Tɩndɩnáa-dɛ́ɛ Tɩmɛ́ 1

Tɩndɩnáa-dɛ́ɛ Tɩmɛ́

Kezeŋa Ɖacɩrɩ‑cɩrɩ ńga Yeésu sɩ ɩkává tɩndɩnáa nɛ́

1 Kʊ́bɔnɩ́ Tewofíili,

mɛ́dɛ́ɛ tákaraɖá kaɖaa ńgɩ^a-daá máádɩ́ wenbí bɩrɩ́ŋa Yeésu waalá nɛ́,

na wenbí bɩrɩ́ŋa waawɩ́lɩ kɔgbɔɔ ɖoo bɩgabaazɩya

2 hálɩ bɩkɔ́nɩ bɩtála wɩ́rɛ wenɖé Ɩsɔ́ɔ waagbáázɩ yɩ ɩjɔ́ ɩsɔ́ɔ́dáá nɛ́.

Naanɩ́ na Ɩsɔ́ɔ ɩkpáázɩ yɩ ɩjɔ́ ɩsɔ́ɔ́dáá nɛ́,

waazɩ́ɩ́zɩ tɩndɩnáa waalɩzɩ́ wɛ nɛ́ ɩdɛ́ɛ mará na Kezeŋa Ɖacɩrɩ‑cɩrɩ ńga-dɛ́ɛ ɖóni-daá.

3 Waazɩ́ na ifé ɩlɩ́ɩ ɩsɩɖáa-daá nɛ́,

tɩndɩnáa bɛḿ ɖʊɖɔ gɛ waadálɩzɩ́ ɩdɩ ɩwɩ́lɩ ɩ́na waazá iyéle badɩtɩŋa bana ná baazá,

bɩdɛkɛ́ɛ kʊ́ɖʊńbɩ ngʊ́ bɩdɛkɛ́ɛ nabʊ́lɛ,

sɩsɩ toovonúm,

weevé ɩlɩ́ɩ ɩsɩɖáa daá,

ngɛ ɩwɛ ɩ́na waazá.

Waalɩzɩ́ ɩdɩ ɩwɩ́lɩ wɛ nɛ́,

wɛ́-bíya nɛɛ́lɛ-daá gɛ waalaaná ɩdɩ lɩzɩ́ɩ wánwɩlɩ́ɩ wɛ,

bɩka wánŋmatɩ́ wɛ Ɩsɔ́ɔ-dɛ́ɛ kowúrɔ́ɔ-dɛ́ɛ tɔ́m.

4 Wɩ́rɛ ɩ́na wɛ bénɖíi kíɖíím nɛ́,

ngɛ waabá ɩbásɩ wɛ sɩsɩ bákalɩ́ɩ Yerusalɛ́ɛm tɛ́ɛ́dɩ bɛɖɛ́ɛ ɖeelí,

amá,

báɖáŋ wenbí Caáwʊ wooɖúu ɩsɩ́ɩ sɩ ɩfa wɛ nɛ́.

Wɔɔdɔ́ wɛ sɩsɩ:

«Ɩjɔ́ɔ Yerusalɛ́ɛm cé ɩɖáŋ kʊjɔɔwʊ mááŋmátɩ mɩ́ɩ kɩdɔ́m nɛ́.

Méévééri mɩ́ɩ sɩsɩ

5 Yaayá weelíri ɩráa lɩ́m-daá gɛ,

amá,

mɩ́nyɔ́ɔ́ nɛ́,

bídénleeri,

Kezeŋa Ɖacɩrɩ‑cɩrɩ ńga gɛ Ɩsɔ́ɔ sɩ ikédisi mɩ́rɔ́ɔ́zɩ́.»

Yeésu wángbáa Ɩsɔ́ɔ-jɔ́ ɩsɔ́ɔ́dáá

6 Ngɛ Yeésu-dɛ́ɛ tɩndɩnáa bána yɩ boduuzée nɛ́,

bɔɔbɔ́ɔ́zɩ yɩ sɩsɩ:

«Ɖádʊ́ʊ,

a bɩlɛ́,

sáátɩ kɩna kɩdaá gɛ sɩ nbɩ́sɩ ngʊ́sɩ Israyɛ́ɛlɩ kowúrɔ́ɔ gɛ?»

7 Ngɛ Yeésu woobúsi wɛ sɩsɩ:

«Bɩdafa mɩ́ɩ nɩ́bááwʊ sɩsɩ ɩ́tɩ́lɩ́ sáátɩwá na wákatɩ́wá Caáwʊ waazɩ́ɩ tɩ na ɩdɩtɩŋa ɩdɛ́ɛ yíko-daá nɛ́.

8 Amá,

mɩ́nyɔ́ɔ́ nɛ́,

a Kezeŋa Ɖacɩrɩ‑cɩrɩ ńga weegédi mɩ́rɔ́ɔ́zɩ́,

kánváa mɩ́ɩ ɖóni nabɩ́rɩ,

bɩka ɩbɩ́sɩ mɛ́dɛ́ɛ seríya-dɩnáa Yerusalɛ́ɛm tɛ́ɛ́dɩ-daá na Yudée laadɔ́ɔ rɩ́ŋa-daá na Samarɩ́ya laadɔ́ɔ-daá hálɩ ngbɔ́ɔ nɖɛ́ɛ ɖúúlínya rɩ́ŋa na kɩgɛdɛ́ɛ tɩ́ŋa-tɩ́ŋa.»

9 Waaŋmátɩ bɩlɛ́ bɩtɛ́ nɛ́,

ngɛ bɩɩgbáázɩ yɩ ɩkpa ɩsɔ́ɔ́dáá bɩka tɩndɩnáa sɩ́ŋɛ́ɛ bɛbɛɛ́na yɩ;

ngɛ ŋmɩnʊʊ́ nakɩ́rɩ wɔɔgɔ́nɩ kɩtɔ wɛ bádándanáa yɩ.

10 Bɔwɛ bɛbɛɛ́na ɩsɔ́ɔ́dáá bɩ́ngbaazɩ́ Yeésu nɛ́,

ngɛ abaaláa nɔɔ́lɛ bozóóna kpɩná kʊ́fʊlʊmá nɛ́ waaɖʊ balɩ́ɩ baazá-daá.

11 Ngɛ bɔɔbɔ́ɔ́zɩ tɩndɩnáa sɩsɩ:

«Mɩ́nyɔ́ɔ́ Galilée ńba,

we-rɔ gɛ mɩ́zɩ́ŋɛ́ɛ mɩ́nbɛɛŋ́ ɩsɔ́ɔ́dáá tíḿḿ bɩlɛ́.

Yeésu ɩmʊ́ Ɩsɔ́ɔ waalɩzɩ́ yɩ mɩ́lɔ́wʊ́táá ɩkpáázɩ ɩjɔ́ nɛ́,

wenbí nɔ́ɔ́ mɩ́ɩ́ná yɩ wángbáa nɛ́,

bɩlɛ́ ɖʊɖɔ gɛ sɩ itékédiḿ.»

Baalɩzɩ́ weení sɩ ɩkpɔ́ɔ Yudásɩ ɖɩdáarɛ nɛ́

12 Ńna gɛ tɩndɩnáa waalɩ́ɩ bʊ́ʊ bánÿaá kɩ Olivíyée tɩ́ɩ́nɩ bʊ́ʊ nɛ́ kɩdaá,

bɔlɔ́ɔ babɩ́sɩ Yerusalɛ́ɛm tɛ́ɛ́dɩ-daá.

Kpɔɔ ńna nɖɛ́ɛ Yerusalɛ́ɛm cɔɔ́ɔ gɛ nyazɩ kilomɛ́ɛ́ta kʊ́ɖʊmʊ́ʊ bɩlɛ́;

wenbí bɩɩva sɩ ɩrʊ́ ɩ́nʊŋ Fɛɛzɩrɛ wɩ́rɛ nɛ́ nbɩlɛ́.

13 Baabɩ́sɩ nɛ́,

ngɛ baagba ɖaḿ bɔ́ndɔ́rɔ́jɔ́wʊ́ʊ kɩdaá nɛ́-daá.

Tɩndɩnáa bɛḿ badaá,

bánnáa Pétro,

Yʊháánɩ,

Yaakúbu na Andirée,

Filíipu na Tomáa,

Barɩtelemíi na Maatéwu;

Yaakúbu Alɩfée biyaalʊ́,

Simɔ́ɔnɩ Kezée bú na Yúudi Yaakúbu biyaalʊ́.

14 Tɩndɩnáa bɛḿ barɩ́ŋa baabá bánjaarɩ́ badɩ na sʊlʊ́ńdɩ,

bána aláa nɛbɛ́rɛ.

Marɩyáma Yeésu ɩgɔɔ wɛ badaá,

bɩtasɩná Yeésu igoobíya ɖʊɖɔ.

15 Wɩ́rɛ tɩndɩnáa woodúúzi nɛ́,

bɛgɛ́ɛ nyazɩ ɩráa nɩɩ́nʊ́wá na ákoowú (120) bɩlɛ́,

ngɛ Pétro waagʊrʊ́ koobíya lɔwʊtáá ɩtɔ́ sɩsɩ:

16 «Koobíya,

bɩmɔɔ́na wentí Kezeŋa Ɖacɩrɩ‑cɩrɩ ńga waavʊ́ńŋmatɩná wúro Ɖáwʊɖa nɔɔ́ Yudásɩ-rɔ nɛ́ tikóódi.

Yudásɩ ɩmʊ́ wɛɛgɛ́dɛ́ ná wenbá baagba Yeésu nɛ́ nɩ́bááwʊ.

17 Ɩvʊnwɛ ɖɔ́lɔ́wʊ́táá gɛ,

bɩka ɖána yɩ ɖánvʊnlám kʊ tɩmɛ́rɛ kʊ́ɖʊńɖɛ.

18 Waalá bɩdaavé na bɛfɛ́rɛ yɩ liideé weená nɛ́,

laadɔ́ɔ gɛ waamʊ.

Waazála ilóódi-rɔ,

ilóódi ɩya,

bɩka iloobíya rɩ́ŋa ɩlɩ́ɩ bɩyáázɩ adɛ.

19 Yerusalɛ́ɛm ńba rɩ́ŋa waanɩ́ɩ tɔ́m tɩna,

hálɩ biiyéle baayáa laadɔ́ɔ kɛḿ bɛdɛ́ɛ kʊnʊm-daá sɩsɩ Akɛ́ɛlɩdɛmá,

bugutoluú gɛ sɩsɩ Azimá laadɔ́ɔ.

20 Ngʊ́ baaŋmáa Yéńdiwá-dɛ́ɛ tákaraɖá-daá sɩsɩ:

“Ɩráa ɩ́lɩɩ ɩɖɔɔ́-daá;

bɩka naárʊ ɩ́kɔcɔ́ɔ kadaá.”

Ngɛ baadáŋmáa Yéńdiwá-dɛ́ɛ tákaraɖá-daá ɖʊɖɔ sɩsɩ:

“Naárʊ ɩ́la ɩdɩmɛ́rɛ.”

21-22 Ɖoo ɖóvóo Ɖádʊ́ʊ Yeésu nɛ́,

ɖávʊnna nɛbɛ́rɛ ɖóvóo na kʊ yɩ báa sáátɩ wenkí.

Bɛɛ kɔgbɔɔ ɖoo Yaayá liríi yɩ lɩ́m-daá hálɩ bɩkɔ́nɩ bɩtála wɩ́rɛ wenɖé Ɩsɔ́ɔ waalɩzɩ́ yɩ ɖɔ́lɔ́wʊ́táá nɛ́.

Bɩlɛ́ nɛ́,

badaá naárʊ ɩ́tásɩ́ná ɖáa ɖɩlɩzɩ́ Ɖádʊ́ʊ Yeésu-dɛ́ɛ ɩsɩɖáa-daá fém-dɛ́ɛ seríya.»

23 Ńna gɛ baalɩzɩ́ ɩráa nɔɔ́lɛ:

Ísifu,

bánÿaá yɩ sɩsɩ Barɩsabáasɩ,

weedéɖíi yɩ́ɖɛ sɩsɩ Yusitúusi nɛ́,

na Matɩyáasɩ.

24 Ngɛ baazʊ́lʊ Ɩsɔ́ɔ sɩsɩ:

«Ɖádʊ́ʊ Ɩsɔ́ɔ,

nyɔ́ɔ́ weení nyányɩ ɩráa rɩ́ŋa wenbé nɛ́,

wɩlɩ ɖáa ɩráa nɔɔ́lɛ bana badaá,

weení nyɔ́zɔɔlɛ́ɛ

25 sɩsɩ ɩkpɔ́ɔ ɖɩdáarɛ Yudásɩ weeyéle ɖɛ tɩndɩ́ɩ́dɩ tɩmɛ́rɛ ɖɩna ɖɩdaá,

ɩɖɛ́ɛ ɖɩdáarɛ ɖɩmɔɔ́na yɩ nɛ́ ɖɩdaá nɛ́.»

26 Bɔɔdɔ tɛ́tɛ́ nɛ́,

ngɛ bɩɩgba Matɩyáasɩ.

Ńna gɛ ɩlɛ́ waadasɩná tɩndɩnáa fuú na naárʊ baaganáa.