ती 19

तलाका रे बिषय यीशु री शिक्षा

1 जेबा यीशु या गला करी छेकी , तेबा गलीला का नाठअ ; होर यरदना रे पार यहूदी रे प्रदेशा में आउअ । 2 तेबा बड़ेी भीड़ तेऊ पीछे होई , होर तेऊ तया तखे ठीक करी । 3 तेबा फरीसी तेउरी परीक्षा करने री तणी सेटा इच्छी करे बोलदे लागे , “ कैह हर एकु करणा का आपांणी बेटढ़ी त्याह गणी ठीक साहा ? 4 तेऊ उतर दिंना , “कैह तमे नाईं पढू कि जूणी तया बणाई , तेऊ पहिले का मणश होर वेटढ़ी बणाई करे बोलू , 5 एउ कारण मणश आपणे आमा बापू का अलग होई करे आपांणी बेटढ़ी संघा रहंणे होर तया दुहे एक तन हूँणे ?' 6 पर तया एबा दुई नाईं , पर एक तन साहा ।एतकी तणी ज़ोह दईबे ज़ोह ढ़ु , तेऊ मणश जुदा नाईं करे ।” 7 तयाहे तेऊ बे बोलू , “ तेउकि मुसा यह किबे ठहराऊ कि त्यागपत्र देई करे (तेसा छाडने री आज्ञा दे ) तेसा छाढी दे ?” 8 तेऊ तया बे बोलू , “मूसा थारे मना री कठोरता रे कारण आपांणी बेटढ़ी छाड़णे रीआज्ञा दिंनी , पर पहिले का एढा नाईं , । 9 होर हाँऊं तमा बे बोला , कि ज़ोह कोई ब्यभिचारा छाढ होर कासु कारणा का आपांणी बेटढ़ी त्याह गी करे दूजी संघा बयाह करे , सह ब्यभिचार करा ; होर ज़ोह तेसा छाढी दी संघा बयाह करे , सह भी ब्यभिचार करदा ।” 10 चेले तेउबे बोलू , “ अगर मर्दा रा बेटढ़ी संघा एढा सम्बन्ध साहा , तेबा बयाह करना ठीक नाईं आंन्धा ।” 11 तेऊ तया बे बोलू , “ सब यह बचन ग्रहण नाईं करी सकते , सीधी जासू बे यह दान दिंना । 12 किबेकि कुछ नपुंसक एढे साहा , ज़ोह आमा रे गर्भा का ही एडे जन्मी ;होर कुछ नपुंसक एढे साहा , जूणा मणशे नपुंसक बणाई ; होर कुछ नपुंसक एढे साहा , जूणी सरगा रे राज्य री तणी आपणे आपा बे नपुंसक बणाई (बणी) ।ज़ोह एउ ग्रहण करी सका , सह ग्रहण करे ।” बालका बे आशा ीर्वाद 13 तेबा लोके बालक तेऊ सेटा बे आणी कि सह तया पैंद हाथ डाहे होर प्रार्थना करे , पर चेले तया डाँडी । 14 यीशु बोलू , “ बालका मांह सेटा बे ईंहंणे देआ , होर तयाबे मना नाईं करा , किबेकि सरगा रा राज्य एढे रा ही साहा ।” 15 होर सह तया पैंदे हाथ डाही करे तखा का नाठअ । सेठ मणश होर अनन्त जीबन 16 एक मणश यीशु सेटा बे आउअ होर तेउबे बोलू , “हे गुरु , हाँऊं कुंण ज़ा भला काम करू कि अनन्त जीबन पाए ?” 17 तेऊ तेउबे बोलू , “तुह मांह का भलाई रे बिषय में किबे पूछा ? भला एक ही साहा , पर जीबना में अगर प्रबेश करना चाहंदा , तेबा आज्ञा मने कर । 18 तेऊये तेऊ बे बोलू , “ कुंण जेही आज्ञा ? “ यीशु बोलू , “ यह कि हत्याह नाईं करे , ब्यभिचार नाईं करे , चोरी नाईं करे , झूठी गुआही नाईं दे , 19 आपणें पापू होर आपांणी आमा रा आदर करे , होर आ पणे पड़ोसी संघा आपु बराबर प्रेम डाहे ।” 20 तेऊ जुआने तेउबे बोलू , “ या सभे त माँईं मनी दी ; एबा मांह में कासु गला री घाटी (काम ी)साहा ?” 21 यीशु तेउबे बोलू , “ अगर तुह सिद हूँणा चाहंदा तेबा नाह , आपणा माल बेची करे कंगाला बे दे , होर ताहबे सरगे धन भेटणा ; होर इच्छी करे मांह पीछे इच्छ ।' 22 पर तेऊ जुआने या गला शुणी होर नराझ होई करे नाठअ , किबेकि सह बहू सेठ , । 23 तेबा यीशु आपणे चेले बे बोलू , “ हाँऊं तमा बे सच बोला कि धन बाना रा सरगा रे राज्य में प्रबेश करना भू कठण साहा । 24 तमा बे भी बोला कि दईबा रे राज्य में धनबाना रे प्रबेशा करने का ऊँटा रा सिउंणी रे छेदा मेंज़ा का निखल़ना सहज( मुशिकल) साहा ।” 25 यह शुंणी करे चेले बहू प्रधान होई करे बोलू , “तेबा कासका उदार होई सका ?” 26 यीशु तया फेरा बे हेरी करे बोलू , “मणशा का त यह नाईं होई सकता , पर दईबा का सब कुछ होई सका ।” 27 एता पेंदे पतरस तयूवे बोलू , ''हेर , हामे सब कुछ-छाडी ता पीछे आउए तेवा हामा क़ेह भेटणा ?'' 28 यीशु तयाबे बोलू , “ हाँऊं ताह बे सच बोला कि नउंईं सृष्टि में मणशा र शोहरू आपांणी महिमा रे सिंहासना में बेशलअ , तेबा तमे भी ज़ोह मांह पीछे आउए दे साहा , बारह सिंहासना पैंदे बेशी करे इस्राएला रे बारह गोत्रा रा न्याय करना । 29 होर ज़ोह कोही घरे , या भाई , या बहिणी , या बापू , या आमा , या बाल बच्चे , या खेच मेरे ना का छाढी दे साहा , तेऊ श गुणा भेटणा , होर सह अनन्त जीबना र अधिकारी हूँणअं । 30 पर बहू ज़ोह पहिले साहा , पीछे हूँणे ; होर ज़ोह पीछले साहा , पहिले हूँणे ।