22
1 నస్తివలె పవులు,
“ఓ దాద తంబెర్‍ఙాండె,
బుబ్బరాండె,
నా లొఇ ఇని తపుబ సిల్లెద్ ఇజి మీరు నెస్ని వందిఙ్ యేలు నాను వెహ్సిని మాటెఙ్ వెండ్రు”,
ఇహాన్.
2-3 నస్తివలె పవులు వరి సొంత బాసదు వర్గినిక వారు వెహారె జమ్‍నె అల్లెత మహార్.
అయావలె పవులు,
నాను కిలికియ ప్రాంతమ్‍దు మని తార్సు ఇని పట్నమ్‍ది యూదా వాండ్రు.
అహిఙ యా పట్నమ్‍దు గొప్ప పేరు పొందితి గమలీయేలుబాన్ మోసే మా అన్నిగొగొరిఙ్ సితి రూలుఙ ఎనెట్ లోఙిదెఙ్‍నొ ఇజి వన్నిబాన్ నెగ్రెండ నెస్తానె పెరిత.
మీరు విజిదెరె యేలు ఎనెట్ పట్టుదలదాన్ బక్తి కిజినిదెరొ అయా లెకెండ్‍నె నానుబ కిజి మహా.
4 అహిఙ యేసు ప్రబుఙ్ నమిజి అయా సరి నడిఃని మొగ్గకొడొఃరిఙ్,
అయ్‍లి కొడొఃకాఙ్ ఇని తేడః సిల్లెండ తొహ్సి తసి జేలిదు ఇడ్‍జి సెగొండారిఙ్ సాని దాక మాలెఙ్ కిత.
5 దిన్ని వందిఙ్ పెరి పుజెరి,
పెద్దెల్‍ఙు విజెరె సాసి ఆత మనార్.
నాను దమస్కు పట్నమ్‍దు మహి మా సొంత లోకుర్ ఆతి యూదుర్ లొఇ మహి నమితి వరిఙ్,
యెరూసలేమ్‍దు తొహ్సి తసి మాలెఙ్ కిదెఙ్ ఇజి పుజెర్‍ఙబాన్ ఉత్రమ్‍కు లొస్తనె దమస్కు పట్నమ్‍దు సొండ్రెఙ్ సోత.
6 గాని నాను పయ్‍నం కిజి దమస్కు పట్నం డగ్రు సొహిఙ్ సరి,
వెటనె ఆగాసమ్‍దాన్ గొప్ప జాయ్ నా సుట్టులం తాక్తాద్.
నస్తివలె ఇంసు మింసు మిట్ట మద్దెనం ఆత మహాద్.
7 అయా జాయ్ నఙి తాక్తిఙ్ నాను బూమి ముస్కు అర్‍త.
నస్తివలె,
“సవులు,
సవులు నీను ఎందన్నిఙ్ నఙి మాలెఙ్ కిజిని?”
ఇజి ఉండ్రి జాటు వాతిక నాను వెహా.
8 అందెఙె నాను,
“ప్రబు,
మీరు ఎయిదెర్?”
ఇజి వెన్‍బాతిఙ్,
వాండ్రు,
“నీను మాలెఙ్ కిజిని నజరేతుదికాన్ ఆతి యేసునె నాను”,
ఇజి నా వెట వెహ్తాన్.
9 అహిఙ నా వెట మహికార్ ఆ జాయ్ సుడ్ఃజి తియెల్ ఆతార్.
గాని నా వెట వర్గితి ఆ జాటు వారు వెన్ఎతార్.
10 నస్తివలె నాను,
“ఓ ప్రబు నాను యేలు ఇనిక కిదెఙ్?”
ఇజి వెన్‍బాతిఙ్,
“నీను నిఙ్‍జి దమస్కు పట్నం సొన్అ.
అబ్బె నీ వందిఙ్ ఎర్‍పాటు కితి పణిఙ విజు నిఙి ఒరెన్ వెహ్నాన్‍లె”,
ఇజి నా వెట ప్రబు వెహ్తాన్.
11 అహిఙ ఆ జాయ్‍దాన్ నా కణుకు గుడ్డి ఆతిఙ్,
నా వెట మహికార్ నా కికాఙ్ అసి నడిఃపిసి దమస్కు పట్నం లొఇ కూక్త ఒతార్.
12-13 అయావలె మోసే సితి రూలుఙ్ లొఙిజి,
బక్తిదాన్ మహి అననియ ఇనికాన్ ఒరెన్ బాన్ మహాన్.
వాండ్రు యూదుర్ విజెరి లొఇ గొప్ప పల్కుబడిః మనికాన్.
వాండ్రు నా డగ్రు వాత నిహాండ్రె,
“బయి సవులు,
బేస్అ”,
ఇజి వెహ్తిఙ్,
నాను వెటనె బేస్తానె వన్నిఙ్ సుడ్ఃత.
14 అయావలె అననియ,
“మా అన్నిగొగొర్ దేవుణు నిఙి ఎర్‍పాటు కిత మనాన్.
దేవుణు నిఙి ఇని పణి వందిఙ్ ఎర్‍పాటు కితాండ్రొ అక్క నీను నెస్తెఙ్,
నీను నీతి నిజాయితి మని వన్నిఙ్ సుడ్ఃదెఙ్,
వన్ని వెయ్‍దాన్ వాతి మాటెఙ్ వెండ్రెఙ్ నిఙి ఎర్‍పాటు కిత మనాన్.
15 ఎందన్నిఙ్ ఇహిఙ,
నీను సుడ్ఃతికెఙ్,
వెహికెఙ్,
లోకుర్ విజెరిఙ్ వెహ్తెఙ్,
వన్ని వందిఙ్ ఉండ్రి సాసి వజ మండ్రెఙ్ ఇజి నిఙి దేవుణు ఎర్‍పాటు కితాన్.
16 అందెఙె నీను ఆల్‍సెం కిఎండ నిఙ్‍జి,
యేసు పేరుదాన్ పార్దనం కిజి బాప్తిసం లాగె ఆజి నీ పాపమ్‍కు నొరె ఆఅ”,
ఇజి పవులుఙ్ వెహ్తాన్.
17 నస్తివలె నాను యెరూసలేమ్‍దు మర్‍జి వాతానె దేవుణు గుడిఃదు పార్దనం కిజి మహిఙ్,
నఙి ఉండ్రి కల్ల తోరితాద్.
18 అయా కల్లదు ప్రబు,
“నీను యెరూసలేం డిఃసి గజిబిజి సొన్అ.
ఎందన్నిఙ్ ఇహిఙ నా వందిఙ్ నీను వెహ్ని సాసెమ్‍దిఙ్ వీరు ఒపుకొడ్ఃఎర్”,
ఇజి నా వెట వెహ్తాన్.
19 అందెఙె నాను,
“ఓ ప్రబు,
యూదుర్ మీటిఙ్ కిని ఇల్కాఙ్ సొన్సి నిఙి నమితి వరిఙ్ డెఃయ్‍జి జేలిదు తసి ఇట్తిక వారు విజెరె బాగ నెస్నార్.
20 అక్కదె ఆఎండ,
నీ వందిఙ్ సాసెం వెహ్సి మహి స్తెపనుఙ్ సప్తి వలె,
నాను బానె నిహానె అక్క ఒపుకొడ్ఃజి,
వన్నిఙ్ సప్తికార్ ముస్కు పొర్పాని పాతెఙ్ కాప్ కిజి మహా”,
ఇజి ప్రబుఙ్ వెహ్తాన్.
21 గాని ప్రబు,
“నీను సొన్అ.
దూరం దేసెమ్‍కాఙ్ బత్కిజిని యూదుర్ ఆఇ వరిబాన్ నిఙి పోక్సిన”,
ఇజి నా వెట వెహ్తాన్.
పవులు రోమదిఙ్ అక్కు మనికాన్ ఇజి వెహ్సినిక
22 యా మాట దాక పవులు వెహ్సి మహిక లోకుర్ వెంజినె మహార్.
అయావెన్కా వారు,
“విన్నిఙ్ బూమి ముస్కు బత్కిఎండ సప్సి విసిర్‍దు.
నన్నికాన్ బత్కిదెఙ్ వీలు సిలెద్”,
ఇజి వారు విజెరె నండొ గగొల్ ఆతార్.
23 నస్తివలె వారు ముస్కు పొర్పాని వరి సొక్క పాతెఙ్ కిసి విసిర్‍తారె దుల్లి రేప్సి డట్టం గగొల్ ఆతార్.
24 అందెఙె రోమ సయ్‍నమ్‍ది పెరి అతికారి,
“లోకుర్ పవులు పడిఃఎండ ఎందన్నిఙ్ ఈహు కోపం ఆజి గగొల్ ఆజినార్ ఇజి నెస్ని వందిఙ్,
వన్నిఙ్ బారి గోడ్డ లొఇ ఒసి కొర్‍డెఙ్‍దాన్ డెఃయ్‍దెఙ్”,
ఇజి అయా అతికారి ఆడ్ర సితాన్.
25 గాని వారు పవులుఙ్ తాడ్కణిఙ్ తొహ్సి మహిఙ్,
పవులు డగ్రు నిహి మహి అతికారిa వెట,
“రోమదిఙ్ అక్కు మనికాన్ ఆతి ఒరెన్ వన్నిఙ్ తీర్‍పు సిఎండ కొర్‍డదాన్ డెఃయ్‍దెఙ్ రోమ రూలుఙ్ వజ మిఙి అతికారం మనాదా?”
ఇజి పవులు వెన్‍బతాన్.
26 అయా అతికారి ఆ మాట వెహాండ్రె రోమ సయ్‍నమ్‍ది పెరి అతికారిబాన్ సొన్సి,
“నీను విన్నిఙ్ ఇనిక కిదెఙ్ ఇజి సుడ్ఃజిని?
వీండ్రు రోమదిఙ్ అక్కు మనికాన్ గె”,
ఇజి వన్నిఙ్ వెహ్తాన్.
27 అయావలె అయా పెరి అతికారి పవులు డగ్రు సొహాండ్రె,
“యేలు వెహ్అ,
నీను రోమదిఙ్ నిజం అక్కు మనికిదా?”
ఇజి వన్నిఙ్ వెన్‍బతాన్.
అందెఙె పవులు,
నిజమె ఇహాన్.
28 నస్తివలె అయా పెరి అతికారి,
“నాను లావు డబ్బు సితానె యా రోమది అక్కు కిబె ఆత మన”,
ఇజి వెహ్తిఙ్,
పవులు,
“నాను ఇహిఙ పుట్తి వలెహాన్ అసి రోమది అక్కు మనికాన్”,
ఇజి వన్నిఙ్ వెహ్తాన్.
29 అందెఙె పవులు వెట డట్టిసి వెహ్తెఙ్ వాతికార్ విజెరె వెటనె వన్నిఙ్ డిఃస్త సితార్.
ఆహె అయా రోమ సయ్‍నమ్‍ది పెరి అతికారిబ రోమదిఙ్ అక్కు మనికాన్ ఇజి నెస్తాండ్రె వన్నిఙ్ గొల్‍స్కాణిఙ్ తొహ్తి వందిఙ్ నండొ తియెల్ ఆతాన్.
30 మహ్సా నాండిఙ్,
యూదుర్ పవులు ముస్కు మొప్తి తపుఙ్ ఇనికదొ నెస్తెఙ్‍వలె ఇజి ఆస ఆజి,
అయా రోమది పెరి అతికారి పవులుఙ్ డిఃబిస్తాండ్రె,
పెరి పుజెరిఙ్‍ని సన్‍హెద్రి సఙమ్‍ది వరిఙ్ కూడ్ఃజి రద్దు ఇజి ఆడ్ర సితాన్.
వారు విజెరె కూడ్ఃజి వాతివలె పవులుఙ్ వరి ముందాల నిల్‍ప్తాన్.