मत्ती 3

यहुन्ना बपतिस्मा दिहंण आलअ

1 तया धियाड़े यूहना बपतिस्मा दिहंण आल़अ इच्छी करे यहूदी रे बूणे एउ प्रचारा करदअ लागअ : 2 “मन फेरा , किबेकि सरगा रा राझ नेढ आउआ ।” 3 यह सहे साहा जासू की चर्चा यशायाह ज्योद्शी रे साबे करी : “बूणे एक बोलणा आल़अ बोलदअ लागअ , कि दईबा री बाता तयार करा , तेउरी सडका सीधी करा ।” 4 यह यहुना ऊंटा रे रोमा रे झिकड़े बानीं दे , होर आपांणी काम रा में चांबडे र कटिबन्ध बानीं दी , ।तेऊरा खाणा टिडिडयाँ होर बनमधु , । 5 तेबा यरूशलेम होर सारीे यहूदीया , होर यरदना रे नेडा तेडा सारीी ज़ाघा रे लोका तेऊ सेटा बे आउए । 6 तयाहे आपणे - आपणे पापा मनी करे यरदना नई (गाडा) में बपतिस्मा लउ । 7 जेबा तेऊ बहू फरीसी होर सदुकियाे भी बपतिस्मा बे आपु सेटा इहंदे हेरी , तेबा तेया वै बोलू , “हे सर्पा रे शोहरूअो , तमा वै कुणीऐ जताऊ कि इहंणे आल़ेए रोषा का ठुरा ? 8 एतकी तणी मना फरेउणे रे योग्य फल़अ आंणा ; 9 होर आपणे - आपणे मना में यह नाईं सोचा कि म्हारअ बापू इब्राहीम साहा ; किबेकि हांऊ तमा वै बोला कि दईब याह पाथरा का इब्राहीमा बे शोहरू पैदा करी सका । 10 एबा खुराडअ बूटे री ज़डा में डाहू द , इतकी तणी ज़ोह - ज़ोह बूटअ नाईं फल़दअ , तेऊ काटा होर आगि में ज़ाल़ाआ । 11 “हाँऊं त पाणी का तमा बे मन फरेऊणे री बपतिस्मा दींदा , पर ज़ोह मांह बाद इहंण आल़अ साहा , सह मांह का शक्तिशाली साहा ;हाँऊं तेऊ रे बूटा चुआकणे रे योग्या भी नाईं आंधअ । तेऊ तमा बे पवित्र आत्मा होर आगि संघा बपतिस्मा दींणी 12 तेऊ रअ शुप तेऊ रे हाथे साहा , होर तेऊ आपणा खलियान (खेच ) शोभली रीती संघा साफ करना , होर आपणे गिहूँ खत्ते में ही कठे करने , पर भूह तेसा आगि में ज़ाल़ना ज़ोह हिशणे री नाईं आंधीइ ।” यहुना दुआरा यीशु रा बपतिस्मा 13 तेऊ टाइमे गलीला का यरदना रे कनारे यहुना सेटा तेऊ का बपतिस्मा लऊंदअ आउअ । 14 पर यहुना यह बोलिकरे तेऊ रोकतअ लागअ , “ मांह त तेरे हाथा का बपतिस्मा लउंणे री जरूरत साहा , होर तूह मांह सेटा आउअ द साहा ?” 15 यीशु तेऊ बे उतर दिंना , “एबा त एडा ही हूँणे देह , किबेकि हामा एसी रीती का सब धार्मिकता पूरी करनी उचित (जरूरी ) साहा ।” तेबा तेऊ तेउरी गलअ शूणी । 16 होर यीशु बपतिस्मा लई करे तेभरी पाणी मेज़ा का उझे निकतअ , होर हेरा , तेऊ बे सरग खुलू , होर तेऊ दईबा का आत्मा कबुतरा रे बराबर उतरते होर आपु पैंदे इहंदअ हेरी । 17 होर हेरा , यह आकाशवाणी होई : “ यह मेरअ प्यारअ शोहरू साहा , जासू का हाँऊं काफी खुश साहा ।”