అహిమెలెకుబాన్ దావీదు సొహిక
21
1 అయావెన్కా దావీదు నోబు ఇని పట్నమ్‍దు మని అహిమెలెకు ఇని పుజెరిబాన్ సొహాన్. వాండ్రు బాన్ సొహిఙ్ అహిమెలెకు తియెల్ఆతాండ్రె, “నీను ఒరిదె ఎందన్నిఙ్ వాతి? నీ వెట ఎయెర్ రెఎరా?” ఇజి వన్నిఙ్ వెన్‍బతాన్. 2 అందెఙె దావీదు, పుజెరి ఆతి అహిమెలెకు వెట, “రాజు నఙి ఉండ్రి పణి ఒప్పజెప్తాన్. అక్క ఇనిక ఇహిఙ, ‘నాను వెహ్సి పోకిసిని సఙతి ఎయెరిఙ్‍బ వెహ్తెఙ్ ఆఎద్’ ఇజి నా వెట వెహ్తాన్. నా సయ్‍నమ్‍ది వరిఙ్ ఎమెణి బాడ్డిదు దసుల్ ఆదెఙ్‍నొ నాను ఎర్‍పాటు కిత మన. 3 యెలు నీ డగ్రు ఇనికబ మనదా? మహిఙ నఙి అయ్‍దు పిట్టమ్‍కు సిద. సిల్లిఙ నీబాన్ ఇనిక మహిఙ అక్క సిద”, ఇజి వెహ్తాన్.4 నస్తివలె పుజెరి ఆతి అహిమెలెకు, “నా డగ్రు దేవుణు వందిఙ్ కేట కిజి ఇట్తి పిట్టమ్‍కునె మనె. మాముల్ పిట్టమ్‍కు సిలు. నీ సయ్‍నమ్‍దికార్ యా మద్దెదు అయ్‍లి కొడొఃక వెట గూర్ఎండ మహిఙ, యా పిట్టమ్‍కు తిండ్రెఙ్ ఆనాద్”, ఇజి దావీదుఙ్ వెహ్తాన్. 5 అందెఙె దావీదు, “నిజమ్‍నె, మాపు సోతి వాతిబాణిఙ్ అసి, యా మూండ్రి దినమ్‍కు అయ్‍లి కొడొఃక వెట దూరం మనాప్. మాముల్ పణిఙ్ కిదెఙ్ సొనివలెబ నా సయ్‍నమ్‍దికార్ దేవుణుదిఙ్ కేట ఆతి లెకెండ్ మంజినార్. యెలు ఇహిఙ మాపు రాజు సీని ఆడ్రదాన్ వాతాప్ గదె. అందెఙె నేండ్రు ఒద్దె నెగ్గెణ్ మనాప్”, ఇజి పుజెరి వెట వెహ్తాన్.
6 పుజెర్‍ఙ మని పద్దతి వజ యెహోవ ఎద్రు ఇడ్‍జి మంజిని పిట్టమ్‍కు రోజు లాగ్‌జి, బాన్ కొత్త పిట్టమ్‍కు ఇడ్‍జి మంజినార్. అయా లెకెండ్ కేట కిజి ఇట్తి పడాఃయ్ పిట్టమ్‍కునె బాన్ మహె. మరి ఇనికెఙ్‍బ బాన్ సిల్లితిఙ్, ఆ పిట్టమ్‍కునె పుజెరి ఆతి అహిమెలెకు దావీదుఙ్ సితాన్.
పుజెర్‍ఙు వరి పద్దతి వజ యెహోవ ఎద్రు రోజు కేటకిజి ఇడ్ని పిట్టమ్‍కు (21:7)
7 అయా నాండిఙ్ సవులుఙ్ సేవ కిని వరి లొఇ ఒరెన్, యెహోవ డిగ్జి వాని టంబు గుడ్స డగ్రు మహాన్. వన్ని పేరు దోయేగు. వాండ్రు ఎదోము దేసెమ్‍దికాన్. వాండ్రు సవులు గొర్రెఙ్ మేప్‍ని వరిఙ్ అతికారి ఆత మహాన్.
8 నస్తివలె దావీదు, “రాజు నఙి వెహ్తి పణి బేగి కిదెఙ్ ఇజి నాను గజిబిజి ఆతానె, నా కుర్ద కూడఃమ్‍ని ఉద్దం కిని సామానమ్‍కు తతెఙ్ సిల్లె. నీబాన్ కుర్ద కూడం గాని, బల్లెం గాని మనదా?” ఇజి పుజెరి ఆతి అహిమెలెకుఙ్ వెన్‍బతాన్. 9 అందెఙె వాండ్రు, “ఏలా ఇని లొవ్వదు నీను సప్‍తి పిలిస్తియది గొలియాతు కుర్ద కూడం ఇబ్బె మనాద్. అక్క పాతదాన్ సుటె కితానె ఏపోదు సొక్క వెన్కా ఇట్త మన. అక్కదె ఇబ్బెన్ మనాద్. నిఙి ఇస్టం మహిఙ అక్క ఒఅ. అక్క ఆఎండ మరి ఇనికబ ఇబ్బెన్ సిల్లెద్”, ఇజి వెహ్తాన్. అందెఙె దావీదు, “నిన్ని కుర్ద కూడం మరి ఉండ్రి ఇబ్బెన్ సిల్లెద్‍సు. అహిఙ యాకనె నఙి సిద”, ఇజి వన్నిఙ్ వెహ్తాన్.
దావీదు గాతు పట్నమ్‍దు సొహిక
10 అయా నాండిఙ్ దావీదు సవులుఙ్ తియెల్ ఆతాండ్రె, గాతు పట్నమ్‍దు మని ఆకీసు రాజు డగ్రు సొహాన్. 11 అయావలె ఆకీసు రాజుఙ్ సేవ పణి కినికార్, “వీండ్రు దావీదు గదె. వీండ్రు ఇస్రాయేలు దేసెమ్‍ది రాజు గదె. బాణి బోదెక్ విన్ని వందిఙ్‍నె గదె,
‘సవులు వేలకొల్‍ది లోకురిఙ్ సప్తాన్,
దావీదు పది వేలకొల్‍ది లోకురిఙ్ సప్తాన్’ ఇజి
పాటెఙ్ పార్‍జి కర్‍జితె”, ఇజి వారు వెహ్తార్.
12 వారు వెహ్తి మాటెఙ్ దావీదుఙ్ గుర్తు వాతె. అందెఙె దావీదు గాతు పట్నమ్‍ది ఆకీసు రాజుఙ్ నండొ తియెల్ ఆతాన్. 13 నస్తివలె దావీదు వరి ఎద్రు వెర్రి వన్నిలెకెండ్ ఆజి, దార్‍బందమ్‍కాఙ్, సేహ్లెఙ ముస్కు బన్నెఙ్ బన్నెఙ్ గీసి, వన్ని గడ్డమ్‍కాణిఙ్ ఏరువడిఃఙ్ వాక్సి మహాన్. వారు వన్నిఙ్ అస్తి ఒతిఙ్ వాండ్రు వెర్రి వన్ని లెకెండ్ ఆజి మహాన్.