పాపం కిఎండ మండ్రెఙ్ ఇజి వెహ్సినిక
17
1 యేసు వన్ని సిస్సుర్ వెట ఈహు వెహ్తాన్,
“తపుఙ్ కిబిస్ని సఙతిఙ్ తప్ఎండ వానె.
గాని అక్కెఙ్ ఎయె బాణిఙ్ వానెనొ వన్నిఙ్ అబయా!
నండొ బాదెఙ్ మంజినె.
2 నా ముస్కు నమకం ఇడ్‍జి, ఇజ్రి కొడొః లెకెండa మని వన్నిఙ్ ఎయెన్‍బ తపు కిబిస్తెఙ్ సుడ్ఃతిఙ, వన్ని మెడఃదు జత్త పణుకు తొహ్సి సమ్‍దరమ్‍దు విసిర్‍నికాదె వన్నిఙ్ నెగెద్.
3 అందెఙె మీ వందిఙ్ మీరె జాగర్తదాన్ మండ్రు.
నీ తంబెరి తపు కితిఙ వన్నిఙ్ బుద్ది వెహ్‍అ.
వాండ్రు మన్సు మారిసి తపు ఒపుకొటిఙ వన్నిఙ్ సెమిస్అ.
4 వాండ్రు ఉండ్రి దినమ్‍దు ఏడు సుట్కు నీ బాన్ తపు కిజి,
ఏడు సుట్కుబ నీ డగ్రు వాజి 'నా మన్సు మారిస్త నఙి సెమిస్అ' ఇజి వెహ్తిఙ నీను వన్నిఙ్ సెమిస్తెఙ్”, ఇజి వెహ్తాన్.
5 నస్తివలె అపొస్తురు, “మా నమకం డట్టం కిఅ”, ఇజి ప్రబుఙ్ వెహ్తార్.
6 అందెఙె వాండ్రు,
“మిఙి సర్సు గింజ నస్తు నమకం మహిఙ యా మల్‍బెరి మర్రతిఙ్ సుడ్ఃజి 'నీను వెల్లెఙణిఙ్ తెరెఆజి సమ్‍దరమ్‍దు సొన్సి అర్అ' ఇజి వెహ్తిఙ అక్క మిఙి లొఙినాద్.
7 ఒకొవేడః డూఃనికాన్ ఆతిఙ్‍బ,
గవ్‍డుఃఎన్ ఆతిఙ్‍బ,
మీబాన్ ఒరెన్ పణిమన్సి మహిఙ వాండ్రు మడిఃఙణిఙ్ వాతిఙసరి,
'యెలు నీను బేగి సొన్సి ఉణ్అ' ఇజి వెహ్నిదెరా?
సిల్లె.
8 'నీను సొన్సి తయార్ ఆజి ఇనికబ వర్అ.
నాను ఉణి దాక ఓరిసి నఙి బాట కిజి సిద.
అయావెన్కా నీను ఉణ్అ' ఇజి వెహ్నిదెర్?
9 అయా పణిమన్సిఙ్ ఒప్పజెప్తి విజు పణిఙ్ కితి వందిఙ్ వాండ్రు దయ తోరిస్తాన్ ఇజి ఎజుమాని పొగ్‌డిఃనాండ్రా?
10 అయా లెకెండ్‍నె మీరుబ మిఙి ఒప్పజెప్తికెఙ్ విజు కితి వెన్కా,
'మాపు ఇని దన్నిఙ్ పణిదిఙ్ రెఇ పణిమన్సిర్.
మాపు కిని పణిఙె కిత మనాప్' ఇజి వెహ్తు”, ఇహాన్.
పది మన్సి పెరి జబ్బుది వరిఙ్ నెగ్గెణ్ కిజినిక
11 యేసు యెరూసలేమ్‍దు పయ్‍నం కిజి సొన్సి మహివలె,
వాండ్రు సమరయ,
గలిలయ ప్రాంతం నడిఃమిహాన్ సొన్సి మహాన్.
12-13 వాండ్రు ఉండ్రి నాటొ సొన్సి మహిఙ్ పది మన్సి పెరి జబ్బు మనికార్ వన్నిఙ్ ఎద్రు వాజి దూరం నిహారె,
“మా ఎజుమాని ఆతి ఓ యేసు,
మఙి కనికారం తోరిస్అ”,
ఇజి డట్టం డేడిఃస్తార్.
14 అందెఙె వాండ్రు వరిఙ్ సుడ్ఃజి,
“మీరు సొన్సి పుజెర్‍ఙ తోరె ఆదు”,
ఇజి వెహ్తాన్.
వారు సొన్సి మహివలెనె నెగ్గెణ్ ఆతార్.
15 వరి లొఇ ఒరెన్ నెగ్గెణ్ ఆత ఇజి నెస్తాండ్రె డట్టం దేవుణుదిఙ్ పొగ్‍డిఃజి మర్‍జి వాతాన్.
16 వాండ్రు యేసు పాదమ్‍క అడ్గి ముణ్కుఙ్ ఊర్జి మాడిఃసి,
వందనమ్‍కు వెహ్తాన్. వాండ్రు సమరయదికాన్.
17 నస్తివలె యేసు,
“పది మన్సి నెగ్గెణ్ ఆతిదెర్ గదె.
అహిఙ,
అయా తొమిది మన్సి ఎమెవెర్?
18 యూదురిఙ్ సెందిఇ వీండ్రు ఒరెండ్రెనా దేవుణుదిఙ్ పొగ్‌డిఃదెఙ్ వాతాన్.
మరి ఎయెర్‍బ సిల్లెనా?”
ఇజి వెహ్తాన్.
19 అయావెన్కా యేసు,
“నీను నిఙ్‍జి సొన్అ.
నీ నమకమ్‍నె నిఙి నెగ్గెణ్ కితాద్”,
ఇజి వన్నివెట వెహ్తాన్.
దేవుణు ఏలుబడిః వందిఙ్ వెన్‍బాజినిక
20 “దేవుణు కిని ఏలుబడిః ఎసెఙ్ వానాద్‍లె”,
ఇజి పరిసయుర్ వెన్‍బతార్.
అందెఙె యేసు,
“దేవుణు కిని ఏలుబడిః,
విజెరిఙ్ తోర్ని లెకెండ్ రెఎద్.
21 ఎందన్నిఙ్ ఇహిఙ ఇదిలో,
దేవుణు కిని ఏలుబడిః మీ నడిఃమినె మనాద్.
అందెఙె ఇదిలో,
ఇబ్బె మనాద్.
అదిలో,
అబ్బె మనాద్ ఇజి వెహ్తెఙ్ ఆఎద్”, ఇజి వరిఙ్ మర్‍జి వెహ్తాన్.
22 అయావెన్కా వాండ్రు వన్ని సిస్సుర్ వెట ఈహు వెహ్తాన్.
“లోకుమరిసి మీ వెట ఉండ్రి దినం మండ్రెఙ్ ఇజి ఆస ఆని దినం వానాద్.
గాని మీరు అయా దినమ్‍బ సుడ్ఃదెఙ్ అట్ఇదెర్.
23 వారు మిఙి 'ఇదిలో,
ఇబ్బె మనాన్.
అదిలో,
అబ్బె మనాన్' ఇజి మిఙి వెహ్తిఙ మీరు వరివెట సొన్‍మాట్,
వరి మాటెఙ్ అస్‍మాట్.
24 ఎందన్నిఙ్ ఇహిఙ ఆగాసమ్‍దు ఉండ్రి దరిఙ్ మెర్‍సి మరి ఉండ్రి దరొట్ ఎనెట్ జాయ్ తోర్నాదొ, అయా లెకెండ్‍నె లోకుమరిసి దినమ్‍బ మంజినాద్.
25 అహిఙ దన్నిఙ్ ముఙల వాండ్రు నండొ ఇమ్సెఙ్ ఓరిసి, యా తరమ్‍ది వరివెట నెక్సి పొకె ఆనాన్‍లె.
26 నోవవు దినమ్‍కాఙ్ జర్గితి లెకెండ్‍నె లోకుమరిసి దినమ్‍దుబ జర్గినాద్‍లె.
27 నోవవు ఓడః లొఇ డుఃగితి దినం దాక లోకుర్ విజెరె ఉణిజి,
తింజి మహార్.
పెన్లి కిబె ఆజి,
పెన్లిదిఙ్ సీజి మహార్. నస్తివలె పెరి తుపాను వాజి ఏరు నిండ్రితాదె వరిఙ్ విజెరిఙ్ ముడుక్తాద్b.
28 అయావజనె లోతు కాలమ్‍దు జర్గితి లెకెండ్‍నె జర్గినాద్‍లె.
లోకుర్ విజెరె ఉణిజి తింజి,
కొడ్ఃజి,
పొర్సి,
మడిఃఙ్ ఉణుసి,
ఇల్కు తొహ్సి మహార్.
29 అహిఙ,
లోతు సొదొమ డిఃస్తి సొహి దినమ్‍దు ఆగాసమ్‍దాన్ సిస్సు రంజికం పిరు లెకెండ్ వాఙ్‍జి,
బాన్ మహి లోకుర్ విజెరిఙ్ నాసనం కితాద్c.
30 అయా లెకెండ్‍నె లోకుమరిసి తోర్ని దినమ్‍దుబ జర్గినాద్.
31 ఆ దినమ్‍దు మిద్దె ముస్కు మంజినికాన్ వన్ని ఇండ్రొ మని సామానమ్‍కు ఒతెఙ్ ఇజి డిగ్‌దెఙ్ ఆఎద్.
అయావజనె మడిఃఙ మంజినికాన్ ఇనికబ సామానం ఒతెఙ్ ఇజి ఇండ్రొ మర్‍జి వానిక ఆఎద్.
32 లోతు ఆడ్సిఙ్ ఉండ్రి సుట్టు ఒడిఃబిదుd.
33 ఎయెన్‍బ వన్ని పాణం కాపాడ్ఃదెఙ్ సుడ్ఃతిఙ దేవుణు వెట ఎల్లకాలం బత్కిని బత్కు సిల్లెండ ఆనాద్.
ఎయెన్‍బ వన్ని పాణం దేవుణు వందిఙ్ సితిఙ వన్నిఙ్ దేవుణు వెట ఎల్లకాలం బత్కిని బత్కు దొహ్‍క్నాద్.”
34 “నాను మీ వెట వెహ్సినిక ఇనిక ఇహిఙ,
అయా పొదొయ్ రిఎర్ ఉండ్రె మంసమ్‍దు మంజినార్.
వరి లొఇ ఒరెన్ వన్నిఙ్ దేవుణు కూక్న ఒనాన్. ఒరెన్ వన్నిఙ్ డిఃస్న సొనాన్.
35 రుండి బోదెక్ కూడ్ఃజి ఉండ్రె జత్తదు నూర్‍జి మహిఙ ఉండ్రి దన్నిఙ్ దేవుణు కూక్న ఒనాన్.
ఉండ్రి దన్నిఙ్ డిఃస్న సొనాన్.
రుండి బోదెక్ ఉండ్రె జత్తదు నూర్‍జినిక (17:35)
36 రిఎర్ మడిఃఙ మహిఙ ఒరెన్ వన్నిఙ్ దేవుణు కూక్న ఒనాన్.
ఒరెన్ వన్నిఙ్ డిఃస్న సొనాన్”, ఇజి వెహ్తాన్.
37 అయావలె వన్ని సిస్సుర్ వన్నివెట,
“ప్రబు,
ఇక్క ఎమె జర్గినాద్?”
ఇజి వెన్‍బతార్.
అందెఙె వాండ్రు,
“పీన్‍గు ఎమె మంజినాదొ అబ్బె పెరి డేగెఙ్ కవ్విజి మంజినె”,
ఇజి వెహ్తాన్.